Здравје
Купувањето мајчино млеко на интернет е опасно по здравјето
Мајчиното млеко коешто преку интернет преку групи на социјалните мрежи го купуваат бодибилдерите, пациентите заболени од карцином или едноставно фетишистите, е опасно по здравјето, предупредуваат британските научници.
Лондонскиот универзитет Кралица Мери вели дека тоа млеко е непастеризирано и може да носи опасни бацили. Тврдењата дека го јакне имуносистемот кај луѓето се лажливи и би можеле да бидат многу опасни за пациентите со ослабен имунитет, особено кај оние кои боледуваат од рак.
Тешко е да се каже колку преку интернет се продава мајчино млеко, коешто го нарекуваат и „течно злато“, бидејќи секогаш станува збор за трговија меѓу две страни.
Сара Стил од Лондонското медицинско училиште изјави за BBC дека тој пазар покажува „постојан раст ширум светот“. Таа е еден од авторите на извештајот во кој се вели дека 93 отсто од издоеното млеко кои се продава онлајн содржи бактерии, имајќи предвид дека за издојувањето не се користи стерилна опрема, ниту млекото стерилно се складира. Меѓу опасностите се кријат хепатитис Б и Ц, ХИВ и сифилис.
Самото тргување со мајчиното млеко почна да се развива, бидејќи и жените кои самите немаат доволно млеко сакаат со него да ги хранат своите доенчиња. Во меѓувреме, почна да се купува и за други цели, на пример, за обликување мускули или подигнување на имунитетот.
Стил вели дека особено е загрижена кога станува збор за луѓето заболени од рак. Кај нив, како и кај другите луѓе со намален имунитет, имуносистемот не функционира како кај здравиле лица. „Таквото млеко се рекламира како корисно за имуно системот, но всушност претставува голем ризик, луѓето се изложуваат на бактерии и вируси кои може да ја комплицираат нивната здравствена ситуација, на многу опасен начин“, предупредува научничката.
Претставници на една интернет страница за продажба на мајчиното млеко за BBC рекле дека секогаш советуваат млекото да биде пастеризира пред употребата, како и дека повеќето нивни корисници се чесни и само сакаат „да овозможат хранење на бебињата со мајчино млеко“./крај/мф/сн
Извор: BBC
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Здравје
Безброј луѓе одат во Индија по „чудесниот лек“ за астма
Безброј луѓе, кои боледуваат од астма, одат во индискиот град Хајдерабад бидејќи наводно мала жива риба полнета со одредени растенија е чудотворен лек за астма, пишува АП.
Агенцијата вели дека секое лето, на ден кој се смета за астролошки поволен, луѓето што страдаат од астма и други респираторни заболувања патуваат во Хајдерабад за да проголтаат мали живи риби полнети со разни чудотворни билки направени од семејството Батини.
Според легендата, во 1845 година еден светец скитник му ја претставил тајната формула на чудотворната билка на еден човек што живеел во градот Хајдерабад, Веран Гуд, и му рекол да им ја даде формулата бесплатно на пациентите со астма.
Оттогаш, потомците на Гуд, познати како семејството Батини, ги зачувале традицијата и хербалната формула.
Секоја риба чини 40 рупии или 50-ина центи.
Кога се купува, живата риба се става во пластична кеса наполнета со вода и се носи кај семејството Батини, кое става мешавина од растенија во устата на рибата.
Забава
Кората од портокал може да има изненадувачки здравствени придобивки за срцето
Горчливата кора од портокал е тука за да го заштити плодот, а може да го заштити и нашето тело, само ако престанеме да ја фрламе.
Откриено е дека кората од портокал содржи биоактивно соединение, наречено ферулоилпутресцин (ФП), кое може да има корист за здравјето на срцето кога се јаде.
Ова откритие ги заинтересирало научниците од Универзитетот во Флорида и американското Министерство за земјоделство.
