Македонија
Захариева во карантин, Османи и Димитров нема да одат во изолација

Вицепремиерот за европски прашања, Никола Димитров, и министерот за надворешни работи, Бујар Османи, нема да одат во изолација по извршената епидемиолошка процена на ризикот. Поради меѓународните контакти, кои во иднина ќе ги има, Димитров ќе се тестира превентивно.
„Веднаш по добивањето на информацијата дека постои можност дел од бугарската делегација, која беше присутна на состанокот во Берлин, да е позитивна на Ковид-19, СЕП се обрати до Комисијата за заразни болести, каде што се изврши епидемиолошка процена на ризикот. Имајќи предвид дека сите мерки биле почитувани од страна на македонската делегација, односно сите претставници носеле маски и одржувале значителна дистанца, заклучокот од Комисијата е дека нема ризичен контакт и дека нема да се издаде решение за изолација за ниту еден член на македонската делегација. Сепак, со оглед на тоа дека Димитров во наредниот период ќе продолжи со интензивни активности и меѓународни контакти, ќе му се изврши редовно превентивно тестирање на Димитров во согласност со активната политика за тестирање на СЕП“, информираат од СЕП.
Бугарското МНР соопшти дека вицепремиерката и министерка за надворешни работи на Бугарија, Екатерина Захариева, е во самоизлација и се чека резултатот од нејзиниот ПЦР-тест откако заменик-министерот Петко Дојков бил позитивен на брз тест на Ковид-19. На состанокот во Берлин во понеделникот присуствуваа и вицепремиерот Никола Димитров и шефот на македонската дипломатијата, Бујар Османи, заедно со претставници на Германија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Гори депонија кај Ново Село, под контрола пожарот во „Јасен“, осум се изгаснати

На територијата на Македонија до 18:00 часот се регистрирани вкупно десет пожари на отворен простор, од кои еден сè уште е активен, еден е ставен под контрола, а осум се целосно изгаснати, соопштија од Центарот за управување со кризи (ЦУК).
Најтешка е состојбата во општина Ново Село, каде што пожарот кој зафатил депонија и сува трева кај селото Колешино сè уште гори и ги мобилизира екипите на терен. Додека таму битката продолжува, во Македонски Брод, во повеќенаменското подрачје „Јасен“, огнената стихија што зафати мешана шума е ставена под контрола, но пожарникарите и шумската полиција и натаму внимателно го следат теренот за да спречат повторно разгорување.
Останатите осум пожари кои денеска предизвикаа сериозни грижи се целосно изгаснати. Во Илинден, кај клучката Инџиково, беше запалено ѓубре на обиколницата, додека во Студеничани и во селото Подвис во општина Кривогаштани огнот зафати сува трева. Слична слика имаше и кај селата Турново и Секирник во општина Босилово, каде што беше зафатена депонија и тревна површина. Во Струга, пак, пожарот во селото Дрслајца, каде што гореше ѓубре, е изгаснат со брза интервенција на екипите.
И во Кичево, кај селото Цер, беше забележан пожар во ѓубре, додека во Куманово, на локацијата Пчињски Пат, огнот зафати сува трева, дрва и дури четири моторни возила на еден авто плац. Во општина Липково, кај селото Ваксинце, беше запалено стрниште, но пожарот таму е ставен под целосна контрола.
Според ЦУК, иако голем дел од пожарите се изгаснати, вниманието останува на теренот, особено во Колешино, каде што пламениците и натаму се шират.
Македонија
Коњановски вети големи проекти, како реконструкција на улици, нов мост и инвестиции во спортот

На денешниот Саем-Отчет под мотото „4 години работа за тебе“, свое обраќање имаше градоначалникот на општина Битола, Тони Коњановски, кој ги претстави проектите и инвестициите што се реализираат во градот.
Коњановски истакна дека општината вложува во инфраструктурата преку целосна реконструкција на улици со водоводна и канализациона мрежа. Според него, веќе е завршена првата третина од комплетната реконструкција на 800-метарскиот влез во Битола – долгогодишен проблем на градот.
„Направивме над 50 километри улици и во урбаните и во руралните средини. Улицата Бурса го решава густиот транспорт, влезот спрема Охрид е дооформен со нов мост, а реконструирани се и неколку поголеми улици како Крушевска Република и Стив Наумов“, изјави Коњановски.
Градоначалникот најави и големи инвестиции во спортот – реконструкција на стадионот „Петар Милошевски“, изградба на нова боксерска сала, велосипедски патеки и памп трака за рекреација.
„Стадионот го подготвуваме во полн сјај за претстојните натпревари, реконструкцијата на јужната трибина е огромен проект за градот. Во непосредна близина изградивме нова боксерска сала на местото на старата руина, а реконструиравме и спортска сала која по многу години повторно ги исполнува условите за Лигата на шампионите“, рече Коњановски.
Покрај тоа, општината веќе изгради два нови паркинга, а со проектите поддржани од Владата се очекуваат уште пет. Битола издвојува и значителни средства за спортските клубови – над 1,5 милиони евра годишно.
„Првите велосипедски патеки се завршени – повеќе од 5,5 километри со комплетно обележување, но тука не застануваме“, додаде градоначалникот.
Македонија
Тврдењата на д-р Кедев за операциите во приватните болници ќе ги „чешлаат“ експерти од Словенија, Италија и од Германија

Министерот за здравство, Азир Алиу, најави дека до понеделник ќе биде комплетирана листата со странски експерти кои ќе ја анализираат праксата на приватните болници и ќе утврдуваат дали се извршувале непотребни операции кај пациенти.
„Еден експерт ќе биде од Словенија, вториот е од Италија, а за третиот се разгледуваат кандидати од Австрија и Германија“, изјави Алиу за ТВ 24.
Министерот нагласи дека ангажирањето на странски експерти е направено за да се обезбеди поголема објективност и точна проценка на состојбата во приватните здравствени установи.
Во меѓувреме, Министерството за здравство ја подготвува и методологијата по која ќе се опфатат здравствените установи од приватниот и јавниот сектор. Од приватните болници ќе се бара до 15 септември да достават целосен список на интервенции до Министерството.
Овие мерки следат по изјавата на професор д-р Сашко Кедев дека во одредени приватни болници се извршувале операции за профит, иако тие интервенции не биле медицински неопходни.