Daily news
Седницата за разрешување на Зврлевски е одложена за среда
Расправата за разрешување на јавниот обвинител Марко Зврлевски е одложена за среда.
Пратеникот Илија Димовски од ВМРО-ДПМНЕ на денешната расправа предложи да се испрати писмо до антикорупциската комисија, која треба да даде толкување дали расправата за Зврлевски е во согласност со законот или не.
„Предлагам да испратиме писмо до Комисијата и кога ќе добиеме одговор, за ден-два, ќе продолжиме со дискусија ако сте во право, а ако не сте, ќе ја прекинете расправата. До тогаш Собранието може да расправа за депонијата во Струга, за пожарите, за центрите за бегалци…“, рече Димовски.
Претходно пратеникот на СДСМ, Томислав Тунтев, пак, ги повика пратениците од опозицијата да се откажат од дебата и ова прашање да се затвори уште денеска.
„Да се откажеме од дебатата, да ја прекинеме и пред целата јавност да покажеме дека сме конструктивни. Да ја завршиме расправата и да им отвориме пат на реформите“, рече Тунтев.
Реплицира пратеникот Антонио Милошоски, кој рече дека правото на дебата е основно за секој пратеник и побара расправата за Зврлески да се стави во мирување.
„Тунтев нема право да нè повикува да се откажеме од дебата. СДСМ три години промовира дека треба да има дебата, а сега бега од неа. