Инспекторите ги анализираат јавните набавки што ги вршел поранешниот директор на МНТ, Дејан Пројковски во периодот од 2015 до 2017 година, а веќе постојат сериозни елементи на кривичното дело „Злоупотреба на постапката за јавен повик, доделување на договор за јавнa набавкa или јавно – приватно партнерство.

По влегувањето на полицијата минатата недела, Макфакс дознава дека уметничкиот директор само за 2016 година склучил договори за јавни набавки кои се „под лупа“ со вкупна вредност од 25.165.250.000 денари, или приближно 409.191.000 евра.

Само за обезбедувањето за МНТ на годишно ниво, Пројковски платил 1.845.000 денари или околу 30.000 евра. За две години потрошил 60.000 евра, а за реализација на овие договори не бил поставен надзор за извршување на договорните обврски.

Инспекторите ги заинтересираа и договорите за одржување на хигиената кои според нив се незаконски склучувани, но и продолжувани без анекс. Освен што биле исплатени 40.000 евра за една година, на истата фирма по истекот на договорот и биле исплатени дополнителни 14.000 евра, без да постои било каков документ.

Договорот го склучил директорот Дејан Пројковски, а фактурите за периодот надвор од предметниот договор се доставувани и потпишувани од страна на в.д директор Драган Спасов – Дац.

Во наведената постапка околу реализација на договорот воопшто не е поставен надзорен орган, а од исказите на дел од вработените службени лица обемот на реализација на договорот за јавна набавка не е вршен согласно спецификацијата приложена во тендерската документација.

Во 2016 година директорот Дејан Пројковски со измена и дополнување на Статутот на МНТ создал дополнителна дејност подготовка и послужување на пијалоци. Отворил и подружница –БИФЕ МНТ кое обавувало трговска дејност, а како овластено лице се поставил самиот, односно е назначен Дејан Пројковски.

Од неговото отварање до денес има создадено вкупни обврски од околу 13.000,00 евра кон добавувачите. Во март годинава извршен е попис на производите во БИФЕ МНТ Скопје и констатирани се состојби на неодговорно работење со производите, односно со изминат рок, недостаток на испорачани производи, производи кои ги нема на листата на набавки, поради што по вештачењето ќе биде иницирана постапка за утврдување на одговорност за незаконското и несовесно работење со подружницата.

За услугите за превоз на лица и опрема на годишно ниво Пројковски исплатил околу 50.000 евра, а двојно помалку се одлеале на услугите за хотелско сместување за кои на годишно ниво се трошени средства во висина од околу 1.500.000 денари или околу 25.000 евра.

Резервацијата на авио – билети годишно МНТ ја чинело прескапи 50.000 евра.

И овде има сомнеж за злоупотреби на постапките за јавни набавки и тоа во делот на услугите за превоз на лица и опрема каде се утврдени енормно високи цени за превоз на лица и опрема во и надвор од државата кои се далеку повисоки од вообичаените цени на пазарот, додека во делот на услугите за резервација на авио-билети е злоупотребена можноста преку годишниот план за јавни набавки да се фаворизира одредена агенција. Утврдено е дека се трошени средства за авио-билети по цени далеку повисоки од вообичаените цени на пазарот.

Има сомневање дека е вршено и ненаменско трошење на средства за јавна набавка на услуги за одржување на системи (сценски системи, сценско осветлување, БМС Систем и автоматика и сл.) , за чија реализација МНТ Скопје располага со соодветен стручен кадар. Само по овој основ има сомневања дека се ненаменски трошени по околу 32.000 евра на годишно ниво.

Ова се само дел од сомнителните ставки за јавните набавки што ги потпишувал Пројковски.

„Моменталните обврски на МНТ кон добавувачи врз основа на претходно склучени договори за јавни набавки на стоки и услуги и обврските за комуналии надминуваат износ од 9.225.000 денари, односно од 150.000 евра и се уште пристигнуваат доспеани обврски по основ на неисплатени фактури за извршени услуги“, изјави за Макфакс адвокатот Жарко Стевовски.

Предмет на детална анализа се договорите склучувани со надворешни фирми и физички лица од кои театарската куќа речиси и немала потреба, бидејќи стручен кадар и лица за истата работа има на редовниот платен список на МНТ. Од тука е интересот да се испита кој и зошто се плаќал, и каде завршувале тие пари.

Големиот долг кој го открила актуелната директорка Симона Угриновска бил и причината да се направи детален увид во работата на поранешниот директор Пројковски.

Како што објави Макфакс, лавината од сомнежи за злоупотреби во МНТ беше покрената по оставката на претседателот на Управниот одбор, режисерот Александар Поповски во јули годинава. Тој беше дециден дека мора да се направи ревизија на состојбите бидејќи новото раководство поради низата неправилности не може да ја извршува работата.