Македонија
Филипче: Досега 35 лица се заболени со коронавирус, се тестираат уште 30

Вкупно 35 заболени и нови 30 теста моментно се на анализа во Институтот за јавно здравје, информира минситерот за здравство, Венко Филипче, на последната прес-конференција. Тој вели дека лицата што се тестираат на коронавирус немаат симптоми и се дел од скринингот што претходно го најави.
„Се прават анализи на 30 лица, едно од Куманово, две од Скопје и другите 17 се од Дебар и околината, а по скринингот, односно индикацијата за тест. Станува збор за лица што немаат симптоми, но е можно да бидат во контакт со некој од заболените. Ние имавме разговор со нашиот инфектолог, како и локалните инфектолози и тие имаат алгоритам по кој постапуваат“, рече Филипче.
Тој посочи дека вчера доцна вечерта се дијагностицирани уште 4 пациенти позитивни на вирусот. Состојбата на сите им е стабилна и со лесна клиничка слика.
„Вкупната бројка е 35. Вчера доцна вечерта се изработија резултати на уште 4 пациенти, кои беа во врска со претходно дијагностицирани, како групата од вчерашниот ден, која беше последно дијагностицирана, а врз основа на епидемиолошките резултати што тие ги дале при анкетирањето. Сите се со лесна клиничка слика, стабилна им е ситуацијата на сите пациенти што се на Клиниката за инфективни болести, како и на пациентите од Дебар, но и на пациентката што е на респираторна машина“, додаде Филипче.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова-Бегај: Членките на ЕУ сакаат многу брзо да го видат регионот во рамките на Унијата

Претседателката Гордана Сиљановска-Давкова на маргините на состанокот на земјите учеснички во „Процесот Брдо-Бриони“, оствари средба со претседателот на Република Албанија, Бајрам Бегај, на којашто го поздрави напредокот на земјата во процесот на интеграцијата во ЕУ и отворањето на петтиот од вкупно шесте кластери.
Соговорниците разговараа за досегашниот тек на преговорите меѓу Албанија и Унијата и начинот на нивното менаџирање.
Претседателот Бегај истакна дека дел од земјите членки на Унијата сакаат многу брзо да го видат регионот во рамките на ЕУ. Тој изрази подготвеност за помош и поддршка во процесот на македонската евроинтеграција, додавајќи дека членството во ЕУ гарантира владеење на правото, заштита на човековите права и јакнење на демократскиот капацитет.
На средбата, обајцата ја повторија потребата од негувањето на меѓусебното партнерство на мултилатерален план. Истовремено, се согласија дека треба да се прошири и продлабочи соработката на сите полиња.
Македонија
Утре, без вода делови од скопски Аеродром

Од ЈП Водовод и Канализација известуваат дека утре ( Вторник ) поради уличен дефект на 3-та Македонска Бригада бб, прекинато водоснабдување ќе имаат објектите на Вива, Метро, Центро, Спорт М и Форд.
Водоснабдувањето ќе биде прекинато од 08:00 часот до завршување со санација на дефектот. (општина Аеродром )
Македонија
Азири: Дали Османи прави било што во својата политичка кариера ако нема личен ќар за себе или за неговите најблиски

На денешната прес-конференција, портпаролот на Локалниот штаб на „Вреди“ во Чаир, Сабри Азири, беше пред гинеколошката болница “Мајка Тереза“ во Чаир.
„На минатата прес конференција објавивме дека Бујар Османи, на државни функции поминал вкупно 3.672 дена или 10 години и 22 дена. Во тој долг период, учинокот на Бујар Османи за жителите на Чаир изгледа вака: Нула денови за чаирчани, но два дена со Сергеј Лавров во Скопје. Нула денови за чаирчани, но цела недела со Никола Груевски во Будимпешта. Нула вработувања за чаирчани, но затоа сопруга вработена во АЕК, сестра во М-НАВ и развиен бизнис за неговиот брат“.
Според Азири иронијата е во тоа што, наместо чаирани да добијат модерна гинеколошка болница и подобра здравствена услуга, тие добија уште еден симбол на корупцијата.
„Меѓутоа, на таа прес-конференција испуштивме еден проект кој е заштитен знак на неговата кариера како министер за здравство, а е директно поврзан со Чаир. Тоа е фамозниот проект за реконструкција на гинеколошката болница „Мајка Тереза“, во Чаир, чиј епилог заврши со коруптивен скандал познат како “Пациент“, за злоупотреби во вредност од над 21,6 милиони денари или околу 350 илјади евра. Иронијата е што наместо Чаирчани да добијат современа гинеколошка болница и подобра здравствена услуга, тие добија уште еден симбол на корупција. Наместо објект што ќе им служи на мајките и децата, Чаир остана со недовршен проект и со дамка која до денес го следи”, истакна Азири.
Тој постави и дилема дали Бујар Османи направил нешто во неговата кариера, имајќи предвид дека со децении не ветил ништо, а денес им ветува проекти на жителите на Чаир.
„Само од овој предмет логично се наметнува дилемата – Дали Бујар Османи прави било што во својата политичка кариера ако нема личен ќар за себе или за неговите најблиски? Со кој образ денес Бујар Османи им ветува проекти на жителите на Чаир, кога тогаш, кога имаше цела деценија во централната власт, буквално не мрдна со прст за своите сограѓани?
Жителите на Чаир не забораваат. Точно знаат кој е навистина со нив цело време, а кој доаѓа кај нив само пред избори. На 19 октомври Бујар Османи ќе биде пациентот на гласачите на Чаир, кои масовно ќе му ја отворат излезната врата од политиката”, нагласи Азири.