Македонија
Иста фирма трета година по ред го доби тендерот за зимско одржување на патиштата
Тетовската фирма „НБ-ТРАНС СОМПАНУ ДОО“ трета година по ред го доби тендерот на Јавното претпријатие „Македонијапат“ за да ги одржува патиштата во зимски услови на сите магистрални и регионални патишта во Македонија за сезоната 2018/2019 година.
На Бирото за јавни набавки објавени се договорите на ЈП „Македонијапат“ со фирмата „НБ-ТРАНС СОМПАНУ ДОО“ во вредност од 60.228.065 денари или приближно 980 илјади евра. На е-аукцијата победила тетовската фирма затоа што понудила најниска цена.
Станува збор за чистење 45 делници меѓу кои Маврово – Дебар, Куманово – Скопје, Гостивар – Скопје, Страцин – Скопје, автопатот Петровец – Скопје… Договорите на 3 декември 2018 година ги потпишале директорот на ЈП „Македонијапат“, Гајур Кадриу од ДУИ, и Нуриман Ибиши, економскиот директор на тетовската фирма.
Друштво за транспорт, трговија и услуги „НБ-ТРАНС СОМПАНУ ДОО“ од 2016 година континуирано ги добива тендерите на Јавното претпријатие „Македонијапат“ за зимско одржување на патиштата во државата.
Во тендерот фирмата е обврзана, меѓу другото, да обезбеди механизација за чистење на снегот: багери-гасеничари, камиони, булдожери, натоварувачи, снегочистачи…
Управител на фирмата „НБ-ТРАНС СОМПАНУ ДОО“ е 54 годишниот Нуриман Ибиши, а сопственици на фирмата се Насер и Бурим Ибиши. Фирмата во 2017 имала приходи од 71 милиони денари, и нето-добивка истата година од 25 милиони денари. Тендери на оваа фирма ѝ доделила и Општина Тетово во 2015 и 2016 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одбиена тужбата на „Европскиот фронт“ за избирачкото место во Долнени
Управниот суд ја одби како неоснована тужбата од Коалицијата „Европски фронт“ на решението на Државната изборна комисија (ДИК) за прифаќање на приговорот од Коалицијата „Твоја Македонија” за избирачкото место 1470 во Долнени на Парламентарните избори 2024.
„Европскиот фронт“ поднесе седум тужби против решенија на ДИК на Парламентарните избори 2024.
Досега Управниот суд ja одби како неоснована и тужбата за избирачкото место 1194, во Општина Крушево.
Македонија
Мицотакис со предупредување: Ако некои веруваат дека можат да го игнорираат Договорот, треба да разберат дека нивниот пат кон Европа ќе остане затворен
Грчкиот премиер Киријакос Мицотакис уште еднаш ја предупредува Македонија дека прекршувањето на Договорот од Преспа, со кој се реши долгогодишниот спор за името меѓу двата соседа, ќе ги загрози амбициите на балканската земја за членство во ЕУ, пишува грчки „Катимерини“
Говорејќи од градот Верија во северна Грција за време на неговата кампања пред изборите за Европскиот парламент во јуни, Мицотакис изјави дека трите меморандуми за разбирање поврзани со договорот од 2018 година нема да бидат ратификувани од Парламентот се додека новото раководство во Скопје продолжи со прекршување на договорот.
„Ако некои веруваат дека можат да го игнорираат договорот, треба да разберат дека нивниот пат кон Европа ќе остане затворен, а меморандумите нема да бидат ратификувани освен ако не се почитува она што го предвидува договорот“, рече тој.
Македонија
Европски фронт: Скандалозен јавен политички притисок врз Управниот суд од страна на поразените на изборите
Европскиот фронт со голема загриженост ги проследи денешните скандалозни заканувачки изјави на лидерите на опозицијата кои загубија на претседателските и парламентарните избори кон Управниот суд, соопштија од оваа партија.
Европскиот фронт, како што велат, ги регистрирал заканитеи ја известил целата меѓународна заедница и сите локални и меѓународни институции за јавните изјави со закани како и обидот за изборен инженеринг со надворешно-институционални меѓупартиски договори за гласање и надгласување во Државната изборна комисија, како и со партиски притисоци до управниот суд.
Според нив, таквиот обид за изборен инженеринг има за цел да го промени односот на бројките во Собранието преку политички договор на маса.
„Со политички договори и монструозен антидемократски план, изготвен во партиските штабови на ВМРО, СДСМ и Влен, се прави обид да се наруши волјата на граѓаните.
Седницата на Државната изборна комисија беше скандалозна демонстрација на прегласување и суспендирање на принципите на Охридскиот договор.
Ги повикуваме сите институции да постапат согласно Законот, без партиски или политички директиви од која било партија и да го заштитат кредибилитетот на изборниот процес до крај, без да се стави никаква дамка на волјата на граѓаните изразена на изборите“, реагираат од Европскиот фронт.