Daily news
Бужаровска: Правната сигурност не смее да се стави во теснопартиски или персонален интерес
Професорката по кривично право и еден од креаторите на новиот Закон за кривична постапка, д-р Гордана Лажетиќ Бужаровска, е децидна дека непотребно се создаваат правни дилеми со цел да се блокира работата на Специјалното јавно обвинителство.
„Се работи за масовно прислушување и повреда на човековите права и слободи на огромен број граѓани, за заштита на тесно-партиски интереси и не смееме да се повикуваме на правни стандарди и заштити, само затоа што тоа некому му одговара.Државните органи се тука да нè заштитат како граѓани,а не себеси и во тој контекст не треба да се бара заштита или да се глорифицирааат некои правни стандарди и стандарди, само затоа што тоа некому му одговара.Јавниот интерес треба да ги штити граѓаните“, категорична е професорката.
Таа вели дека работата на СЈО не смее никој да помисли да ја блокира или да ја оневозможи бидејќи со прогласување на нешто недозволено се води кон минирање на мандатот на оваа институција.
„Се работи за зона која отвора многу прашања, па оттука доказите не смее да се прогласат како недозволиви бидејќи на тоа се однесува мандатот на СЈО. Врховниот суд мислам дека ќе заземе соодветен став бидејќи е врв на пирамидата на судскиот систем и заштита на граѓаните“, додава Бужаровска Лажетиќ.
Според неа, тесноправнички толкувања како снимањето да го правел поединец е неприфатливо, па оттаму правната сгурност не смее да се стави во теснопартиски или персонален интерес
Во однос на тоа дали СЈО има право да поднесува барање за заштита на законитоста до Врховниот суд, што е второто правно прашање за кое треба да одлучува Врховниот суд на општа седница,Бужаровска нема дилеми.
„Ме разочара непознавањето на правните норми. Незнаењето на правото може да биде во полза на некој што е неук, но не и на обвинителството.Точно е дека во Законот за кривична постапка не фигурира СЈО, меѓутоа тоа е на исто ниво со редовното обвинителство,кога станува збор за работи од неговиот мандат“,вели професорката.
Таа потсетува дека постои посебен член во Законот за судовите,кој вели дека кога барањето е поднесено, а не е е изречно наведено, не може да се одбие само затоа што има правна празнина.
„Во секој момент СЈО може да поднесе БЗЗ.За предмет кој го води и оформило СЈО,а не го презеле, не постои ниту една основа редовното обвинителство да поднесе БЗЗ.Се надевам дека Врховниот суд ќе има доблест да не го урниса правниот систем бидејќи ова го знаат и нашите студенти по право“, категорична е Бужаровска Лажетиќ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.