Адвокат во Турција застрелал пет судии, потешко ранувајќи двајца од погодените. Засега не е јасен мотивот за пукањето.

Адвокат во Турција застрелал пет судии, потешко ранувајќи двајца од погодените.

Засега не е јасен мотивот за пукањето, но локалните и светските медиуми нагласуваат дека еден од двајцата потешко ранети судии, е познат по тоа што пред неколку месеци донесе пресуда со која им се забранува на учителките и професорките во Турција да носат шамија на своето работно место.

Адвокатот Аслан Алпаслан во државниот Совет на Турција, највисока административна инстанца во земјата, влегол со пиштол „Глок“, за кој не е јасно како го пренел и го застрелал судијата Мустафа Бирден, кој ја донесе пресудата против шамиите и уште еден друг судија. Овие двајца се потешко ранети а биле погодени и полесно ранети и уште тројца други судии.

Алпаслан упаднал на судско заседание во зградата на Судот и пред да почне да стрела, според едни извори извикал „Алах Акбар“ (Алах е голем), додека според други, „Сите сме ние војници на Алах“.

Полицијата веднаш го уапси Алпаслан, не соопштувајќи притоа детали за настанат.

Претседателот на државата Ахмет Неџед Сезар го осуди нападот и изјави дека ваквите инциденти нема да ја постигнат целта. Тој додаде дека судскиот систем не треба да биде застрашен и оти треба и ќе остане лојален на републиканското и секуларното управување со државата.

Нападот го осуди и Генералштабот на Армијата, една од најмоќните и највлијателните институции во државата.

Лидерот на опозицијата Дениз Бајкал, пак, оцени дека нападот е насочен кон уставниот поредок на Турција, но и кон судскиот систем, со оглед на фактот дека е стрелано во највисокиот суд.

Адвокатот според некои информации е регистриран во асоцијацијата на адвокати од Истанбул а засега не се познати неговите политички определби.

Терористички напади во Турција во последниве години извршуваат припадници на радикални организации на Курдите, на радикални исламисти , но и на радикални левичари.

/макфакс/