Daily news
Што открија „Рајските документи“?
Меѓународниот конзорциум на истражувачки новинари (ИЦИЈ) објави истражување за имотот на повеќе светски лидери и моќни личности скриени во фондови и офшор-сметки, кои го откриваат тајниот свет во кој тие ги чуваат нивните милијарди.
Во истражувањето „Рајски документи“ има податоци за офшор-средства на британската кралица за поврзаноста на близок соработник на Доналд Трамп со руски државјани, тајни бизниси на соработникот на Џастин Трудо и за уште 120 политичари и моќни личности.
Исто така, во „Рајските документи“, кои се обелоденија во јавноста, се споменуваат големи брендови и интернационални компании, како што се „Епл“, „Најки“ и „Убер“.
Новинарите истакнуваат дека во документите се споменуваат легални бизниси и деловни потези преку офшoр-компании и фондови, како и дека споменувањето на кое било име не упатува на тоа дека некој го прекршил законот.
Во „Рајските документи“ има информации за парични средства што соработник на Трамп ги добивал од енергетска компанија од Русија, чиј косопственик е зетот на Владимир Путин, за 13 милиони долари, кои преку офшор-компанија ги вложувала кралицата Елизабета Втора, за бизнисите на поранешниот американски генерал Весли Кларк, но и за парите што преку државните компании Русите ги дале во „Фејсбук“ и „Твитер“.
Како што се наведува, зад инвестицијата на рускиот милијардер Јуриј Милнер во Силиконската долина стои лавиринт на офшор-компании, но и пари на руската ВТБ банка и гигантот „Газпром“.
Во „Рајските документи“ се споменуваат и имиња на ѕвезди од забавната индустрија, како Мадона и Боно Вокс, како и начините на кои тие на легален начин го чуваат своето богатство од оданочување.
Во документите се зборува и за деловните врски во англиската Премиер лига и за врските на руски тајкуни со фудбалските клубови„ Арсенал“ и „Евертон“.
Како и во претходното големото откритие „Панамски документи“, кое го истражуваа новинари од повеќе од 100 редакции собрани под капата на ИЦИЈ, клучните документи и овој пат ги доби германскиот весник „Зидојче цајтунг“.
Во „Рајските документи“ има податоци за офшор-активности на 120 политичари и светски лидери, меѓу кои и британската кралица и 13 блиски соработници и донатори на претседателот на САД, Доналд Трамп, како и на 100 мултинационални корпорации, меѓу кои „Најки“, „Епл“ и „Убер“ и производителот на ботокс „Алерган“.
Во наредните денови се очекува објавување на низа документи. Гигантот „Еплбај“, еден од лидерите во офшор-бизнисот, најверојатно е извор на документите, а соопштено е дека тие најверојатно се украдени во сајбер-напад минатата година.
„Еплбај“ веќе објави дека се занимава исклучиво со легални активности и дека дава услуги на клиенти во рамките на меѓународното право.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.