Uncategorized
Колонадата искршена, а за одржување на спомениците плаќаме по 36.000 евра месечно
Втор месец стои искршена колонадата „Независна Македонија“ на плоштадот Мајка Тереза пред Македонската опера и балет. Искршен е дел од плочките, а парчињата стојат расфрлани покрај колонадата. Град Скопје, во чија надлежност е одржувањето на спомениците од проектот „Скопје 2014“, вели дека за состојбата редовно ја информираат фирмата ангажирана за одржување на спомениците.
„Град Скопје има склучено договор со фирмата „Бетон“ за одржување објекти во централното градско подрачје во износ од 50 милиони денари за двегдишно одржување. Со договорот точно се предвидени сите објекти што се предмет на одржување и колонадата е дел од тие објекти. Одговорните за реализација на договорот од Град Скопје редовно ги регистрираат сите дефекти и доставуваат налог до ‘Бетон’ за интервенции“, велат од Град Скопје.
Според договорот објавен на Бирото за јавни набавки, друштвото за градежништво „Бетон“ АД Скопје во 2016 година е избрано во период од две години на Град Скопје да му дава услуги за поправка и одржување фонтани и спомен-обележја за 53 милиони денари или речиси 36.000 евра месечно.
Од Град Скопје не одговорија на прашањето дали ќе побараат одговорност од фирмата што ги одржува спомениците за тоа што колонадата два месеца стои искршена.
Колонадата е дел од спомениците за кои се врши анализа за евентуално преместување на друга локација.
„Град Скопје за дислокацијата го очекува ставот на комисиите што работат на истражување на состојбите на објектите од проектот „Скопје 2014“ и понатаму ќе постапи во согласност со законот“, велат од Градот.
Колонадата, која го доби името „Независна Македонија“, е меѓу последните објекти од проектот „Скопје 2014“. Нејзината изградба беше договорена во 2013 година во време кога градоначалник на општина Центар беше Владимир Тодоровиќ. Неговиот наследник Андреј Жерновски ги реализира договорите со објаснување дека евентуално раскинување ќе биде на штета на општинскиот буџет оти договорите не само што биле попишани туку фирмите и уметниците што работеле на колонадата веќе биле исплатени.
Изградбата чинеше 1,4 милион евра. Колонадата е висока 8 метри. Меѓу столбовите се поставени девет музи на уметноста излеани од бронза, а над крајните столбови има лавови. Автори на музите се Жарко Башески, Беди Ибрахим и Благоја Анѓелкоски, а лавовите се дело на Мирослав Славковиќ.
Градежните работи на колонадата ги изведе друштвото за градежништво „Бетон“ АД Скопје, кое од лани е задолжено и за одржување на спомениците, а скулптурите беа излеани во „РЖ – Институт Скопје“.
(М.И.П.)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Uncategorized
Заев и Ципрас му врачија на награда на Нимиц: „Ни порача да го чуваме и целосно да го имплементираме Преспанскиот договор“
Експремиерите Зоран Заев и Алексис Ципрас му ја врачија Наградата за мир Преспа на поранешниот медијатор Метју Нимиц, најавувајќи дека традиционално оваа награда ќе се доделува секоја година на денот кога се одбележува Преспанскиот договор.
„Нимиц имаше трпение повеќе од две децении од својот живот да посвети на барање решение за спорот за името. Со неговата поддршка и посветеност изградивме меѓусебна соработка и дојдовме до решение не само за името, туку отворивме порта за соработка за двете земји за подобра иднина на нашите народи, но и за иднината на регионот. Му благодарам на амбасадорот Метју Нимиц кој ни помогна да стигнеме до решение кое денес е модел за решавање многу спорови“, напиша Заев на социјалните мрежи.
Нимиц им порачал да го чуваат и негуваат Преспанскиот договор и целосно да го имплементираат.
Во Атина се одржа Меѓународна конференција за мир и одржлив развој, по повод шестгодишнината од потпишувањето на Преспанскиот договор.
Uncategorized
Средба на претседателот Африм Гаши со италијанскиот амбасадор Андреа Силвестри
Претседателот на Собранието на Република Северна Македонија, Африм Гаши, денеска оствари средба со Андреа Силвестри, амбасадор на Италијанската Репубика во РС Македонија.
Амбасадорот Силвестри му го честиташе изборот на Гаши за претседател на Собранието, како претседател избран со забележителен број гласови, посакувајќи му успешна работа и подвлекувајќи го демократскиот механизам на самиот избор. Притоа, му врачи честитка од претседателот на Италијанскиот сенат, Игнацио ла Русa, со желби за успех во натамошната работа.
Претседателот Гаши го запозна амбасадорот со тековните активности на законодавниот дом, претстојното формирање на комисиите и другите работни тела, и очекувањето за брзо формирање на новата Влада. Истакна дека како одговорен претседател ќе остане отворен за соработка со сите политички партии претставени во Собранието, бидејќи сите треба да работат за доброто на граѓаните и државата во целина. Во контекст на билатералната соработка меѓу двете земји, претседателот истакна дека високо ја вреднува соработката со пријателска Италија, земја силен поддржувач на РС Македонија на евроинтеграцискиот пат.
Амбасадорот Силвестри го информираше претседателот за постојните релации на планот на меѓупарламентарната соработка и изрази надеж дека успешната соработка ќе продолжи и во иднина по формирањето на пратеничката група во Собранието за соработка со Италијанскиот парламент. Беше споменато и неодамнешното одблежување на 30 години од воспоставените дипломатски односи меѓу Италија и Република Северна Македонија, при што амбасадорот му подари примерок од Публикацијата отпечатена по овој повод.
Двајцата соговорници разменија мислења за идната законодавна агенда, фокусот кон евроинтеграцијата на земјата и улогата на Собранието во тој процес, задржувањето на конструктивен и пријателски однос со сите соседи и градење на мостови на соработка со земјите од целот регион.
Uncategorized
Се обиделе да ограбат црква, па го нападнале клисарот: уапсени разбојници во Радовиш
Вчера во 13.30 часот во Радовиш, полициски службеници од Одделението за внатрешни работи Радовиш ги лишиле од слобода С.Р.(37) од Република Хрватска и А.К.(37) од Радовиш.
Тие се сомничат дека околу 07.30 часот од црква во Радовиш се обиделе да одземат пари, а откако биле забележани од клисарот во црквата, А.К. физички го нападнала, а С.Р. му се заканил со остар предмет, по што го напуштиле местото.
Во службен разговор во Полициската станица Радовиш тие го признале делото, по што биле задржани. За настанот бил запознаен јавен обвинител од Основното јавно обвинителство Струмица и по документирање на случајот против нив ќе биде поднесена соодветна пријава.