Македонија
Годинава речиси секој ден исчезнува по еден човек
Пронајденото мртво тело на 35-годишниот Горан Атанасовски од Скопје, кој вчера беше пријавен за исчезнат, ја вознемири јавноста. Коментарите во јавноста се дека состојбата е алармантна и се упатуваат повици до Министерството за внатрешни работи да преземе конретни чекори за да ги открие причините како и зошто сè почесто исчезнуваат луѓе. За еден месец од почетокот на 2019 година до почетокот на февруари, во Министерството за внатрешни работи 24 лица биле пријавени за исчезнати, од кои пронајдени се 20, а по четири лица сè уште се трага. На социјалните мрежи постојано се споделуваат фотографии од исчезнати лица, а семејствата бараат помош од сограѓаните за да се пронајдат нивните блиски.
Според податоците што „Макфакс“ ги доби од МВР, во 2017 година за исчезнати биле пријавени 217 лица, а бројот се зголемил во 2018 година кога полицијата трагала по 246 лица. МВР не даде информации колку лица биле пронајдени живи, а колку мртви, но и за тоа која била причината за нивното исчезнување.
Освен Атанасовски, кого полицијата го пронајде мртов во бездна во Нерези, вчера за исчезната беше пријавена и 62-годишна жена од Ѓорче Петров. Претходно, со денови се трагаше по 39-годишната медицинска сестра Даниела Пецевска, мајка на три деца, која пред четири дена беше пронајдена мртва во водите на Вардар.
Помош и информации од јавноста и МВР веќе 73 дена, или два и пол месеца, колку што се трага по нејзиниот син, бара Маја Трпковска, мајка на исчезнатиот 26-годишен Пинета Секондо. Трпковска за „Макфакс“ вели дека е разочарана од МВР оти досега нема никакви информации за истрагата, а инспекторите ѝ се развикале на телефон. Таа вели: „Јас ним им давам информации, а не тие мене“.
„Потресена сум. Додека го барам моето дете, јас ги барам и другите исчезнати. Последно се слушнав со ќерката на Алибен Абдул, кој е исчезнат. Секое крпче што ќе го најдам, јас гледам дали може да биде од моето дете или од другите луѓе. Премногу револтирана и разочарана од МВР и Секоторот за исчезнати лица. Јас како мајка сакам да се јавам и да ми дадат информација, а тие ми го блокираа телефонот за да не ги барам. Инспекторите ми викаат на телефон. Дете бараме, не бараме маче. Јас ним им давам информации, тие мене не. Затоа сум револтирана. По 73 дена, јас одам по гатачи, луѓе со божја сила, за да ми кажат еден збор. МВР не ми одговора. Не знам веќе кого да барам“, вели мајката на Пинета, Маја Трпковска.
Исчезнат веќе 21 дена е и Алибен Абдул, кој последен пат е виден на почетокот на овој месец, а ќерка му очајно моли за каква било информација за да го пронајде татка си. Таа вели дека во периодот од кога исчезнал татко ѝ, контакт со инспекторите имала само двапати.
„Контактот со МВР е сведен тие да ни се јават кога ќе имаат трага, знак, клучен момент. Досега ни се јавиле само два пати во овие 21 ден. Од наша страна се правени известувања доколку имаме дојави, да ги известуваме. Во меѓувреме немаме секојдневен контакт. Не знам колку од работата им е покриена, какви докази и информации собрале бидејќи, кога ќе ги прашаме, велат дека поделена им е работата со колегите и не даваат информација. Не знам што провериле, што направиле. Не знам каква заднина има во случајот со татко ми бидејќи тој од дома е излезен без лична карта, телефон, документи“, вели Мелиса Абдул, ќерка на исчезнатиот Алибен Абдул.
Според податоците што „Макфакс“ ги доби од МВР, во 2015 година биле исчезнати 297 лица, од кои 284 се пронајдени. Во 2016 година пријавени се 230 лица, од кои пронајдени се 210, а активни потерници има за 20 лица. Една година потоа бројот на исчезнати се намалил на 217 лица, а МВР успеало да пронајде 183 од нив, а се бараат 34 лица. Во 2018 година се зголемил бројот на 246 исчезнати лица, полицијата пронашла 204, а активни потерници има за 42 лица.
