Унгарскиот парламент нема да гласа за кандидатурата на Шведска за членство во НАТО на седницата следната недела, според дневниот ред објавен денеска.

Шведска, која ја напушти долгогодишната политика на воена неутралност по руската инвазија на Украина, се надеваше дека формално ќе се приклучи на Алијансата на самитот на НАТО на 11-12 јули. Иако има силна поддршка од другите членки, како што се САД, сепак Турција и Унгарија досега ја блокираа ратификацијата на нејзиното членство.

Агнес Вадаи, претставник на опозициската партија Демократска коалиција, изјави за Ројтерс дека претставниците на владејачката партија Фидес и на демохристијанските партии, на состанокот на комисијата, не го поддржале предлогот прашањето да се вклучи на дневниот ред на пленарната седница следната недела.

Влијанието на Турција

„Парламентарната комисија одби да го стави гласањето на дневен ред следната недела“, рече Вадаи, додавајќи дека нејзината партија повторно ќе предложи гласање во понеделник во парламентот. Вадаи рече дека е „очигледно“ оти Фидес одлучил да го закаже гласањето во зависност од позицијата на Турција.

„Премиерот Виктор Орбан се движи во тандем со (турскиот претседател Таип) Ердоган (…) го игнорира унгарскиот суверенитет и (…) го уништува единството на НАТО“, рече таа. „Како што изгледа денес, нема да има ратификација пред самитот на НАТО“, додаде таа.

Шведскиот премиер Улф Кристерсон рече дека има намера да разговара со Орбан подоцна во четвртокот по медиумските извештаи дека унгарскиот парламент ќе ја одложи ратификацијата на кандидатурата на Шведска за НАТО. Портпаролот на унгарската влада и Министерството за надворешни работи не одговориле на прашањата на Ројтерс.

Орбан: Шведска шири лаги за Унгарија

Унгарскиот парламент ќе заседава следниот понеделник, вторник и петок. Ќе гласаат за неколку предлог-закони, меѓу кои и за буџетот за 2024 година. Процесот на ратификација е закочен во парламентот од јули минатата година, но Орбан прво изрази загриженост за аспирациите на Шведска и Финска за членство во НАТО дури во февруари.

Тој ги обвини двете земји, меѓу другото, дека шират „отворени лаги“ за демократијата и владеењето на правото во Унгарија. Сепак, унгарските претставници ја одобрија кандидатурата на Финска на крајот на март.

Повторувајќи ја позицијата на Турција, Ердоган му рече на генералниот секретар на НАТО Јенс Столтенберг во телефонски разговор во неделата дека Шведска мора да ги прекине протестите на поддржувачите на забранетата Курдистанска работничка партија (ПКК) во Стокхолм за да добие зелено светло за приклучување кон алијансата.

Западен официјален претставник изјави за Ројтерс во средата дека сојузниците на НАТО ги засилиле напорите да ја убедат Турција да ја прекине блокадата на Шведска, но не е јасно дали ќе успеат пред самитот во Литванија.