Актуелниот директор на Македонска пошта, Ејуп Рустеми од ДУИ, ќе биде назначен за директор на ЈП„Државни патишта“, потврди денеска премиерот Зоран Заев. Рустеми во „Државни патишта“ доаѓа на местото на Зоран Китанов од СДСМ.

Од кабинетот на Русетми за „Макфакс“ кусо изјавија дека директорот оди во „Државни патишта“ и дека сите прашања околу најавената приватизација на поштат треба да ги одговори Владата.

Рустеми беше назначен за директор на АД „Пошта на Северна Македонија“ во август 2018 година. Тој си заминува од функцијата само неколку дена по најавата за приватизација. Минатата недела премиерот Зоран Заев го најави процесот и ги задолжи сегашниот директор Рустеми, министерот за економија Крешник Бектеши и заменик-претседателот на Владата задолжен за економски прашања Фатмир Битиќи, да подготват физибилити-студија која треба да покаже дали приватизација или јавно приватно партнерство е подобар начин за приватизација на компанијата.

Министерството за здравство информира дека согласно извештајот на Институтот за јавно здравје кој се однесува на периодот од 12 до 18 октомври, пријавени се 49 смртни случаи од коронавирус од 16 градови, што е зголемување од 58,1% во однос на минатата недела.

Во однос на возраста, 38 лица биле над 60 години, девет лица на возраст од 50 до 59 години и два смртни случаи се пријавени од возрасната група 40-49 години. Коморбидитети се регистрирани кај 35 починати лица.

В извештајниот период тестирани се вкупно 13.213 лица, а регистрирани сe 2.676 нови позитивни случаи од 34 градови во државата со зголемување од 19,3% во однос на минатата недела.

Најголем дел од регистрираните случаи се од Скопје, а најзастапена е возрасната група на лица на возраст 30-39 години (20,9%). Голем број на заболени се регистрира и кај лицата во возрасните групи од 40 до 49  години – 19,5%, 20-29 – 17,6%, над 60 години – 17,5% и 50-59 години – 16,6%. Најмал број е регистриран кај децата од 0-9 години – 3 %) и од 10-19 години – 5 отсто.

Во наведениот период, процентот на позитивни од тестирани лица изнесува 20,3%.

Од случаите кои се епидемиолошки истражени, регистрирани се 96 (7,3%) хоспитализирани, а кај 305 (23,3%) лица е регистрирано присуство на коморбидитети. Од вкупниот број на нови случаи, 470 (35,9%) имаат контакт со потврден случај. Регистрирани се 26 (2,0%) лица со историја на патување во последни 14 дена.

По добиени два негативни теста или со употреба на новиот алгоритам, како оздравени се водат 1.089 лица кои биле хоспитализирани или на домашно лекување, 25% повеќе во однос на минатата недела.

Од 22 октомври ќе се воведе полициски час во северната италијанска покраина Ломбардија, која се смета за „локомотива“ на италијанската индустрија.

Според новата наредба, која е одобрена од централната влада на предлог на владата на Ломбардија, сите трговски активности во целиот регион ќе престанат од 23 часот навечер до 5 часот наутро, освен неопходните, а големите трговски центри ќе останат затворени за време на викендот.

На граѓаните им се препорачува да излегуваат надвор само кога е потребно, а компаниите да ја потенцираат работата од дома.

Претседателот на регионот Ломбардија, Атилио Фонтана, ја донесе одлуката со целосна согласност од сите регионални политички субјекти, и на предлог на научниот и техничкиот комитет со цел да се спречи ширењето на коронавирусот.

Според проценките на Комитетот, кој го анализираше забрзаното ширење на инфекција со коронавирус во последните неколку недели, до крајот на овој месец може да има 600 пациенти во единиците за интензивна нега во Ломбардија, а вкупно хоспитализирани и до 4.000.

Воведувањето на вакви строги ограничувачки мерки во најразвиениот индустриски регион на Италија, Ломбардија, вознемири многу граѓани, а јавноста претпоставува дека слични мерки, доколку не се запре брзото ширење на Ковид-19, ќе бидат воведени и во другите делови на Италија.