Американскиот план за Украина бара дополнителна работа, се согласија челниците на 11 земји и ЕУ во заедничка изјава по состанокот на маргините на самитот Г20 во Јоханесбург.

Тие сметаат дека нацртoт на американскиот мировен план за Украина претставува основа за понатамошна разработка, но дека поединечни точки, вклучувајќи ги предложените ограничувања за украинските вооружени сили, предизвикуваат сериозна загриженост.

Во изјавата стои дека нацрт-планот од 28 точки е темел кој бара дополнителна работа, а челниците истовремено изразуваат загриженост поради предложеното ограничување на украинските вооружени сили, што би ја направило Украина ранлива на идни напади.

Декларацијата ја потпишаа во име на ЕУ Урсула фон дер Лајен и Антонио Кошта, францускиот претседател Емануел Макрон, финскиот претседател Александар Стуб, германскиот канцелар Фридрих Мерц, премиерите Марк Карни од Канада, Михал Мартин од Ирска, Џорџа Мелони од Италија, Санае Такаичи од Јапонија, Дик Схоф од Холандија, Педро Санчез од Шпанија, Кир Стармер од Обединетото Кралство и Јонас Гар Сторе од Норвешка.

Во изјавата се признава дека американскиот предлог вклучува важни елементи што ќе бидат клучни за праведен и траен мир. Но повторуваат дека „се јасни во принципот дека границите не смеат да се менуваат со сила“.

Потсетуваат и дека елементите од планот кои се однесуваат на ЕУ и НАТО бараат согласност од членките на ЕУ и НАТО и додаваат дека имаат намера да продолжат со тесната координација со Украина и САД во наредните денови.

Американскиот план во Киев се гледа со голема загриженост затоа што содржи неколку клучни руски барања: Украина се откажува од дел од територијата, прифаќа намалување на големината на својата армија и се откажува од членството во НАТО.

Русија би ги задржала Доњецк, Луганск и Крим, но би морала да се откаже од другите освоени подрачја.

Од друга страна, Украина би добила западни безбедносни гаранции за спречување на идни руски напади.

Планот предвидува и огромен глобален пакет мерки за Украина веднаш да започне со обновата на разурнатата земја, вклучувајќи основање на Украински фонд за развој со цел инвестирање во брзорастечки индустрии, меѓу кои технологија, дата-центри и вештачка интелигенција.

Српскиот пејач Аца Лукас синоќа бил приведен во Кавадарци околу 00:10 часот, за време на настап во угостителски објект.

Според информацијата од МВР, при акциска контрола спроведена од полицијата, во координација со инспектори и Управата за јавни приходи, било утврдено дека пејачот настапувал без потребната дозвола.

„Утврдено е дека лицето А.В. (57) од Република Србија настапувало без потребна дозвола. За сторениот прекршок до Основниот суд Кавадарци е поднесено барање за поведување прекршочна постапка, по член 217 став 1 точка 2 од Законот за странци. Лицето е спроведено во Основен суд Кавадарци по скратена постапка, каде му е изречена парична казна“, стои во соопштението на МВР.

При контролата во истиот угостителски објект биле констатирани и прекршоци за неиздавање на фискална сметка и Законот за пушење. Констатирано било и дека во објектот се присутни поголем број на гости од дозволеното, за што ќе бидат поднесени соодветни поднесоци, информираат од Министерството за внатрешни работи.

На прес-конференција, Валентин Манасиевски, член на Централниот комитет на ВМРО-ДПМНЕ, обвини дека уставната судијка Добрила Кацарска бара укинување на зголемувањето од 7000 денари на пензиите, додека истовремено бара зголемување на својата плата, која изнесува околу 100.000 денари.

Манасиевски изјави дека дел од судиите и обвинителите блиски до Социјалдемократскиот сојуз бараат енормни зголемувања на платите, а Кацарска, како што рече, „по насока од СДС“ бара намалување на линеарното покачување на пензиите. Во изјавата се наведува дека во време на СДСМ пензионерите добивале многу помали покачувања, додека, според него, лица во правосудството со ниска доверба бараат високи примања.

Од ВМРО-ДПМНЕ обвинуваат дека Социјалдемократите ја крахирале економијата и го контаминирале судството, а сега преку Кацарска се обидуваат да им ги одземат средствата на пензионерите. Манасиевски посочи дека барањата за високи плати во правосудството не се пропорционални со довербата од едвај 2 проценти.

Во изјавата, тој порача дека додека ВМРО-ДПМНЕ е на власт, економијата ќе расте, а со тоа и платите и пензиите. Манасиевски побара од СДСМ јавно да се огради од барањето на Кацарска за поништување на зголемувањето на пензиите.

ВМРО-ДПМНЕ и претходните денови настапи со слични обвинувања, на коишто реагираше Уставниот суд, кој во соопштение остро ја осуди реториката за предметот во кој се оценува уставноста на член 2 од Законот за пензиско и инвалидско осигурување. Според Судот, нападнати се интегритетот, самостојноста и независноста на судијата-известител, а во јавноста се создава погрешна перцепција за работењето на институцијата.

Уставниот суд информира дека во случајот се поднесени 17 иницијативи од граѓани, а не од судијката Кацарска, и дека одлуките се носат со мнозинство гласови, а не од еден судија. Судот оцени дека прозивките кои ја поврзуваат судијата со партиски интереси претставуваат притисок и опасен преседан, особено кога некоја одлука не одговара на политички субјекти.

Во соопштението се додава дека јавното напаѓање на судии е директен напад врз институцијата што го штити Уставот и дека прашањето на пензиите не смее да се користи како основа за политичко влијание врз Судот. Уставниот суд апелира политичарите да покажат уставно-правна култура и повтори дека останува имун на секој притисок или обид за влијание.

Pред два дена, Уставниот суд поведе постапка за линеарното зголемување на пензиите. Судот оценува дека одредбата може да ги наруши уставните принципи на социјална праведност, еднаквост и правна сигурност, како и да создаде нееднаквост меѓу пензионерите со различни износи на пензии.