Кумановската полиција до надлежното Основно јавно обвинителство поднела кривична пријава против три лица поради сомнение за сторено кривично дело „злоупотреба на службена положба и овластување“. Станува збор за лицата А.А. (57) поранешен градоначалник на општина Крива Паланка, Л.З.(56) во својство на претседател на Управен одбор во детската градинка „Детелинка“ од Крива Паланка и Л.В. (39) во улога на вршител на должност директор на градинката.

Како што информираат од МВР, поранешниот градоначалник на општината во три наврати ја злоупотребил службената положба. Во првиот случај, А.А. попречил вршење  инспекциски надзор за утврдување одговорност на вработена воспитувачка во детската градинка „Детелинка“, по пријавен настан за малтретирање  дете и со тоа постапил спротивно од Законот за заштита на децата на незаконски начин.

Веднаш потоа, без објавување а оглас и без одлука на управниот одбор на градинката од Крива Паланка, ја разрешил поранешната директорка, која го пријавила споменатиот настан и на местото вршител на должност директор ја назначил Л.В. иако знаел дека таа немала лиценца за директор и немала работно искуство за вршење на функцијата. А.А. по вторпат ја злоупотребил службената положба кога по истекот на мандатот на Л.В. ѝ овозможил со поминат рок на решението да ја извршува функцијата уште два месеца, иако негова должност била три месеци пред истекот на мандатот да донесе одлука за распишување  оглас за избор на директор на градинката.

А.А. по третпат ја злоупотребил службената положба кога по одлуката на Управен одбор по распишан оглас за избор на директор на детската градинка била отфлена пријавата на Л.В. поради неисполнување на условите и наместо да го поништи  конкурсот и не ја прифати одлуката на Управниот одбор повторно да биде избрана поранешна директорка поради прикривање на пријавениот наста,н за што ѝ била разрешена, истиот повторно со решение ја поставил за директор на градинката.

Л.З., во својство на претседател на Управниот одбор во градинката, во два наврати ја злоупотребила службената положба и овластување на начин што го прифатила решението за избор на вршител на должност директор на детската градинка „Детелинка“ од Крива Паланка донесено од страна на А.А. иако знаела дека Л.В. не ги исполнува условите, а по истекот на мандатот од шесет месеци воопшто не го известила А.А. дека бил поминат рокот за вршител на должност на Л.В. Таа и по вторпат ја злоупотребила службената положба кога повторно без објавен јавен оглас и без одлука на Управниот одбор го прифатила решението со што на Л.В. ѝ било овозможено и понатаму да ја извршува оваа функција без соодветни квалификации и без лиценца за положен испит за директор.

Л.В., во својство вршител на должност директор на детската градинка „Детелинка“ од Крива Паланка, во периодот од 22и декември 2015 година сè до нејзиното разрешување на 4 август 2017 година, ја злоупотребила службената положба и овластување на начин што три месеци пред истекот на мандатот на 22 јуни 2016 година не го известила градоначалникот за денот на завршување на мандатот за да може да донесе одлука и Управниот одбор на градинката да распише јавен оглас за избор на директор. Л.В. ја извршувала оваа функција до 4 август 2017 кога со решение била разрешена поради неисполнети услови за директор по објавен оглас за избор на директор. На тој начин таа се стекнала со противправна имотна корист од 508.100 денари.