Поранешната министерка за внатрешни работи, Гордана Јанкулоска, го коментира застарувањето на предметот „Талир“ на некогашното специјално обвинителство. Таа обвини дека СЈО и сите во него сите таму биле „црпнати” за да дадат одговор кој, кого и зошто незаконски прислушкувал со години, 24/7.

Јанкулоска наведува дека СЈО водело кадровска политика преку политички прогон за билдање на партиски рејтинзи.

„Застарел дел од предмет што ниту можело ниту требало да биде предмет на кривично гонење ако барем некои од оние кои се занимавале со него се држеле до законот, правдата и правото, а не се воделе од политички диктати.  СЈО и сите таму, беа “црпнати” за да дадат одговор кој, кого и зошто незаконски прислушкувал со години, 24/7.

Се занимаваа со се освен со тоа за што беа формирани. Водеа кадровска политика во политичките партии преку политички прогон, “билдаа” партиски рејтинзи за изборни цели, преку закани и притисоци одбираа владини партнери не според освоени гласови туку според дневно политички потреби, и сега проблем бил Кривичниот законик од 2023 (кој сам по себе е тема за посебна дебата). Не е ниту до тој ниту до било кој друг закон.

До правниците е, кои во се гледаа математика и тераа политика, си кркаа незаконски бонуси и десет години парадираа до судовите како холивудски ѕвезди и градеа метеорски кариери ама не заради резултати или квалитет туку заради сервилност кон претходната власт“, напиша Јанкулоска на социјалните мрежи.

Случајот „Талир 1“, за незаконското финансирање на ВМРО-ДПМНЕ, следната недела ќе почне од почеток по дури 6-ти пат.

Вчерашното рочиште се одложи, а во меѓувреме застаре кривичното дело Злоупотреба на службената положба и овластување, за кое се гонеа екс премиерот Никола Груевски и Кирил Божиновски, а остана само кривичното дело за перење пари.

Претседателот на САД, Доналд Трамп, денес ја повлече претходната покана до Канада да се приклучи на Одборот за мир, иницијатива насочена кон прекинување на конфликтите низ целиот свет.

Трамп се предомисли откако канадскиот премиер Марк Карни одржа говор на Светскиот економски форум во Давос во кој отворено ги осуди големите сили дека ја користат економската интеграција како оружје, а царините како инструмент на моќ.

„Со ова писмо, Одборот за мир ја повлекува својата покана до вас во врска со вклучувањето на Канада во она што ќе биде најпрестижниот Комитет на лидери некогаш собран“, напиша Трамп во објава на Truth Social до Карни.

Минатата недела, канцеларијата на канадскиот премиер соопшти дека Карни бил поканет во комитетот и дека има намера да ја прифати поканата.

Говорот на Карни, во кој тој ги повика нациите да го прифатат крајот на светскиот поредок базиран на правила, беше пречекан со стоечки овации.

„Канада, која неодамна потпиша трговски договор со Кина, може да му покаже на светот како „средните сили“ можат да работат заедно за да ја избегнат штетата што им ја нанесува американската хегемонија“, рече премиерот.

Трамп одговори дека Канада „живее поради Соединетите Американски Држави“ и и рече на публиката во Давос дека Карни треба да биде благодарен за досегашната дарежливост на Америка.

„Запомнете го тоа, Марк, следниот пат кога ќе дадете изјава“, додаде тој, обраќајќи се директно до Карни.

Повлекувањето на поканата на Канада дојде неколку часа откако Трамп официјално го формираше комитетот, чија првична цел беше да посредува во прекин на огнот во Газа.

Постојаните членки мора да придонесат по 1 милијарда долари за да помогнат во финансирањето на работата на комитетот, рече Трамп. „Откако целосно ќе го формираме овој комитет, ќе можеме да правиме што сакаме“, рече Трамп вчера во Швајцарија, додавајќи дека комитетот „ќе го стори тоа во соработка со Обединетите нации“.

Создавањето на комитетот беше одобрено со резолуција на Советот за безбедност на Обединетите нации според мировниот план на Трамп за Газа, а портпаролот на ОН, Роландо Гомез, вчера изјави дека односот на ОН со Мировниот комитет ќе биде ограничен само на тој контекст.

Аргентина, Бахреин, Мароко, Пакистан и Турција се членови на одборот, меѓу другите. Други сојузници на САД, како што се Велика Британија, Франција и Италија, сигнализираа дека засега нема да се приклучат на иницијативата.

фото/Depositphotos

Русија објави дека денес ќе одржи безбедносни разговори со САД и Украина во Абу Даби, предупредувајќи по средбата на претседателот Владимир Путин доцна во ноќта со американските претставници дека трајниот мир нема да биде можен доколку не се решат територијалните прашања.

Советникот за надворешна политика на Кремљ, Јуриј Ушаков, им рече на новинарите дека средбата, која започнала кратко пред полноќ и траела речиси четири часа, била корисна и исклучително искрена.

Тој рече дека рускиот адмирал Игор Костјуков ќе ја предводи руската делегација на состанокот во Абу Даби и дека претставникот за економска соработка Кирил Дмитриев ќе одржи посебен состанок за економски прашања со Стив Виткоф, претставникот на претседателот Доналд Трамп.

Сепак, на средбата не е постигнат голем пробив.

„Најважно е што за време на оваа средба меѓу нашиот претседател и Американците, повторно беше утврдено дека без решавање на територијалното прашање според формулата договорена во Анкориџ, нема надеж за постигнување долгорочен договор“, рече Ушаков, осврнувајќи се на минатогодишниот самит меѓу Трамп и Путин во Алјаска, каде што наводно разговарале за предавање на источните украински региони Донецк и Луганск, вклучувајќи ги и областите што не беа заземени од руските сили.

Путин нагласи дека Русија е „искрено заинтересирана“ за дипломатско решение, рече Ушаков.

„Додека ова не се постигне, Русија ќе продолжи да вложува континуирани напори за постигнување на целите на специјалната воена операција. Ова особено се однесува на фронтовската линија, каде што руските воени сили имаат стратешка предност“, истакна советникот.

Од руска страна, на средбата учествувале Путин, Ушаков и Дмитриев.

Од американска страна биле Виткоф, Џаред Кушнер и Џош Груенбаум, кој неодамна беше назначен од претседателот Доналд Трамп за виш советник во Комитетот за мир.

фото/епа