Топ
Приведен разбојник во Скопје, со употреба на сила од вработена во продажен објект одзел производи
Полицијата приведе 31-годишен скопјанец кој со употреба на сила одзел производи од продажен објект во Драчево, информира МВР.
„На 19.07.2024 во 12.20 часот, полициски службеници од Полициската станица Драчево го лишиле од слобода Д.Р.(31) од Скопје поради сомнение дека извршил кривично дело „разбојничка кражба“ по член 238 од Кривичниот законик. Тој бил фатен веднаш по извршување на делото во продажен објект на подрачјето на Драчево во Скопје, од каде со употреба на сила од вработената одзел производи. Откако бил приведен во полициска станица агресивно се однесувал и упатил закани кон полициски службеник кој извршувал службени дејствија“, велат од Министерството за внатрешни работи.
Одземеното било пронајдено и вратено на сопственикот, а лицето било задржано во полициска станица.
По целосно документирање на случајот, против него ќе биде поднесена соодветна пријава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
По несреќата во која загинаа татко и син, нареден инспекциски надзор над работите на автопатот Скопје-Куманово, издадено решение за итно запирање
По наредба на јавен обвинител, инспектор за патишта од Државниот инспекторат за транспорт изврши вонреден инспекциски надзор над градежните работи што ги изведува правно лице на автопатот А2, клучка Хиподром-наплатна станица Миладиновци, каде во сообраќајната несреќа која се случи на 2 септември автомобил „Мерцедес“ удри во товарно возило, сопственост на правното лице ангажирано на проектот, при што животот го загубија возачот на автомобилот „Мерцедес“ и неговиот малолетен син, велат од Обвинителството.
По надзорот, изготвен е записник и донесено е решение со кое се задолжува правното лице веднаш да ги запре сите градежни работи до добивање на одобрение од надлежен орган за времена измена на режимот на сообраќај за изведување работи на левата – брза сообраќајна лента. Во меѓувреме, правното лице треба да постави и одржува времена вертикална и хоризонтална сообраќајна сигнализација со која ќе овозможи безбедно и непречено одвивање на сообраќајот на автопатската делница.
Непосредно по тешката сообраќајна несреќа, Основното јавно обвинителство Скопје поведе постапка против две лица поради сомненија дека сториле кривично дело – Тешки дела против безбедноста на луѓето и имотот во сообраќајот. Проверките за целосно испитување на кривичната одговорност за настанот се во тек, а по краткотрајниот притвор од 48 часа, по предлог на јавниот обвинител, на двете лица им се определени мерки на претпазливост, соопшти Обвинителството.
Македонија
Муцунски разочаран: Еден од претседателите на историските комисии дејствува политички, кадровските промени се потребни
Премиерот Христијан Мицкоски и министерот за надворешни работи, Тимчо Муцунски, сѐ уште се консултираат за кадровските промени во составот на историските комисии со Бугарија и Грција, а во следните недели ќе биде донесена конечна одлука, која ќе биде објавена на владина седница.
Министерот Муцунски, одговарајќи на новинарски прашања, најави дека ќе има промени, но и одреден континуитет и на двете комисии.
„Факт е дека се потребни одредени кадровски промени, но не целосно за комисијата да има и континуитет. Имаме свои забелешки, би ги задржал за нас поради специфичноста на природата на работата на комисиите. Би дал совет – за да бидеме успешна држава, да го работиме она за што сме избрани. Да бидеме внимателни. Природата на овие позиции е таква што со мали гестови може да се предизвика сериозна штета на работата на нашата држава. Ние имаме обврска да креираме надворешна политика, а научниците да ја вршат својата работа поврзана со нивната научна дејност“, рече Муцунски.
Враќајки се наназад, министерот информира дека уште на почетокот на мандатот, разбирајќи го значењето на овие две комисии, инсистирал веднаш да се сретне со двајцата претседатели, амбасадорот Виктор Габер, кој раководи со комисијата со Грција, и професорот Драги Ѓоргиев, претседател на комисијата со Бугарија.
„Сметав дека имавме сосема коректни средби на кои тие споделија со мене некои информации за да добиеме некои информации што постигнале и на што понатаму треба да се работи. Поради специфичната природа на работата, не можеме сите работи да ги кажеме во јавност. Прилично сум изненаден што деновиве гледам еден научник, кој е ангажиран и доста коректно платен од страна на државата, како се обидува себеси политички да се профилира и додека е сѐ уште во тековен мандат како претседател на една од комисиите. И со тоа се поткопуваат позициите на државата. Разочаран сум од пристапот“, рече Муцунски.
На темата деновиве се осврна и премиерот Христијан Мицкоски, кој ги најави кадровските промени.
„Има некои идеи и размисли. На следната владина седница или по неа, ќе помине новиот состав на комисијата, која преговара со нашиот источен сосед, па и со нашиот јужен“, рече Мицкоски.
Според него, актуелните членови од македонската страна не ги оправдале очекувањата и не ги штителе националните интереси.
Заедничката мултидисциплинарна експертска комисија за историски и образовни прашања со Бугарија беше формирана во 2017 година по потпишувањето на договорот за добрососедство со Бугарија. Досега се усвоени препораки за заедничко чествување на Кирил и Методиј, Климент и Наум Охридски и на цар Самуил и пет препораки за измени во учебници во Македонија и Бугарија. Интердисциплинарната комисија на експерти за историски, археолошки и образовни прашања со Грција беше формирана со договорот од Преспа.
Македонија
Ваучер од 300 евра добија 1.777 работници со ниски примања, може да одат на одмор до декември
Првите десетмина работници со примања во семејството што не надминуваат 50.000 денари, денес, од министерот за економија и труд, Бесар Дурмиши, добија ваучери во вредност од 18.000 денари за одмор во домашни угостителски капацитети. Ваучери им се одобрени на вкупно 1.777 работници, а имињата се објавени на веб-страницата на Министерството за економија и труд. Одобрениот износ од 300 евра работниците ќе може да го искористат најдоцна до 1 декември во угостителски објекти за кои Министерството ќе објави список на 15 септември.
Мерката ја најави претходниот министер за економија, Крешник Бектеши, во февруари годинава, со цел да им се помогне на угостителите да имаат гости и по завршувањето на туристичката сезона, но и да им се овозможи одмор на семејствата со ниски примања.
Сегашниот министер Дурмиши извести дека интересот за оваа мерка бил голем.
„Интересот за оваа мерка беше многу голем и од страна на угостителите и од страна на пријавените. Со ова активност им помагаме на угостителите да може да остваруваат дополнителен приход надвор од туристичката сезона, а на работниците со ниски примања им овозможува да користат угостителски услуги во нашите туристички центри“, рече министерот Дурмиши.
Потврдите треба да се подигнат лично во Министерството за економија и труд со приложување документ за идентификација.