Русија очекува САД и НАТО да ја препознаат одговорноста за ситуацијата во Авганистан, изјави рускиот министер за надворешни работи, Сергеј Лавров.

„Загрижени сме поради обидите на фактори надвор од регионот да станат активни околу Авганистан. Целосното обединување на напорите на земјите од регионот и земјите од НАТО е можно само доколку алијансата ја признае одговорноста за катастрофалниот исход од нејзиното воено присуство во Авганистан“, се вели во обраќањето на рускиот министер на 5. состанок за Авганистан, одржан во Казан.

Неговиот говор го прочита специјалниот претставник на рускиот претседател за Авганистан, Замир Кабулов.

Лавров посочи дека земјите од Западот нанеле непоправлива штета на народот на Авганистан и затоа мора да го понесат најголемиот товар за обнова на земјата во постконфликтниот период.

Министерот за надворешни работи, Бујар Османи, и амбасадорот на Обединетото Кралство, Метју Лосон, потпишаа меморандум за соработка за реализација на проектот за менторство и градење на капацитетите на Директоратот за НАТО и политичко-безбедносни прашања при Министерството за надворешни работи.

„Со денешното потпишување на меморандумот дополнително го зацврстуваме нашето сојузништво во рамките на НАТО и ја збогатуваме договорната рамка меѓу двете земји. Обединетото Кралство, како наш значаен сојузник и пријател, придонесува за натамошно зајакнување и развој на капацитетите на Министерството за надворешни работи, со цел уште поефикасно остварување на нашата политичка и координативна улога во врска со разни прашања врзани со членството на Северна Македонија во алијансата“, истакна Османи.

„Обединетото Кралство беше постојан партнер во поддршката на интеграцијата на Северна Македонија во НАТО. Овој проект е уште еден пример за континуираната поддршка на Обединетото Кралство за Северна Македонија како сојузник во НАТО, со цел развој на капацитетите и вештините за да може да продолжи да придонесува и да исполнува позначајна улога како членка на НАТО“, рече амбасадорот Лосон додавајќи дека донациите на Обединетото Кралство под формата на опрема, обезбедување инструктори за обука, упатување советници и учество во заеднички вежби придонесоа за исполнување на заедничката цел – обезбедување мир, стабилност и безбедност во регионот. Воедно, додаде дека овие напори се доказ за заложбите на двете земји за гарантирање на колективната одбрана и безбедност на НАТО.

Проектот е предвидено да трае до март 2024 година и преку упатување резидентен експерт се очекува да придонесе за вешто и високо компетентно учество на Министерството за надворешни работи и цивилните експерти во работата на структурите на НАТО. Дополнително, проектот треба да придонесе и за целокупната подготвеноста на нашите институции за обезбедување високо ефективен и ефикасен менаџмент на политичките улоги во областа на безбедносната политика и безбедносни прашања.

Министерката за одбрана, Славјанка Петровска, и словенечкиот министер за одбрана, Марјан Шарец, денеска, во Министерството за одбрана го потпишаа договорот за соработка во одбраната помеѓу Република Северна Македонија и Република Словенија.

Министрите Петровска и Шарец имаа тет-а-тет средба и билатерална средба со делегациите од двете држави по што следуваше и заедничка прес-конференција во Клубот на пратениците.

„Со задоволство го потпишавме новиот договор за соработка во одбраната помеѓу двете влади, што несомнено ќе придонесе во градењето на нашето пријателство и нашата соработка. Областите во кои ќе соработуваме се многубројни, но она што е најзначајно е дека преку реализацијата на овој Договор ќе придонесеме кон зајакнувањето на мирот, довербата, стабилноста и просперитетот во земјите од регионот, но и во целата евроатлантска област“, рече министерка Петровска.

Таа истакна дека двете земји заеднички придонесуваат во мултинационалните сили во Латвија со што јасно покажуваат дека не отстапуваат од заедничката цел, а тоа е безбедна Алијанса и сигурни граѓани. Петровска се заблагодари за континуираната словенечка поддршка во процесот на интеграција кон Европската Унија и за помошта да го изградиме заедничкиот европски мост.

„Македонската приказна во НАТО е успешна, но останува уште една стратешка цел која мораме да ја направиме да биде реалност. Благодарни сме за вашата неизмерна поддршка на патот на Северна Македонија кон ЕУ и за тоа што ни помагате да го изградиме овој заеднички европски мост“, рече Петровска.

Министерот Шарец порача дека е исклучително важно што ја продолжуваме соработката во меѓународните операции и мисии и што детектираме нови области во оваа област.

Заедничкиот придонес во мултинационалните сили на НАТО во Латвија, тој го нарече „успешна приказна“.

„Заедно даваме видлив придонес во сојузничката одбрана и одвраќање, додека истовремено ја зголемуваме подготвеноста и поврзаноста на нашите вооружени сили, што демонстрира една регионална димензија на соработка. Словенија одлучи да го продолжи своето воено присуство во Латвија и ние неизмерно го цениме вашиот придонес и вашата подготвеност да продолжите успешно да соработувате со нас во овој ангажман“, заклучи Шарец.