Свет
Реконструкција на катастрофата: како се случи експлозијата во Бејрут што го шокираше светот
Силата на експлозијата што ја зафати либанската престолнина го шокираше светот. Повеќе од 300.000 луѓе останаа без покрив над главата, а најмалку 130 загинаа, додека илјадници се повредени во експлозијата во магацин со опасни материи во Бејрут.
Како дојде до експлозијата?
Околу 18 часот по локално време во вторникот, 4 август, жителите на Бејрут биле шокирани кога забележале голем пожар во пристаништето, чиј пламен бил видлив од далеку.
Првите извештаи зборуваат за послаби звуци на експлозија кои доаѓале од магацин во пристаништето, а чадот полека се кревал кон воздухот.
Се верува дека во магацинот имало пиротехника, а беа објавени и видеа од местото на настанот кои ги прикажуваат пламените во различни бои. Се претпоставува дека првата мала експлозија се случила таму. Пожарот можел да избувнал поради пиротехнички средства и други експлозивни материи.
Некаде 30 секунди по првата експлозија, се случил огромен бран експлозии коишто го уништија половина од градот. Над градот се кренал огромен портокалова облак од чад. Некои стравувале дека се случила нуклеарна експлозија.
Бранот се раширил побрзо од брзината на звукот и уништил сè што се нашло пред него. Бил видлив со километри оддалеченост.
Фотографот кој ги снимил овие моменти се наоѓал на 2 километри од местото каде што се случила експлозијата. Најмногу е погодена областа во близина на пристаништето. Откорнати се покривите на магацини на стотици метри во сите правци. Во бетонските згради околу пристаништето направени се дупки. Експлозијата со разорна моќ урнала балкони, превртела автомобили, прозорците ги претворила во пепел во околината на магацинот. Стакло паѓало врз жителите кои излегле на улиците.
Експлозијата направила и голема дупка во земјата. Таа била со јачина како градот да го погодил земјотрес со јачина од 3,5 степени според Рихтеровата скала.
Сомнежи околу експлозијата
Многумина најпрво се сомневале дека експлозијата е поврзана со растечките тензии меѓу Израел и милитантната група Хезболах. Потоа, околу 20:30 часот по локално време, началникот на либанската внатрешна безбедност, Абас Ибрахим, изјави дека експлозијата се случила во делот на пристаништето каде што се пронајдени експлозивни материи, кои биле одземени од брод пред некое време и се чувани во магацин.
Сомневањата потоа се насочиле кон складиштата со жито каде што се чувала пченицата откако пристигнала во пристаништето. Силос кој е уништен во близина на местото на експлозијата, наводно, содржел 85% од резервите на жито во Либан, стратешки резерви на храна во земјата, којашто е опустошена од економскиот пад.
Подоцна беше објавено дека стаува збор за високоексплозивен материјал од околу 2.700 тони амониум нитрат, којшто се користел за правење бомби, а бил складиран откако бил запленет на брод во 2013 или 2014 година.
Многу експерти велат дека има знаци дека амониум нитратот ги предизвикал поголемите експлозии.
Локалните медиуми објавија дека либанскиот главен град изгледа како да го погодила најлошата апокалипса. И додека истрагата за тоа што точно се случило сè уште трае, експертите велат дека можело да биде и полошо.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Uncategorized
Иран воведе санкции кон САД и Велика Британија поради поддршката кон Израел
Иранските власти денеска објавија дека воведуваат санкции против неколку американски и британски поединци и субјекти поради нивната поддршка на Израел во војната против палестинското движење Хамас во Појасот Газа.
Иранската дипломатија соопшти дека санкциите се однесуваат на седум Американци, меѓу кои и генералот Брајан Фентон, шеф на командата за специјални операции и вицеадмиралот Бред Купер, поранешен шеф на американските поморски сили на Блискиот Исток.
Од британските функционери и субјекти цел на санкциите се министерот за одбрана Грант Шапс и британската кралска морнарица во Црвеното Море.
Санкции беа најавени и против американските компании „Локид Мартин“ и „Шеврон“ и британските компании „Елбит системс“, „Паркер Мегит“ и „Рафаел УК“.
Иранското Министерство за надворешни работи додаде дека санкциите вклучуваат „блокирање на сметки и трансакции во иранскиот финансиски и банкарски систем, блокирање на средства под јурисдикција на Иран, како и забрана за издавање визи и влез на иранска територија“.
