Забава
Филмска трагедија со Алек Болдвин: кои се правилата за оружје на филмските сетови?

Страшниот инцидент што резултира со смрт на камерман на филмски сет минатата недела поттикна прашања за употребата на огнено оружје во забавната индустрија.
Актерот Алек Болдвин изјави дека неговото срце е скршено кога во четвртокот во Ново Мексико фатално ја застрела камерманката Халина Хачинс со пиштол реквизит.
Кој е одговорен за безбедноста на оружјето на филмските сетови? Одговорноста за користење пиштоли и друго оружје лежи кај т.н. оружар на секоја продукција.
Тие го обезбедуваат оружјето кога не се користи и ги поучуваат актерите за негова правилна и безбедна употреба. Тие исто така го полнат огненото оружје и го проверуваат пред и по секоја сцена.
Кои се правилата? Не постои дефинитивна листа со прописи за употреба на огнено оружје во филмската индустрија.
Според новинската агенција АП, американската Федерална агенција за безбедност на работното место не ја регулира безбедноста на оружјето на снимање, а многу држави ѝ оставаат на индустријата да креира и да почитува сопствени правила.
Професорот Ден Леонард од Универзитетот „Чепмен“ во Калифорнија, кој специјлаизира за прописи на снимање, изјави за Би-би-си дека „главно ѝ е препуштено на индустријата да развие и да користи насоки… и ваквите насоки, доколку се почитуваат, овозможуваат безбедно користење огнено оружје на снимање“.
Но, дури и тогаш не постои еден дефинитивен сет на процедури и протоколи.
Инцидентите како оној на снимањето на Rust се многу ретки, но се зголемија повиците за забрана на „живо“ огнено оружје на филмски сетови со петиција што собра повеќе од 23.000 потписи до понеделникот. Актерката Оливија Вајлд беше меѓу оние што дадоа поддршка.
Сенаторот од Калифорнија, Дејв Кортезе, во саботата изјави дека ќе поднесе предлог-закон за забрана на бојна муниција на филмските сетови во државата.
Трагедијата од минатата недела предизвика лавина твитови и полемика на социјалните мрежи.
„Веќе нема причина да има пиштоли наполнети со ќор-фишеци или што и да било во текот на снимањето. Треба да биде целосно забрането“, напиша Крег Зобел, актер и режисер (Westworld и Mare of Easttown), на „Твитер“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Забава
На Џенифер Лопез не ѝ било дозволено да влезе во продавница во Истанбул, обезбедувањето ѝ го блокирало патот

Џенифер Лопез доживеала непријатен момент за време на турнејата во Турција. 56-годишната пејачка и актерка сакала да ја посети продавницата на „Шанел“ во Истанбул, но обезбедувањето ја спречило бидејќи веќе имало многу луѓе внатре, пишува „Турција тудеј“.
Пејачката не направила драма, туку само рекла: „Добро, нема проблем“ и си заминала.
Вработените во продавницата наводно подоцна ја поканиле назад кога ја препознале, но наместо тоа, таа отишла во други продавници за луксузна мода.
Посетата на продавницата на „Шанел“ во Истанбул се случила непосредно пред нејзиниот настап во тој град. Таа моментно е на крајот од турнејата Up All Night: Live in 2025, која завршува на 12 август на Сардинија, Италија.
Посетата на Истанбул беше нејзина втора посета на Турција за време на турнејата. На 23 јули таа настапи во хотелот „Регнум Карја ризорт“, а денот по концертот, таму го прослави својот роденден, пишува медиумот.
Кога Џенифер ќе се врати во САД, веројатно ќе биде зафатена со подготовки за објавувањето на Kiss of the Spider Woman. Мјузиклот, напишан и режиран од Бил Кондон, премиерно беше прикажан на филмскиот фестивал „Санденс“ во јануари, а во кината ќе се прикажува од 10 октомври.
Новиот филм е базиран на мјузиклот од Теренс Мекнали, Џон Кандер и Фред Еб, кој е инспириран од романот на Мануел Пуиг од 1976 година. Диего Луна и Тонатиух Елизарарас ги играат затворениците Валентин и Молина, а Лопез ја игра Ингрид Луна, филмската дива, која Молина ја обожава.
Фото: принтскрин
Забава
(Видео) Ја реновирале куќата и откриле нацистички бункер со морничава порака

