Властите во Зимбабве испитуваат смрт на 11 слонови во шума на западот на земјата. Телата на слоновите биле откриени во шумата Пандамасуе, лоцирана помеѓу националниот парк Хванге и водопадите Викторија.

Примероци од крв биле однесени во лабораторија за анализа за да се утврдат причините за смртта, изјави портпаролот на Националните паркови и Управата за заштита на диви животни во Зимбабве, Тинаша Фараво. Ловокрадството е исклучено како опција бидејќи слоновите биле принајдени со извиените коски.

„Можеме да ја утврдиме причината за смртта по тестовите. Ниту едно друго животно не е убиено, само слоновите, но досега тестовите не покажуваат труење со цијанид”, рече Фараво за АП.

Во последниве години, ловокрадците отруја десетици слонови за да земат коските коишто нелегално ги продаваат.

Мистериозната смрт на слоновите во Зимбабве е слична на смртта на повеќе од 275 слонови во соседна Боцвана минатиот месец. Научниците сè уште ја испитуваат смртта на слоновите во делтата на реката Окаванго, а отфрлени се ловокрадство, труење и заразната болест антракс.

Боцвана има најголема популација на слонови во светот, околу 156.000, а Зимбабве е на второ место со околу 85.000.

Кога поради карантинот во Австралија беа затворени баровите и рестораните, пиварниците останаа со огромни резерви пиво.

Но, наместо да го фрлаат, во сојузната држава Јужна Австралија вишокот пиво добило нова намена – се користи за напојување на постројките за прочистување вода.

Во пречистителната станица на отпадни води во Гленелг, западно од Аделаида, во последните месеци милиони литри неискористено пиво од локалните пиварници се претворени во обновлива енергија.

Во постројката се меша органски индустриски отпад со тињата од отпадните води за производство на биогас, кој потоа се претвора во електрична енергија, на која работи целиот објект.

Обично се генерира доволно биогас за да обезбеди околу 80 проценти од потребите за струја.

Сепак, резервите од пиво ја промениле ситуацијата и производството на енергија достигнало 654 мегавати за еден месец.

„Со додавање речиси 150.000 литри пиво неделно, во мај произведовме рекордни 355.200 кубни метри биогас и уште 320.000 кубни метри во јуни. Тоа е доволно за напојување 1.200 дома“, рекла менаџерката Лиса Ханант за Си-ен-ен.

Поларните мечки ќе изумрат до крајот на векот ако не се направи повеќе за борбата против климатските промени, предвидува една студија.

Научниците тврдат дека некои популации веќе ги достигнале границите на опстанокот затоа што морскиот мраз на Арктикот се намалува, пренесува Би-би-си.

Студиите покажуваат дека падот на морскиот мраз, веројатно, ќе го намали бројот на поларни мечки, но новата студија објавена во списанието „Климатски промени во природата“ открива кога тоа би можело да се случи, пренесува Би-би-си.

Наодите се совпаѓаат со претходните проекции дека поларните мечки веројатно ќе постојат до 2100 година, само во неколку популации многу далеку на север ако климатските промени продолжат со истото темпо.

„Поларните мечки веќе седат на врвот на светот; ако мразот замине, тие нема каде да одат“, рече д-р Стивен Амструп, главен научник во „Полар берс интернешнл“, кој исто така беше вклучен во студијата.

Тој објасни дека првин ќе ги снема младенчињата, кои ќе се раѓаат, но женките нема да имаат доволно телесна маст за да произведат млеко. Месојадите се потпираат на морскиот мраз на Арктичкиот Океан за да ловат фоки. Како што мразот се топи, животните се принудени да патуваат на долги растојанија обидувајќи се да најдат храна за да ги прехранат своите млади.

Поларните мечки се наведени како загрозени видови од страна на Меѓународната унија за зачувување на природата (IUCN), а климатските промени се клучен фактор за нивно истребување.