Велигденската вечера се претворила во вистински пекол за еден човек од американскиот град Алтамонте Спрингс кого поранешната девојка го запалила и го оставила да изгори.

Како што пренесуваат тамошните медиуми, Шивон Перез го повикала своето поранешно момче на вечера и го замолила да ја поправи цевката во бањата поради наводно протекување под мијалникот. Кога тој легнал на подот за да може полесно да ја поправи цевката, Перез го полеала со бензин и го потпалила со запалка со зборовите „Ќе платиш за сè“.

Потоа го заклучила во бањата и се обидела да го задржи, но сепак тој успеал да ја турне вратата и да избега. Итно бил префрлен во болница со тешки изгореници на градите, вратот и на лицето.

„Горел додека трчал по скалите. Кожата му е излупена, а лицето му беше крваво. Навистина страшна глетка“, рекла сосетката Никол Фејдер.

Перез (38) била уапсена од локалната полиција кога излегла од болница, каде што завршила поради вдишување поголема количина чад. Обвинета е за убиство со умисла и е задржана во притвор, без право на кауција.

Германски државјанин на автопат во Баварија си ги заборавил своите две ќерки, пишуваат германските медиуми.

Како што се наведува, тој со девојчињата патувал кон езерото Гарда по повод велигденските празници, а неговата сопруга останала дома.

„Бизарна ситуација се случила на бензиска пумпа. Девојчињата отишле до тоалетот, а кога се вратиле, го немало ни автомобилот ни татко им. Девојчињата го знаеле домашниот телефонски број и успеале да стапат во контакт со мајката, преку која дошле и до мобилниот телефонски број на таткото“, наведуваат медиумите.

Полицијата ѕвонела 48 пати кај несовесниот татко, кој не се одѕвал на повиците, а веќе се наоѓал во Австрија, на 170 километри оддалеченост.

Пред полицијата на сослушување мажот изјавил дека не забележал оти неговите ќерки не се во автомобилот.

Мумифицираниот скелет откриен во пустината Атакама во Чиле пред 15 години поттикна многу шпекулации и теории на заговор за неговото вонземско потекло поради неверојатниот изглед. Имено, иако се работи за скелет на женско новороденче, тој е висок само 15 сантиметри, а коските му изгледаат како на дете на возраст од 6 до 8 години. Уште поневообичаено е дека скелетот има издолжена глава и 10 наместо 12 пара ребра.

Скелетот наречен Ата беше пронајден во Ла Норија, напуштен рударски град среде пустината во Чиле пред 15 години, но на крајот беше продаден на приватен колекционер во Шпанија. Иако професорот по микробиологија и имунологија на Универзитетот „Стенфорд“, Гери Нолан, во 2013 година докажа дека Ата има човечко потекло, истата година скелетот стана тема во документарниот филм „Сириус“ како потенцијален доказ за постоењето вонземски живот.

Сепак, научен тим од Калифорнија, предводен од Нолан, сега успеа да извади ДНК од мумијата со цел да се спроведе генетска анализа, која конечно ја открила трагичната вистина за Ата, објави британски „Гардијан“. Имено, не станува збор за вонземјански, туку за човечки остатоци од бебе, кое починало непосредно по раѓањето поради ужасни мутации што го деформирале неговото тело.

Нолан и неговите колеги ја објавија ДНК-анализата која покажува дека Ата имала мутации на најмалку 7 гени за кои се знае дека предизвикуваат големи дефекти во развојот на коските или го забрзуваат нивниот развој. Покрај тоа, Ата веројатно имала релативно честа и потенцијално смртоносна болест наречена вродена хернијација на дијафрагмата, пишува „Гардијан“.