Германски и норвешки научници спровеле студија во која анализирале како инфекцијата од коронавирус напредува во однос на крвната група на пациентите.

„Наодите се зачудувачки, иако студијата беше објавена како т.н. нацрт, односно таа сè уште не ги минала проверките и критиките на научната заедница“, пренесува „Дојче веле“.

Експерти од Универзитетот во Кил и Универзитетската клиника во Осло го проучувале текот на болеста кај 1.610 пациенти кај кои короната предизвикала тешки респираторни проблеми. Пациентите биле од Италија и Шпанија, две европски земји кои беа сериозно погодени од епидемијата. Некои од нив починале.

Споредувајќи ги ДНК-материјалите на овие пациенти со примероци од крв од 2.205 здрави лица, се покажало дека луѓето со крвна група А имаат поголем ризик од потешка форма на заболување.

Инфицираните луѓе со крвна група А имаат двојно поголема веројатност да завршат на респиратор во споредба со заразените со крвна група 0. Групите Б и АБ се некаде помеѓу, се наведува во резултатите од истражувањето.

Групата А е најчеста крвна група во Европа по што следуваат 0 и Б, а најретка е АБ.

Доколку се потврди резултатот од студијата, ваквото сознание може да помогне во развојот на терапија.

Одамна е познато дека разни болести различно влијаат врз луѓето во зависност од нивната крвна група. На пример, пациенти со група 0 ретко заболуваат од маларија, а групата А има најдобар имунитет против чума.

Школа за обука на кучиња во Техеран, во соработка со иранската армија и властите, тренира кучиња за откривање луѓе заразени со новиот коронавирус.

Школата добила примероци од вирусот од разни болници, а во 65,4 отсто од случаите кучињата погодувале кои лица се позитивни, а кои негативни.

Со душкање овие кучиња може да проверат од 250 до 300 луѓе за еден час.

Луѓето кои го изгубиле чувството за вкус или мирис, се препорачува да бидат тестирани за коронавирус, откако аносмијата е препознаена како трет симптом на инфекцијата, што го оправдува тестот, се наведува во новите инструкции издадени од британската влада.

Британските медицински експерти велат дека губењето на двете сетила треба да биде знак дека е потребно тестирање, дури и ако другите два симптома се отсутни, односно пациентот нема постојана кашлица и висока температура, пренесува „Гардијан“.

Истражувањето на владината советодавна медицинска група НЕРВТАГ, покажало дека меѓу 24 и 29 март, 59 проценти од позитивните на Ковид-19 кои се пријавиле преку апликација за следење на симптомите, доживеале губење на чувството за мирис и вкус.

„Во комбинација со другите симптоми, луѓето кои доживеале губење на чувството за мирис и вкус, имаат трипати поголеми шанси да бидат заразени со коронавирус“, вели професорот Тим ​​Спектор од Кралскиот колеџ во Лондон.