Охридскиот советник Нефи Усеини и брат му Ибро Усеини се приведени и спроведени во осумдневен притвор поради нападот на нивниот сограѓанин Спире Топалоски, потврдија за „Макфакс“ од МВР. Полицијата не можеше да ги пронајде изминативе шест дена, а неофицијално, сега сами се пријавиле во полициска станица. Судот им ја изрече оваа мерка поради можноста за повторување на делото, влијание врз сведоци и бегство.

Полицијата веќе изврши претрес во домовите на осомничените, но не ги пронајде бидејќи и двајцата се во бегство. Исто така, одземени се и снимките од објектот во кој се случил инцидентот, а од нив е констатирано дека бил употребен пиштол во нападот на Топалоски.

Нападот на Топалоски се случи пред два дена пред познат охридски хотел. Според сведочењето на нападнатиот за „А1он“, Усеини заедно со брат му и уште две лица првин им извадиле пиштол нему и на неговото малолетно дете, а потоа со оружјето го мавале по главата.

„Сега сум решен – или ќе ме убие или ќе го убијам. На 14-годишно дете, на син ми, пиштол му извади. Жена ми плаче, мајка ми плаче. Око за око, заб за заб. Или државата да преземе нешто за овие што го пустошат целиот град или ќе одам до крај за тоа што на детето мое му извади пиштол. Еден криминалец не може да тероризира секого и секогаш тој да е во право. Целиот сум со дупки“, изјави Топалоски дента кога се случи инцидентот.

Ова не е прв инцидент во кој учествувал советникот Нефи Усеини. Усеини во април минатата година спречи инспектор да изврши увид на дивоизградената тераса кај Чинарот, а притоа и му се заканувал. Обвинителството отвори предмети два месеца потоа, односно неколку дена пред Усеини да го натепа советникот во Општина Охрид, Џемал Мена, среде седница.

Охридскиот советник е ослободен од еден случај – за физичкиот напад на професорот Илјаз Илјази, кој беше натепан пред неговото престојувалиште во Охрид. Обвинителството изјави дека не знае за настанот, односно не добило пријава од СВР Охрид.

По повеќе од една година, сите предмети отворени против Усеини во охридското Обвинителство тапкаат во место. Од таму последно изјавија дека поради пандемијата, обвинителите работат само на итните случаи, а предметите што се во редовна постапка, како оние за Усеини, ќе се разгледуваат во наредниот период кога ќе се врати нормалното работење на Основното јавно обвинителство Охрид.