Македонија
Илјадници ученици и денес не може да се приклучат за онлајн-учење, Царовска повикува на трпение

Фијаско и на генералната проба, Националната платформа за онлајн-учење и денес паѓа. Илјадници ученици, наставници и родители и утрово не можеа да се приклучат на Националната платформа за онлајн на закажаната генерална проба. Требаше да се приклучат и основните и средните училишта, но сите обиди завршија со објаснување дека се работи на одржување на платформата или дека се појавила грешка.
„Ова е фијаско. На само еден ден пред почетокот на школската година и децата и наставниците да немаат претстава како би личело работењето на неа“, коментираат родителите на социјалните мрежи, а има такви што го повикуваат господ на помош.
По речиси еден час обиди, некои од учениците успеаја да се приклучат, па кажаа дека платформата е празна, нема ставено содржини, а дел од наставниците се пожали дека немаат интернет во училиштата, од каде што треба да се приклучат на платформата, па тестирањето се сведе само на обиди за приклучување. Министерката за образование, Мила Царовска, и денес повика на трпение и кај учениците и кај наставниците. Таа очекува во првите две недели да има проблеми со влегувањето на платформата, со вклучувањето на учениците, но верува дека проблемите ќе бидат надминати.
„Дајте да му дадеме поддршка на процесот. Првпат се случува и за ФИНКИ како факултет, и за Министерството за образование и за локалните самоуправи, а што е најважно и за наставниците. Тие лани поминаа еден похаотичен период, па научија нови дигитални алатки. Сега малку поорганизирано оваа платформа ја градиме за да ни трае во наредните дваесет, педесет години, да се надградува, да расте. И ќе биде тешко, нема да биде лесно и многу предизвици ќе има, но јас сум сигурна дека ќе ја поминеме годината ако сите веруваме дека децата треба да имаат стимулирање и да имаат информации кои тековно ќе ги добиваат секој ден и да си го гледаат наставникот затоа што тоа е двонасочна комуникација што дава грижа“, рече министерката Царовска при посетата на ОУ „Даме Крапчев“ во општина Гази Баба.
Таа уште еднаш објасни дека за работа на платформата не се потребни уреди со некои посебни перформанси и дека таа работи и на телефон, и на таблет и на најслабиот компјутер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски – Кос: реформите поврзани со евроинтеграциите остануваат високо на домашната политичка агенда

Во рамки на дводневната работна посета на Брисел, министерот за надворешни работи и надворешна трговија, Тимчо Муцунски, денеска оствари средба со еврокомесарката за проширување на Европската Унија, Марта Кос.
Соговорниците ја нагласија силната поддршка за проширувањето на Унијата, и од страна на земјите членки и од страна на граѓаните на Северна Македонија – што го потврдуваат и наодите од последниот „Евробарометар“.
На средбата беше поздравен реформскиот пристап на Владата, особено исполнувањето на обврските од реформскиот процес и имплементацијата на Планот за раст. Муцунски нагласи дека реформите поврзани со евроинтеграциите остануваат високо на домашната политичка агенда, со силен фокус на владеењето на правото и борбата против корупцијата.
Изрази благодарност за личниот ангажман на еврокомесарката Кос во пристапниот процес, особено во контекст на нејзиното учество и поддршка на Самитот за Планот за раст, што неодамна се одржа во Скопје.
Соговорниците разменија мислења и за неодамнешното приклучување на државата кон СЕПА, како и за иницијативата за постепено укинување на роаминг трошоците помеѓу земјите од Западен Балкан и Европската Унија. Одлуката за оваа иницијатива се очекува на почетокот на 2026 година, како дел од бенефитите на постепената интеграција во Унијата.
На средбата се дискутираше и за актуелните регионални и глобални случувања, при што беше потврдена заедничката поддршка за Украина и заложбата за што побрзо постигнување на праведен и одржлив мир.
Македонија
Meџити: Мајка Тереза е една од најсветлите личности на човештвото

Првиот заменик-претседател на Владата и министер за животна средина и просторно планирање, Изет Меџити, заедно со делегации од Владата, Собранието и општините положи венец со свежо цвеќе на спомен-плочата во центарот на Скопје, посветена на албанската нобеловка Гонџе Бојаџиу – Мајка Тереза, по повод 115-годишнината од нејзиното раѓање.
По церемонијата, Меџити изјави дека на 115-годишнината од раѓањето на Мајка Тереза – Гонџе Бојаџиу, родена во Скопје, се сеќаваме на една од најсветлите фигури на човештвото – мисионерката на љубовта и добитничка на Нобеловата награда за мир.
„Таа нѐ научи дека величината не се мери со функции и моќ, туку со служење, посветеност и љубов кон другиот. Нејзината порака останува водилка за нашата политика и општество, да работиме за мир, правда и солидарност, без да заборавиме никого. Мајка Тереза ни остави света порака дека љубовта се мери преку делата што ги правиме“, изјави Меџити.
Тој вети дека се гради иднина во која Скопје повторно ќе биде препознаено во светски рамки како центар на висока култура, развиено образование, наука и технологија, со перспектива за младите и хуманизам.
Македонија
ДОМ: Самоуништување на природата, Дошница жртва на владината неодговорност

Зелената партија ДОМ остро реагира на одлуката на Министерството за животна средина да не ја стави реката Дошница под привремена заштита, иако врз нејзиниот слив се планира изградба на две мали хидроцентрали кои ќе ја доведат клисурата до еколошки колапс.
ДОМ ја оценува оваа институционална пасивност како политичка одлука за самоуништување на природните богатства и суров удар врз иднината на нашите граѓани и граѓанки.
„Министерството ги прикрива своите намери зад изговори дека „предлогот не е формално доставен“. Ова е безобразно игнорирање на алармот што дојде од експерти, биолози и невладини организации уште пред еден месец, кога побараа мораториум се’ додека не се заврши Студијата за валоризација на природните вредности. Сезонското пресушување на реката Дошница и најавеното дополнително исушување се директна последица од оваа неодговорност.
Веднаш да се воведе мораториум на сите активности поврзани со концесијата, да се затвори пристапот до локациите и да се прогласи привремена заштита на текот и околниот предел, во корист на идното заштитено подрачје „Демиркаписка клисура“. Без тоа, ендемичните видови, македонските риби и планинските инсекти се на пат кон неповратна деградација“.
Бараат итна изработка и усвојување на елаборат за мониторинг на биолошката разновидност и еколошкиот проток во Дошница, со јавни дебати и независни експерти.
Министерството, како што додаваат, да испрати јасна порака до концесионерот: без зелено светло за заштита, нема ни нови брани.
„Зелената партија ДОМ нема да молчи пред ова политичко насилство над природата. Ако не прекине оваа тенденциозна институционална воздржаност, ќе покренеме граѓански и правни активности за да ја спасиме Дошница од катастрофа. Природата не чека, ниту ние ќе го дозволиме нејзиното уништување.