Кога Шон Талиер (35) и неговата сопруга Каролина (32) почнале да ја реновираат куќата во октомври 2021 година, не можеле да замислат какво изненадување ги чека.
Под нивниот дом на островот Гернзи, близу брегот на Нормандија, се криел огромен нацистички бункер од Втората светска војна!
Парот го открил масивниот комплекс со две големи простории, пренесува „Дејли стар“.
Талиер знаел дека островот бил под германска окупација во периодот 1940-1945 година, кога нацистите ги претвориле Каналските острови во воени тврдини. Сепак, не очекувал да најде бункер токму под својот дневен престој.
„Знаев за бункерите по островот, но никогаш не би помислил дека еден се наоѓа под мојата дневна соба“, изјавил тој за локалните медиуми.
Претходната сопственичка, гледајќи фотографии од куќата на Фејсбук, го прашала парот дали ги пронашле просториите под темелите, откривајќи дека како деца се играле таму пред нивниот татко да ги затрупа со земја.
Парот ангажирал багер и отстранил десетици тони земја, по што откриле бетонски влез во бункерот.
Кога слегле внатре, останале без здив. Внатре имало две простории со димензии 5×3 и 5×6 метри, поврзани со коридор долг девет метри. Бункерот се наоѓал на осум метри длабочина.
Внатре пронашле стари шишиња, излез во случај на опасност, но и застрашувачки пораки испишани од нацистите за време на Втората светска војна. Особено внимание им привлекла пораката: „Внимание, непријателот слуша“ (Achtung, Feind hört mit).
„Ова не се само неколку простории, ова е историја. Студено, влажно и застрашувачко сведоштво за она што луѓето го поминувале тогаш“, рекол Шон.
Парот планира да го претвори бункерот во просторија за забави — со билјард сала и мини-теретана, при што ќе вградат 80 тони бетон за да ги обезбедат ѕидовите и скалите. Пораките на германски јазик планираат да ги зачуваат и реставрираат со калиграфија.
„Каролина сака да ја завршиме куќата, но јас ветив забавa за Ноќта на вештерките во бункерот“, се пошегувал Шон. „Морам да го исполнам тоа ветување“.
Забава
Британската монархија во нов проблем: пронајден документ што го зголемува притисокот врз кралот Чарлс

Британскиот крал Џорџ IV лично профитирал од работата на робови на плантажите во Гренада, покажува најновото истражување, што дополнително ја зголемува јавната критика кон монархијата да се соочи со својата улога во времето на ропството.
Дезири Баптист, независен истражувач, пронашла документ од 1823/24 година во Националниот архив во Лондон, кој сведочи за уплата од 1.000 фунти (што денес изнесува речиси 103.000 фунти или приближно 120.000 евра) од две кралски плантажи во Гренада на кои работеле стотици поробени луѓе.
Парите биле наменети за приватната каса на кралот Џорџ IV и, според Баптист, придонеле за неговиот раскошен начин на живеење“.
Баптист истакнува дека досега никој британски монарх јавно не признал дека Круната поседувала и профитирала од поробени луѓе.
Нејзиното истражување е дел од поширока студија наречена „Робови, сопственост на Неговото Величество: Џорџ IV и Гренада“.
Професорот Едмон Смит од Универзитетот во Манчестер, кој ја води студијата за улогата на кралската фамилија во ропството, изјави дека оваа уплата може да биде само врвот на ледениот брег.
Тој заедно со Ник Дрејпер од Универзитетскиот колеџ во Лондон ги потврдил наодите на Баптист.
Смит додаде дека доказите укажуваат на поширок образец на колонијална експлоатација во потрага по приходи од карипските колонии.
Бакингемската палата не дала коментар на извештајот.
Крал Чарлс претходно изразил жалење поради ропството во говор пред лидерите на Комонвелтот во 2022 година и ја поддржал академската студија за историската улога на монархијата, но засега не ја признал директната вмешаност на Круната во робовласништвото, пренесе „Ројтерс“.