Македонија
Избори на 5 јули ако нема консензус за измена на Изборниот законик
„Доколку има консензус од сите политички партии да се измени Изборниот законик, тогаш изборниот ден, наместо недела, односно 5 јули, може да биде среда, односно 8 јули, а наместо во сабота, болните и изнемоштените да гласаат во понеделник и вторник“, рече лидерот на СДСМ, Зоран Заев.
Според него, засега договор нема, а таква можност постои до сабота кога и завршува вонредната состојба, што е единствен механизам за измена на Изборниот законик и пролонгирање на изборите за три дена.
„За жал, знаете како, не е толку тешко да се биде паметен и да се фати можноста дали има можност за лидерска средба или не. Нема можност за лидерска средба и јас го разбирам претседателот Пендаровски кога вели: ‘Чуму да свикам трета лидерска средба кога пак ќе си одиме без договор. Барем да има некој ишарет, некоја близина за да се договориме за да се свика лидерска средба’. Останува можноста, секако, до крајот на денот, в сабота кога завршува вонредната состојба. Тоа значи денешниот и утрешниот ден ни стојат на располагање. Колку и да сака некој нешто да менува, не можеме и по делот на Уставот. Ниту можеме да свикаме Собрание, ниту можеме да го менуваме Уставот ниту, пак, законите. Тоа е единствена алатка, ни останува вонредната состојба. Граѓаните треба да знаат, вонредната состојба е поинаква од рестриктивните мерки. Вонредната состојба е за економските мерки, ние уште правиме реализација на вториот пакет, а третиот почнува оваа седмица. За четврти пакет нема потреба“, рече Заев.
Според него, Владата не треба да прави сама промени во таквите делови на Изборниот законик бидејќи, како што вели, секогаш, од самостојноста па досега, за вакви промени се постигнувало консензус од сите политички партии.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Член на Надзорен одбор на банка извршил измама преку злоупотреба на чувствителна информација
Одделот за сузбивање на организиран и сериозен криминал, Единица за финансиски криминал во соработка со Одделот за криминалистичка полиција, поднесе кривична пријава против Ф.Е. од Скопје, поради измама при работењето со хартии од вредност.
Пријавениот во својство на член на Надзорен одбор на банка од Скопје, злоупотребил внатрешна информација која се однесува на висината на дивидендата за 2023 година, која како член на надзорен одбор ја дознал во текот на 2024 година. На тој начин користејќи ja ценовно чувствителната информација истиот се стекнал со 500 обични акции, по просечна цена на чинење на акција од 16.400,00 денари или вкупно за акциите платил 8.200.000,00 денари.
Кривично пријавениот сензитивните информации ги пренел и на трети лица поточно на членови на негово потесно семејство со што истите ја искористиле информацијата на начин што купиле 701 хартија од вредност (акција) на банката, по цена пониска од цената која што ја достигнала хартијата од вредност (акција). Односно за акциите бил платен вкупен износ од 11.520.967,00 денари, а овозможило да се стекнат со вкупна корист од 639.000,00 по основ на ценовната промена на акцијата како и вкупно 646.100,00 денари по основ на дивиденда. Со ова лицето Ф.Е прибавил противправна имотна корист за себе и за членовите на неговото семејство и на тој начин сторил кривично дело „Измама при работењето со хартии од вредност и удели по чл. 275 ст. 3 од КЗ.
Македонија
Минчев на средба со амбасадорката на Холандија
Министерот за јавна администрација, Горан Минчев, денеска оствари средба со холандската амбасадорка, Узлем Џанел.
На средбата, стана збор за зајакнување на билатералната соработка, особено во областите на реформата на јавната администрација, градење на капацитетите во јавната служба и промоцијата на практиките за добро владеење.
Министерот Минчев изрази благодарност за поддршка на Холандија за реформските процеси во Република Македонија, особено за нејзиниот придонес за зајакнување на институционалниот капацитет, транспарентноста и отчетноста во јавниот сектор.
Тој нагласи дека Холандија е вреден партнер во патувањето на земјата кон пристапување во ЕУ, особено во однос на модернизацијата на јавниот сектор и владеењето на правото.
Амбасадорката Џанел ја истакна посветеноста на нејзината земја за поддршка на Република Македонија во овие области и иницијативата за подобрување на управувањето и административните услуги.
Двете страни ја дискутираа можноста за истражување на потенцијалот за споделување на најдобрите практики од Холандија во области како што се е-владеење, антикорупциски мерки и децентрализација.
Македонија
Директорите на царинските управи на Македонија и Бугарија се сретнаа во Софија
Директорите на Царинските управи на на Република Северна Македонија Бобан Николовски и на Република Бугарија Георги Димов одржаа билатерална средба во Софија
Директорите разговараа за добрата меѓуинституционална соработка како и за развојот на граничните премини долж граничната линија. Беше истакнато дека за исполнување на нивната важна улога за заштита на граѓаните и бизнисите денес, царинските управи работат со современи методи на контрола и анализа на ризик базирани на интегрирани модели.
Договорено е и активирање на соработката во различни области од специфичната царинска дејност.
Договорено е во блиска иднина двете страни да одржат средба на највисоко ниво со поддршка на секторски работни групи. Билатералната средба беше во рамките на посетата на директорот Николовски на Софија по повод состанокот на високо ниво за зајакнување на регионалната соработка во борбата против трговијата со дрога по воздушен пат во Југоисточна Европа. Настанот е дел од 10-тиот состанок на Помпиду групата на Групата на Советот на Европа за соработка во борбата против трговијата со дрога на аеродромите во Југоисточна Европа (AIRSEE). Коорганизатор и домаќин на семинарот на високо ниво од бугарска страна беше Царинска агенција на Република Бугарија.