За идниот понеделник пред Собранието ќе се организира мирен протест со слоган „Што се случува во Македонија“ од страна на мајката на исчезнатиот Пинета Секондо и неговите другари. Преку протестот ќе се побараатг ажурност од институциите и одговори за исчезнатите лица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Силјановска се заблагодари за честитката од ЕУ: Со нетпрение очекувам да ја продолжиме соработката
Силјановска Давкова се заблагодари за честитката од ЕУ и порачува дека со нетпрение очекува да ја продолжам соработка со Европската Унија за конечно заокружување на европската интеграција на целиот регион.
„Денеска, како избрана претседателка, добив официјално соопштение од Европската Унија со кое ми се честита победата на изборите. Темелот на мојата на кампања беше градењето на консензус помеѓу сите политички партии во Собранието, како од власта, така и од опозицијата, граѓанското општество и македонските граѓани, независно од нивните разлики. Нашиот клучен стратешки проект е европската интеграција и истата останува да биде темел за градењето на консензус помеѓу различните чинители во општеството. Потенцирам дека под мое водство нашата надворешна политика ќе продолжи да биде целосно усогласена со заедничката надворешна и безбедносна политика на Европската Унија. Со нетпрение очекувам да ја продолжам соработка со Европската Унија за конечно заокружување на европската интеграција на целиот регион“, се наведува во соопштенеито испратено од тимот на Гордана Силјановска Давкова.
Европската унија и честита на Гордана Силјановска Давкова за нејзината победа на претседателските избори во Македонија и со нетрпение очекува да работи со првата жена лидер во земјата, изјавија високиот претставник на ЕУ за надворешни работи и безбедност Жозеп Борел и европскиот комесар за проширување и соседска политика Оливер Вархеи.
Борел и Вархеи, во заедничката изјава објавена по повод вториот круг од претседателските и редовните парламентарни избори во Северна Македонија, ги охрабрија „релевантните политички актери да работат на формирање парламент и стабилна влада“.
Македонија
(Видео) Стоилковски го поздрави лидерот на ДУИ јадејќи бисквита: „Поздрав, Али“
Портпаролот на ВМРО-ДПМНЕ, Наум Стоилковски, на социјалните мрежи објави видео во кое, јадејќи бисквита го поздрави лидерот на ДУИ, Али Ахмети.
Стоилковски вели дека оди на состанок со коалициските партнери на ВМРО-ДПМНЕ, а потоа зема бисквита и почнува да ја јаде.
„Поздрав, Али“ , вели Стоилковски.
Стоилковски алудира на изјавата на Ахмети која тој ја даде од митингот на „Европскиот фронт“ во Скопје пред одржувањето на првиот круг од претседателските избори кога рече оти лидерот на ВМРО-ДПМНЕ е израснат со бисквити и гурабии.
Македонија
ЕУ: Очекуваме соработка со претседателката на Македонија, парламентот и владата за да работиме на европскиот пат
Европската унија и честита на Гордана Силјановска Давкова за нејзината победа на претседателските избори во Македонија и со нетрпение очекува да работи со првата жена лидер во земјата, изјавија високиот претставник на ЕУ за надворешни работи и безбедност Жозеп Борел и европскиот комесар за проширување и соседска политика Оливер Вархељи
Борел и Вархеи, во заедничката изјава објавена по повод вториот круг од претседателските и редовните парламентарни избори во Северна Македонија, ги охрабрија „релевантните политички актери да работат на формирање парламент и стабилна влада“.
„Двете институции треба да работат заедно на подобрување на европскиот пат на Северна Македонија, кој вклучува имплементација на клучните реформи, особено во областа на владеењето на правото и борбата против корупцијата, во интерес на сите нејзини граѓани“, се вели во заедничката изјава на Борел и Вархеи.