Не e мал бројот на луѓе кои размислуваат да го напуштат Фејсбук односно целосно да го избришат својот профил од оваа социјална мрежа, по неодамнешниот скандал со повреда на приватноста на корисниците. Покрај тоа, научниците тврдат дека ваквиот потег може да биде прилично добар кога станува збор за здравјето.

Една неодамнешна студија на Универзитетот во Квинсленд покажа дека напуштањето на Фејсбук за многу кратко време го намалува општото ниво на стрес.

Од вкупно 138 корисници на оваа социјална мрежа вклучени во истражувањето, една половина престанала да користи Фејсбук во рок од пет дена.

Истражувачите кај учесниците во студијата го мереле нивото на хормонот кортизол, познат како хормон на стрес, пред и по експериментот. Врз основа на овие мерења, тие откриле дека нивното ниво на патолошки стрес е намалено.

Сепак, учесниците самите пријавиле кај научниците дека се чувствуваат „помалку добро“ по петдневна неупотреба на Фејсбук, пишува News Hub.

„Луѓето тврдат дека во поголема мера не се чувствуваат задоволни со нивниот живот, како и дека со нетрпение очекуваат да се вратат на своите фејсбук активности“, рекол лидерот на истражувачкиот тим, доктор Ерик Венман.

„Тие сметаа дека во нивниот живот недостасува содржина поради прекинувањето на комуникацијата со нивните фејсбук пријатели“, додал тој.

Ново истражување покажа дека количината пластика во пакуваната вода е двапати повисока во однос на онаа од чешма, пренесе „Гардијан“.

Станува збор за неодамнешна анализа спроведена од научници во државниот њујоршки универзитет „Фредонија“ за потребите на новинарски проект на „Орб медија“. Таа покажала дека повеќе од 90 проценти од шишињата со вода од популарни светски брендови содржат микроскопски честички пластика.

Истата група од научници веќе претходно имала направено анализа на водата од чешма, која покажала дека во тој случај концентрацијата на пластика е двапати помала.

Светската здравствена организација најави и истрага за потенцијалните ризици од пластиката во водата за пиење.

Во студијата за потребите на „Орб медија“ анализирани биле 259 шишиња со вода од 11 бренда, од 19 локации во девет земји. Резултатите покажале дека во просек во секој литар пакувана вода има 325 честички пластика.

Од сите тестирани шишиња пластика не била пронајдена кај само 17 од нив. Во некои шишиња концентрацијата била исклучително висока, односно речиси 10.000 честички пластика во еден литар вода.

Во водата имало најголемо ниво на полипропилен, од кој се прават капачињата за шишињата. Анализираните шишиња со вода биле набавени во САД, Кина, Бразил, Индија, Индонезија, Мексико, Либан, Кенија и од Тајланд.

Друга неповрзана анализа на организацијата „Стори оф стаф“ испитувала пакувана вода од 19 американски производители. Во нив била пронајдена пластика, но со малку пониска концентрација.

Според Абигејл Бероус, која го спровела тоа истражување, пластиката во флашираната вода може да дојде од неколку извори.

„Ветерот многу лесно ги распространува пластичните влакна. Во фабрика тие може да дојдат во контакт со водата преку вентилацијата или облеката на вработените“, рече таа.

И покрај фактот што човечката анатомија се проучува неколку илјади години, научниците и натаму откриваат нови тајни за човечкото тело.

Имено, истражувачите од медицинскиот центар „Лангон“ во Њујорк идентификуваа нов вид орган кој би можел да биде најголем во телото.

Се покажало дека  она што претходно се сметаше за густо сврзно ткиво што се протега низ целото човечко тело всушност е мрежа од комори исполнети со течност, која служи како еден вид „амортизер“, односно е орган за апсорпција на удари.

Ова откритие не само што ќе помогне подобро да го разбереме начинот на кој функционира човечкото тело туку исто така одговора на прашањето зошто ракот се шири побрзо кога ќе достигне одредени делови на телото.

Наречен „интерстициум“, овoj орган се состои од поврзани делови кои се однесуваат како проток на течност, а се протегаат од површинскиот слој на кожата, преку дигестивниот тракт, белите дробови и уринарниот систем, до крвните садови.