Црна хроника
СЈО: Претрес може да се врши кај лица каде може да се најдат предмети важни за кривичната постапка
Спeцијалното јавно обвинителство вршело претрес во домот на Коста Крпач, кој беше најден застрелан во својот дом во скопски Капиштец.
Од Обвинителството појаснуваат за Макфакс дека иако Крпач не бил осомничен во ниедна постапка којашто се води во ова Обвинителство, според Законот за кривична постaпка претрес може да се врши кај осомничен, но и кај други лица каде е веројатно дека ќе се најдат предмети важни за кривичната постапка. Новото обвинителство утрово испрати соопштение до јавноста во кое обелодени дека Крпач доброволно се пријавил како сведок во предистражна постапка којашто ја воделе тие и дека за него во Обвинителството не била отворена никаква кривична постапка иако тој се најде на списокот на помилувани лица на Претседателот, Ѓорге Иванов. Оттаму соопштија дека имаат докази дека врз Крпач бил вршен притисок, но други детали не соопштуваат бидејќи предистражните постaпки се тајни и се работи за доверливи информации.Од Институтот за судска медицина за Макфакс потврдија дека обдукцијата на телото на Крпач е завршена и дека се прават дополнителни обработки, но за резултатите од обдукцијата велат дека информации ќе соопшти надлежниот Јавен обвинител.Вештачењата за овој случај се во тек и од скопскотo Јавно обвинителство најавуваат дека ќе излезат со подетални информации кога ќе бидат разгледани сите извештаи и информации. „Надлежен јавен обвинител од Основното јавно обвинителство Скопје, веднаш по случување на настанот раководеше со увидот на лице место. Со цел расветлување на настанот, издаде Наредби за вршење на обдукција на починатото лице, за балистичко вештачење, за прибирање на траги од лице место и други вештачења. Преземањето на дејствија од обвинителството е во тек. Со подетални релевантни информации јавноста ќе биде запознаена откако ќе пристигнат и ќе бидат разгледани сите извештаи и информации. Секоја друга информација во овој момент би била шпекулација“, велат од скопското Јавно обвинителство.Во средата попладне околу 13.20 часот било пријавено дека на улицата „Нроден фронт“ во Скопје биле слушнати неколку истрели од огнено оружје. Првичните информации беа дека Крпач пукал кон комбе „фургон“ сопственост на фирмата „Огнометика“, генерален застапник за „Мирновец пиротехника“. Оваа фирма според описот на дејноста што може да се најде на интернет повеќе од 20 години професионално се занимава со организација и изведба на огномети и други пиротехнички и непиротехнички услуги од доменот на забавната, сценската и филмската пиротехника. Оваа фирма има свои претставништца во сите држави на Балканот, а од пред седум години отвори свое претставништво и во Македонија.На комбето биле најдени три проектила испукани од правец на булеварот „Митрополит Теодосиј Гологанов“. Крпач бил осомничен како можен сторител, но полицијата кога влегла во неговиот стан го нашла починат во спалната соба. Тој имал прострелна рана на градниот кош, а според првичните неофицијални информации тој се самоубил со огнено оружје револвер непозната марка.Крпач бил академски уметник, сопственик на фирмата „Финзи“, а неговото име се споменуваше и во сопствеништвото на интернет порталот Нетпрес.Тој се најде на списокот на помилувани лица на Иванов, иако за него не се водела кривична постапка./крај/мф/ффс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Возило од Албанија излетало од патот во Струшко: повредени се повеќе лица
Утрово во 08.10 часот, на магистралниот пат Ќафасан – Подмолје, кај клучката за струшкото село Радожда, патничко возило „мерцедес“ со албански национални ознаки, управувано од Ѓ.А.(55) од Елбасан, Република Албанија, излетало надвор од коловозот.
Во несреќата, со тешки телесни повреди се здобил совозачот Б.Х.(31), а со телесни повреди се здобиле возачот Ѓ.А. и сопатниците М.Џ.(51), Ц.П.(34)и Д.Х.(24), сите од Република Албанија, констатирани во болницата „Св.Еразмо“ во Охрид.
Надлежните информираат дека увид извршиле полициски екипи.
Црна хроника
Во оптек пуштил лажни евра: уапсен маж од Кичевско
Вчера во 03.00 часот, во казино на булеварот „Туристичка“ во Охрид, од слобода бил лишен Р.Б.(28) од кичевското село Долно Страгомиште.
Тој се сомничи дека во оптек пуштил лажни евра кои сакал да ги прикажи како вистинити, со што сторил кривично дело „фалсификување пари“, според член 268 од Кривичниот законик.
Полицијата соопшти дека против него ќе биде поднесена соодветна пријава.
Црна хроника
Жена од Скопско тешко повредена: ја прегазил трактор
Вчера во 18.55 часот во СВР Скопје, било пријавено дека во с.Р`жаничино, скопско, трактор „ИМТ“ со скопски регистарски ознаки, управуван од Г.К.(50) од с.Р`жаничино, удрил во пешакот С.Л.(57) од истото село.
Во несреќата со тешки телесни повреди се здобила С.Л., констатирани во Комплекс клиники „Мајка Тереза“ Скопје.
Извршен бил увид од увидна екипа од СВР Скопје.