Во експериментите, кога глувците биле хранети со хранлив екстракт од кора од портокал, богат со ФП, шест недели по ред, истражувачите забележале намалување на биомаркерите во крвта поврзани со воспаление и кардиоваскуларни болести.
ФП е метаболит првично пронајден во листовите и сокот од грејпфрут. Иако се појавува и во некои портокали, се чини дека не е присутен во лимон и мандарини.
Соединението привлече голем интерес во последниве години поради својот антиоксидативен и антиинфламаторен потенцијал, но сè уште има многу експерти кои не знаат многу за тоа, пренесува „Сајнс алерт“.
„Ова е ново откритие што го нагласува претходно непризнаениот здравствен потенцијал на ферулоилпутрецинот во намалувањето на ризикот од кардиоваскуларни болести“, вели научникот за храна Ју Ванг од Универзитетот во Флорида.
Портокалите се едно од најпопуларните овошја во светот, се консумира главно за нивниот сок, а горчливата кора обично се фрла.
Секоја година 32 милиони тони кора од портокал оди во отпад, иако се јаде и може да биде добра за нас.
Во споредба со сочниот дел, кората од портокал содржи импресивна концентрација на витамини, антиоксиданси и лимонен – хемикалија која може да има антивоспалителни и антиканцерогени својства. Откривањето кои биоактивни соединенија се најважни за човековото здравје и зошто ќе биде клучно ако научниците сакаат да создадат најздрав можен екстракт.
Работата на Ванг и нејзините колеги овозможи грант од 500.000 американски долари од владин оддел за истражување дали екстрактот од кора од портокал може да го подобри здравјето на нашите црева и срцето.
Кора од портокал не е најлесната храна за внесување во оброкот, но ако научниците можат да дизајнираат производ од кората, таа би можела да стане популарна храна за подобрување на здравјето.
Неколку компании веќе брзаат да го направат токму тоа. А неодамна, истражувачите открија дека со само малку труд, кората од банана може да се претвори во вкусна, хранлива закуска полна со антиоксиданси и витамини. Истото важи и за кората од манго.
Здравје
Лошиот сон може да го зголеми ризикот од срцеви заболувања
Знаеме дека добриот сон е неопходен за добро здравје, особено за здравјето на срцето. Истражувањата покажаа дека лошиот сон може да го зголеми ризикот од срцеви заболувања. Но, дали знаевте дека положбата во која спиеме исто така игра улога за здравјето на срцето?
„Спиењето на левата страна може да предизвика суптилни промени во положбата на срцето. На некои луѓе им е дури и непријатно да спијат на левата страна, особено ако имаат срцева слабост или неодамна им бил вграден пејсмејкер“, вели кардиологот Леонард Ганц за Prevention.
Позицијата на спиење може да влијае и на одредени симптоми.
„Палпитацијата и абнормалните отчукувања на срцето може да бидат позабележителни кај некои луѓе штпо лежат или спијат на левата страна. Сепак, не е јасно дали лежењето на левата страна ги зголемува шансите за развој на аритмија и дали тоа влијае на прогресијата на болеста“, додаде д-р Ганц, цитиран од хрватски „Индекс“.
Затоа кардиологот ги советува оние што чувствуваат некакви промени во работата на срцето при лежење на левата страна да изберат поинаква положба.
Оние што страдаат од рефлукс на киселина или гастроезофагеален рефлукс, од друга страна, може да имаат корист од спиењето на левата страна, според лекарите.
Во овој момент нема доволно истражувања за да се докаже која положба на спиење е најдобра за здравјето на вашето срце ако веќе немате срцеви заболувања. Најважно е добро да се одморите.
Она што е познато е дека лежењето на грб може да го влоши пулмоналниот едем кај луѓето со конгестивна срцева слабост. Некои луѓе со срцева слабост велат дека им е потешко да дишат кога лежат или спијат на левата страна.