Uncategorized
Веганската исхрана го намалува ризикот од срцеви болести
Веганската исхрана со малку јаглени хидрати наречена ’Еко-Аткинс’ е ефикасна во намалување на телесната тежина во слабеењето, а ново истражување покажа и дека го намалува ризикот од срцеви болести.
Според д-р Дејвид Џенкинс од болницата „Сент Мајкл” во Торонто многу диети кои се засноваат на намалено внесување јаглени хидрати дават резултати во слабеењето. Меѓутоа, тие вообичаено подразбираат консумирање протеини и масти од животинско потекло, што го подигнуваат нивото на холестерол.
Од друга страна, диетите богати со протеини и растителни масла, се поврзуваат со намален ризик од срцеви болести, затоа што го намалуваат нивото на таканаречениот лош холестерол.
Имајќи предвид дека ‘Еко-Аткинс’ се состои од намирници сиромашни со јаглени хидрати, а богати со протеини и масла, тимот од „Сент Мајкл” сакал да провери дали таа го намалува и ризикот од болести на срцето.
За потребите на студијата објавена во магазинот BMJ Open, истражувачите испитале 39 мажи и жени со вишок килограми.
Учесниците биле поделени во две групи: едната се придржувала на ‘Еко-Аткинс’ диетата шест месеци, додека за тоа време другата група се држела до исхрана богата со јаглени хидрати, а сиромашна со масти.
Исражувачите и препорачале на првата група да внесува околу 60 проценти од препорачаната дневна енергетска вредност на храната. Освен тоа, целта била 26 проценти од дневната исхрана да ја сочлинуваат јаглени хидрати, 31 процент протеини и дури 43 проценти масти, претежно растителни масла.
На крајот на истражувањето, тимот открил дека учесниците кои се придржувале на ‘Еко-Аткинс’ диетата имаат 10 проценти понизок холестерол и изгубиле во просек два килограми повеќе во однос на другата група.
Научниците пресметале дека таквиот ритам го намалува ризикот од срцеви болести за 10 отсто во текот на десетгодишен период.
Според д-р Џенкинс, овие резултати може да се применат и на општата популација, затоа што учесниците имале слобода сами да ги бираат намирниците и големините на порциите.
Храната богата со влакна, како овес и јачмен, биле составен дел од ‘Еко-Аткинс’ диетата, како и зеленчукот со ниска содржина на скроб.
Коментирајќи ги резултатите, научниците заклучиле дека „Диетата со намалено внесување на јаглени хидрати и повеќе протеини од растително потекло, како глутен, соја и јаткасти плодови, со растителни масла, нудат можност за намалување на лошиот холестерол и телесната тежина, како и ризикот од срцеви болести”.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Uncategorized
Нови првични резултати: Ѓорѓиевски води во Скопје, Герасимовски во Центар, во Карпош Лукровски
Според првичните резултати од вториот круг на локалните избори 2025, во Скопје води кандидатот на ВМРО-ДПМНЕ, Орце Ѓорѓиевски со над 71.875 гласа наспрема Амар Мециновиќ од Левица со 41.522 гласови од пребројани вкупно 77,53 отсто од избирачките места.
Во повеќето општини водство има Ѓорѓиевски, освен во Карпош и Центар, каде повеќе гласови има Мециновиќ.
Во Карпош, од 62,22 отсто обработени гласови Стевчко Јакимовски има 42,56 отсто или 7.641 гласови, додека кандидатот на ВМРО-ДПМНЕ и коалицијата Сотир Лукровски 47,65% или 8.555 гласови.
Во Центар од 75,15% обработени гласови, кандидатот на ЗНАМ Мирослав Лабудовиќ има 38,63% или 6.138 гласови, додека кандидатот на СДСМ, Горан Герасимовски има 52,39% или 8.325 гласови.
Uncategorized
АХВ се вклучи во одбележувањето на 16 Октомври – Светскиот ден на храната
Со мотото „Рака за рака за подобра храна и подобра иднина“, Агенцијата за храна и ветеринство (АХВ) се придружи на настанот што го организара Организацијата за земјоделство и храна на Обединетите нации – ФАО за одбележување на 16 Октомври – Светскиот ден на храната.
Во рамките на настанот, кој во организација на ФАО се одржа во скопскиот Градски парк, а беше посветен и на одбележувањето на осумдесетгодишнината од основањето на ООН и ФАО, претставници на АХВ на граѓаните им подели едукативен материјал со совети за безбедна храна – летоци, лифлети и торбички.
ФАО во рамките на Светскиот ден на храната годинава повикува на глобална соработка за создавање мирна, одржлива, просперитетна и безбедна иднина со храна. Со заедничка работа преку владите, организациите, секторите и заедниците активно се работи на трансформирање на земјоделско-прехранбениот сектор во насока на обезбедување услови секој граѓанин да има пристап до здрава исхрана живеејќи во хармонија со планетата.
Агенцијата за храна и ветеринарство и оваа година ја поддржа кампањата на ФАО за одбележување на Светскиот ден на храната истакнувајќи го ставот дека граѓаните во државава јадат безбедна храна. АХВ како институција е дел од синџирот за контрола на безбедноста на храната во земјата од домашно производство и од увоз водејќи сметка таа редовно да се контролира во рамките на редовните и вонредните контроли и многубројните мониторинг-програми, кои се спроведуваат во АХВ, чии досегашни анализи потврдуваат дека македонските граѓани јадат безбедна храна.
Uncategorized
Турција: Нашата дипломатија го спречи доаѓањето на Нетанјаху на самитот во Египет
Турската влада соопшти дека Анкара одиграла клучна улога во спречувањето на израелскиот премиер Бенјамин Нетанјаху да присуствува на самитот за Газа во Египет.
„По иницијатива на претседателот Реџеп Таип Ердоган и благодарение на турските дипломатски напори, Нетанјаху нема да учествува на состанокот“, изјавил владин претставник за германската агенција „ДПА“.
Израел пак тврди дека Нетанјаху не отпатувал поради еврејскиот празник Симхат Тора, иако претходно беше најавено негово присуство.
Самитот во Шарм ел-Шеик го предводи американскиот претседател Доналд Трамп, а учествуваат најмалку 20 светски лидери.

