Daily news
Зоран Заев за БГНЕС: Македонија нема да биде двонационална држава
Македонија нема да биде двонационална држава. Нема да ги менуваме државните симболи. Бугарија отсекогаш имала принципиелна позиција и пријателски однос кон нас. Ова се ставови на претседателот на Социјалдемократскиот сојуз, Зоран Заев, дадени во интервју за бугарската агенција БГНЕС.
„Очекувам во Македонија демократските процеси да се движат во согласност со Уставот, деловникот на Собранието и законите на Македонија. Тоа значи новоизбраниот претседател на Собранието да добие печати, да биде прогласен за избран во Службен весник, а потоа да го пушти писмото до претседателот Ѓорге Иванов за давање мандат на новиот кабинет. Ова се работите што секој нормален човек ги сака во нашата Македонија. Сепак, ова е можно со многу трпение, бидејќи нашиот политички противник не е подготвен да ја предаде власта. И денес го опструираше новиот претседател да не почне да ги исполнува своите обврски. Нашите противници сфаќаат дека има демократски избран претседател. Честитки дојдоа од целиот свет – од ЕУ, од САД. Но, за жал, не можам да кажам дека нема да прават пречки. Сепак, прашањето ќе биде решено преку легални процедури“, објасни Заев.
„Правото на протест е загарантирано во секоја демократска држава. Поради оваа причина минатиот четврток одговорив на сите прашања на опонентите од ВМРО-ДПМНЕ. Јасно одговорив дека сè што ќе правиме ќе биде во интерес на интегритетот на Македонија и во согласност со Уставот. Република Македонија нема да биде двонационална држава, таа ќе остане таква каква што е. Никој нема да наметнува странски интереси. Во однос на “Тиранската платформа” – тука станува збор само за преговори меѓу политичките партии за формирање влада. Сè што ќе прави владата ќе биде во интерес на сите нејзини граѓани и на Република Македонија“, изјави Заев во интервјуто.
Сепак, нагласи тој, „во декларацијата на албанските партии има една спорна точка и ние јасно кажавме дека не се согласуваме со неа. Тие сакаат да започне дебата за државните симболи на Република Македонија – за знамето, грбот и химната. Ние не можеме да ги запреме дебатите, но ние сме против оваа промена. Против промената на уставното име на нашата земја – Република Македонија. Сето ова служи како алиби на нашиот политички противник, за да не ја предаде власта на новото парламентарно мнозинство“, рече Заев. Тој беше категоричен дека не држат обвинувањата дека ги распродава интересите на Макеоднија за да дојде на власт. . „Роден сум недалеку од бугарската граница. Се што имам, е Македонија и нема да ги продавам националните интереси. Македонија е татковина на Македонците и на другите заедници – знаете тука имаме Бугари, има Срби, Роми, Власи, Турци, имаме и Албанци. Таа е наша татковина“, порача тој во интервјуто.
Околу односите со Бугарија, Заев најави нормализација и подобрување на односите.
„Бугарија е пријател на Македонија, и тука нема никаков спор. Бојко Борисов како поранешен и иден премиер ни се јави и на мене, и на Никола Груевски. Ова е демонстрација на загриженост за Македонија и за сите нејзини граѓани. Тоа е пријателски однос. Има желба да помогне, и јас лично сум благодарен за овој однос од страна на еден голем пријател на Македонија и иден премиер“, рече Заев, па додаде:
„За Бугарија ние сме братски луѓе, еден народ. Македонија сака нормализација. Како потенцијален носител на мандат испраќам пријателски поздрави до Бугарија од соседна Македонија, која сака да биде полноправна членка на ЕУ и НАТО. И тоа природно може да се случи ако ја продлабочиме соработката и со Бугарија“, рече Заев во интервјуто за БГНЕС. крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.