Американскиот претседател Доналд Трамп објави дека разговарал по телефон со рускиот претседател Владимир Путин.

Разговорот, според американскиот претседател, траел околу еден час и 15 минути.

Трамп вели дека Путин му рекол дека Русија ќе мора да одговори на нападот од украинските беспилотни летала.

Трамп го опиша разговорот како добар, но нагласи дека тоа не е разговор што веднаш ќе доведе до мир.

„Тукушто завршив телефонски разговор со претседателот Владимир Путин од Русија. Разговорот траеше приближно еден час и 15 минути. Разговаравме за нападот врз руските авиони на земја од страна на Украина, како и за разни други напади од двете страни. Разговорот беше добар, но не беше повик што ќе донесе моментален мир.

Претседателот Путин ми стави до знаење дека ќе мора да одговори на неодамнешниот напад врз руските воени воздухопловни бази. Исто така, се осврнавме на Иран и на фактот дека времето истекува за Иран да донесе одлука за нуклеарно оружје, а таа одлука мора да се донесе брзо! Му кажав на претседателот Путин дека Иран не смее да има нуклеарно оружје и верувам дека се согласуваме за тоа.

Путин предложи да се вклучи во разговори со Иран и дека можеби ќе може да помогне во решавањето на ова прашање што е можно поскоро. Според мене, Иран намерно одложува одлука за ова важно прашање и ќе треба да добиеме јасен одговор многу наскоро!“, напиша Трамп на својата мрежа Truth Social.

Рускиот претседател Владимир Путин за прв пат ги коментираше најновите украински напади на руска територија. Тој рече дека „намерните напади на Украина врз цивилното население во Русија потврдуваат дека веќе нелегитимниот режим во Киев се претвора во терористичка организација“.

Тој нагласи дека „на режимот во Киев не му е потребен мир“ и дека за сегашните власти во Киев, мирот „веројатно значи губење на власта“. Путин тврди дека одлуката за извршување на нападите е донесена на политичко ниво во Украина, а целта е да се заплаши Русија.

Според него, украинските сили се повлекуваат по целата фронтова линија и трпат големи загуби, поради што властите во Киев се свртуваат кон организирање терористички напади. Путин повтори дека Москва стравува дека „нелегитимниот режим во Киев се претвора во терористичка организација“, што, тврди тој, се потврдува со напади врз цивилното население, како оние во регионот Брјанск.

„Она што се случи во Брјанск беше целен напад врз цивили. Според сите меѓународни норми, ваквите дејствија се нарекуваат тероризам“, рече Путин.

Тој додаде дека „нападите врз цивилите имале за цел да го попречат вториот круг преговори“ и дека Украина ќе го искористи секое затишје во борбите за повторно вооружување, присилна мобилизација и подготовка на нови напади.

Рускиот претседател, исто така, тврдеше дека спонзорите на Украина „стануваат соучесници на терористите“.

Тој, исто така, нагласи дека, според него, на украинското раководство му недостасува политичка култура и си дозволува да ги навредува оние со кои наводно се обидува да преговара.

Путин им се заблагодари на службите за итни случаи, железничките работници и другите работници за помошта на повредените во нападите.

Украинскиот претседател Володимир Зеленски денес предложи прекин на огнот до евентуална средба со рускиот претседател Владимир Путин.

„Мојот предлог, и сигурен сум дека нашите партнери можат да го поддржат, е да им се предложи прекин на огнот на Русите до средбата на лидерите“, рече Зеленски во Киев, објави Ројтерс.

Зеленски рече дека продолжувањето на руско-украинските преговори во Истанбул со сегашните делегации би било „бесмислено“ бидејќи двете рунди разговори не се покажаа како успешни, објави Франс Прес.

Украинскиот претседател ја изрази својата „подготвеност“ да се сретне со својот руски колега, заедно со претседателите на САД и Турција, Доналд Трамп и Реџеп Таип Ердоган. „Подготвени сме за таков состанок во секое време“, рече Зеленски. Тој ја обвинува руската страна дека учествува во преговорите во сегашниот формат само за да му угоди на Трамп и да го „одложи“ воведувањето на нови санкции од САД.

Условите за завршување на војната што Москва ги предложи во понеделник во најголемиот град во Турција беа наречени неприфатливи „ултиматуми“ од Зеленски. Русија, меѓу другото, бара Киев да ги повлече своите сили од четирите украински региони анектирани од Москва.

Зеленски, исто така, објави дека Украина и Русија се подготвени да разменат 500 воени заробеници во текот на претстојниот викенд и дека Москва е подготвена да продолжи со таквата практика.