Влијанието на овие мерки врз поединци или субјекти, како и врз можните средства или трансакции со Иран, сепак, останува неизвесно.
Од почетокот на војната во Појасот Газа, предизвикана на 7 октомври со нападот на палестинското исламистичко движење Хамас на израелска територија, нагло се зголемија тензиите меѓу Израел од една страна и Иран и неговите сојузници, особено либанскиот Хезболах, од друга.
Ситуацијата се вжешти на 13 април, кога Иран изврши напад врз Израел, со 350 беспилотни летала и проектили, од кои повеќето беа пресретнати со помош на САД и други земји.
Иранските власти тогаш објавија дека дејствувале во „самоодбрана“ по смртоносниот напад што му се припишува на Израел врз иранскиот конзулат во Дамаск на 1 април.
Свет
Нетанјаху: Ако Евреите не се заштитат самите, никој нема да ги заштити
Евреите мора да бидат способни да се „одбранат“ бидејќи никој нема да ги заштити, изјави денеска израелскиот премиер Бенјамин Нетанјаху, додека се повеќе се креваат гласови против војната што Израел ја води во Појасот Газа.
„Ако треба да се браниме, ќе се браниме. Ако е можно да се мобилизираат „оние што не се Евреи“, тоа е добро. Но, ако не се заштитиме, никој нема да го направи тоа“, рече Нетанјаху.
Премиерот ова го изјави на приемот на преживеаните од нацистичкиот геноцид кои во недела ќе учествуваат на церемонијата на Денот на сеќавањето на Холокаустот во меморијалниот центар Јад Вашем.
Разорната војна што Израел ја започна во Појасот Газа како одмазда за нападот на палестинското движење Хамас на 7 октомври во Израел предизвикува зголемени критики ширум светот.
Осврнувајќи се на студентското движење во знак на солидарност со Палестинците во градовите на американските колеџи, Нетанјаху рече дека ги осудува „страшните демонстрации на антисемитските орди кои повикуваат на уништување на Израел и ги напаѓаат еврејските студенти и професори“.
Нетанјаху, исто така, се соочува со отворено меѓународно противење на неговата намера да започне голема офанзива врз градот Рафах, во јужниот дел на Појасот Газа.
Тоа е засолниште за еден и пол милион Палестинци, од кои огромното мнозинство се раселени поради војната, додека израелските власти сметаат дека градот е последното упориште на борците на Хамас.
Свет
Трамп: Погледнете ги Лондон и Париз, тие се непрепознатливи
Поранешниот американски претседател Доналд Трамп изјави за време на предизборниот митинг во Висконсин дека Лондон и Париз се „непрепознатливи“, пренесува „Politico“.
„Видовме што се случи кога Европа ги отвори вратите за џихад. Погледнете го Париз, погледнете го Лондон. Тие се непрепознатливи“, рече Трамп, кој ќе се кандидира за нов мандат во Белата куќа на претседателските избори во ноември годинава.
„Ќе влезам во многу проблеми со луѓето во Париз и луѓето во Лондон, но знаете што, тоа е факт. Тие се непрепознатливи и не можеме да дозволиме тоа да и се случи на нашата земја. Имаме неверојатна култура, традиција. Не можеме да дозволиме тоа да се случи овде и никогаш нема да дозволам да им се случи на Соединетите Американски Држави“, рече тој.
Трамп често ги критикуваше европските земји. Во декември 2015 година, набргу откако Париз беше погоден од смртоносен исламистички терористички напад, тој рече дека населбите во Париз и Лондон се толку опасни што полицијата одбила да оди таму. Во тоа време, Трамп го бранеше својот план „целосно да им забрани на муслиманите да влезат во САД“.
И покрај тоа што беше критикуван за тие забелешки, Трамп продолжи да ја брани својата позиција. „Вистинскиот Париз е различен од Градот на светлината за кој читате. Има области во Париз каде луѓето се толку радикализирани и толку злобни, што полицијата одбива да оди таму. Тие нема да одат таму. Тоа ќе се случи на нашата земја“, предупреди тој.
Во јануари 2016 година тој изјави дека животот во Брисел е како да живееш во „пекол“ поради недостаток на „асимилација“ на муслиманското население.