По ненадејната „средба“ на 17-месечно дете со опасна отровна змија во Бразил, момченцето со каснување го усмртило рептилот, додека самото тоа не било повредено, пренесуваат во средата локалните медиуми.

Според радиото Gaucha, несекојдневниот случај се одиграл во градот Мостардас во сојузната Риу-Гранди-ду-Сул. Малечкото по име Лоренцо си играло во дворот, кога покрај него минала змија од видот жарарака, распространет во јужниот дел на Бразил, Аргентина и Парагвај, чиешто каснување за возрасни луѓе, а особено за деца, предизвикува мозочна хеморагија, бубрежна инсуфиенција и честопати може да биде фатално. Засега не е познато како момченцето успеало со каснување да ја усмрти змијата.

Мајката на детето, Џејн Фериера, изјавила за порталот G1 News дека кога излегла од куќата го видела својот син како си игра со змија и ја гризнува, а неговите рачиња и устата биле окрвавени. Додала дека морала да го повика сопругот за да ѝ помогне од рацете и од устата на малиот Лоренцо да ја истргнат змијата. Смета дека малиот најверојатно сметал дека отровницата е една од неговите играчки.

Веднаш по инцидентот Лоренцо бил однесен во болница, стравувајќи дека и тој самиот бил каснат. Сепак, лекарите не нашле знаци дека во неговиот организам има отров, уверувајќи ги неговите родители дека детенцето не настрадало и оти неговата здравствена состојба не е загрозена.

„Момченцето ја каснало змијата во близина на нејзината глава, со што ја парализирало и спречило да го касне. Беше многу вознемирено, и мислам дека тоа било инстинкт на самоодбрана, или можеби мислело дека е само играчка“, изјавил за порталот Глимар Калтери, доктор во болницата во којашто бил примен Лоренцо.

Претходните години светските медиуми известуваа за неколку слични случаи кога човек каснал отровница. Еден од нив беше случајот од август 2012 година во Непал, кога 55-годишниот Мохамед Салмо Мијија, при работење во оризово поле на околу 200 километри од главниот град Катманду откако бил каснат од индиска кобра ја усмртил, исто така, каснувајќи ја. „Можев да ја убијам со стап, но бидејќи бев толку разгневен, наместо тоа ја каснав“, раскажа тогаш Непалецот, кој исто така, не настрада во овој инцидент.

Медиумите го одбележаа и неверојатниот случај регистриран во јули 2010 година, кога отровница каснала жител на индиското село Санџаји. Неговите соселани веднаш со камења ја убиле змијата, по што се обложиле и 35-годишниот Завер Ратход ја проголтал мртвата змија за што добил 100 рупии, ниту 1,5 евро. Само неколку минути подоцна почнал неконтролирано да повраќа и побарал лекарска помош. Според докторите, отровот така не успеал да се прошири низ организмот, а веќе следниот ден тој се чувствувал многу добро. Дури и побегнал од болницата пред толпата новинари насобрани за да дознаат од него повеќе за бизарниот облог./крај/мф/сн

Извор: Макфакс