Свет
Њујорк и Мичиген ги забранија ароматизираните електронски цигари

Њујорк е првата сојузна американска држава која забрани продажба на ароматизирани електронски цигари по речиси 400 случаи на сериозни болести поврзани со употреба на овие производи. Единствените вкусови што ќе може да се купат ќе бидат тутун и ментол, јави Си-ен-ен.
Службата за јавно здравје во Њујорк ја одобри забраната по препорака на гувернерот Ендрју Куома.
„Не може да се одрече дека компаниите намерно користат вкусови на гуми за џвакање и шеќерна волна за да ги придобијат младите луѓе да користат електронски цигари“, рекол тој. „Ова е криза на јавното здравје и денеска ѝ доаѓа крајот“, додал Куома.
Забраната стапува веднаш во сила, а ќе трае 90 дена и ќе биде потребно нејзино обновување.
Сојузната држава Мичиген исто така одобри забрана на продажба на е-цигари со вкусови, но мерката сè уште официјално не е стапена во сила.
Забраната во Мичиген исто така опфаќа опишување на овие производи како чисти, безбедни, безопасни и здрави, како и нивно рекламирање во близина на продавници за слатки, храна и за безалкохолни пијалаци.
Американските центри за контрола на болести и превенција активираа итни мерки по растечкиот број пациенти со болести на белите дробови за кои се виновни електронските цигари. Претходно, и американскиот претседател, Доналд Трамп, препорача државите да ја забранат употребата на ароматизираните е-цигари.
Во САД има речиси 400 потврдени и сомнителни случаи на болести поврзани со употреба на е-цигари, вклучувајќи најмалку шест смртни случаи.
Електронските цигари се продаваат како побезбедна опција за обичните цигари. Американските санитарни служби го предупредија најголемиот производител на е-цигари ЈУУЛ да не ги употребува овие тврдења затоа што не се докажани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
(Видео) Силен земјотрес од 8,8 степени во Русија предизвика цунами, Јапонија и Хаваи наредија евакуација

Силен земјотрес со интензитет од 8,8 степени што го погоди рускиот Далечен Исток предизвика цунами, а Јапонија и Хаваи наредија евакуација.
Земјотрес со интензитет од 8,8 степени според Рихтеровата скала го погоди градот Петропавловск на Камчатка, а според првичните извештаи, има повредени, објавија руските медиуми. Првиот бран цунами ги погоди Курилските острови, а цунами високo 3-4 метри го погоди полуостровот Камчатка.
Гувернерот на регионот Сахалин, Валери Лимаренко, изјави дека жителите се евакуирани на повисоки места додека заканата од нови бранови целосно не помине.
Предупредувања за цунами и евакуација беа издадени и за Јапонија, Хаваи, Западниот брег на САД и други земји од Пацификот, објави АП.
Американскиот систем за предупредување од цунами, исто така, издаде предупредување за „опасен бран цунами“ за следните три часа. Бранови високи над три метри се можни по должината на некои брегови на Русија и Еквадор, додека бранови високи од 1-3 метри се можни во Јапонија, Хаваи, Чиле и Соломонските Острови, се вели во соопштението.
Тлото не се смирува, а по земјотресот се регистрирани и последователни потреси во истата област.
Свет
Израел со одговор на Британија: Промената на ставот го наградува Хамас и им штети на мировните напори

Министерството за надворешни работи на Израел реагираше на најавата на Велика Британија дека ќе ја признае Палестина доколку Израел не преземе конкретни чекори кон прекин на конфликтот во Газа и обновување на мировниот процес што води кон решение за две држави.
„Промената на ставот на британската влада во овој момент, по францускиот потег и внатрешниот политички притисок, претставува награда за Хамас и им штети на напорите за постигнување прекин на огнот во Газа и рамка за ослободување на заложниците“, се вели во соопштението на израелското Министерство за надворешни работи на X.
Британскиот премиер Кир Стармер го објави потенцијалниот потег неколку дена откако францускиот претседател Емануел Макрон изјави дека Париз ќе ја признае палестинската држава на Генералното собрание на Обединетите нации во септември.
Во официјалното соопштение од Даунинг стрит се наведува дека признавањето на Палестина е „неотуѓиво право на палестинскиот народ“ и дека ставот на британската влада отсекогаш бил дека признавањето ќе биде дел од поширокиот мировен процес, според медиумите.
Сепак, се наведува дека поради „сè понеподносливата ситуација во Газа и намалената надеж за мировен процес“, сегашниот контекст бара порешителна акција.
Стармер истакна дека признавањето ќе следи ако израелската влада не се согласи на итен и траен прекин на огнот, јасна посветеност на мировен процес што води кон решение за две држави и недвосмислена посветеност дека нема да има анексија на територија на Западниот Брег.
Тој, исто така, повтори дека „нема еквивалентност меѓу Израел и Хамас“ и дека барањата на Велика Британија кон Хамас остануваат: ослободување на сите заложници, прифаќање на прекин на огнот, откажување од каква било политичка улога во идното управување со Газа и целосно разоружување.
Фото: принтскрин
Свет
Велика Британија: Ќе ја признаеме Палестина во септември ако Израел не се согласи со нашите услови

Велика Британија ќе признае палестинска држава во септември ако Израел не се согласи на прекин на огнот во Газа, не дозволи помош од ОН и не преземе други чекори кон долгорочен мир, објави британскиот премиер Кир Стармер, според светските медиуми.
Стармер свика редок летен состанок на кабинетот за да се разговара за ситуацијата во Газа.
Тој им рече дека Велика Британија ќе ја признае државата Палестина пред Генералното собрание на Обединетите нации, „освен ако израелската влада не преземе значајни чекори за да ја заврши ужасната ситуација во Газа, не постигне прекин на огнот, не вети дека нема да има анексија на Западниот Брег и не се обврзе на долгорочен мировен процес што ќе обезбеди решение за две држави“.
Тој исто така рече дека Хамас мора да ги ослободи сите заложници што ги држи, да се согласи на прекин на огнот, „да прифати дека нема да игра никаква улога во владата на Газа и да се обврзе на разоружување“. Во телевизиска изјава, Стармер рече дека неговата влада ќе го процени „степенот до кој страните ги исполниле овие чекори“ во септември пред да донесе конечна одлука за признавање.
Велика Британија долго време ја поддржува идејата за постоење на независна палестинска држава покрај Израел, но верува дека признавањето треба да дојде како дел од договореното решение за конфликтот.
Притисокот за формално признавање на палестинската државност се зголеми откако францускиот претседател Емануел Макрон објави дека неговата земја ќе стане првата голема западна сила што ќе признае палестинска држава.
Повеќе од 250 од вкупно 650 пратеници во Долниот дом потпишаа писмо со кое ја повикуваат британската влада да признае палестинска држава. Стармер истакна дека и покрај условите што ги поставил, Велика Британија верува дека „државноста е неотуѓиво право на палестинскиот народ“, пренесуваат агенциите.
Фото: принтскрин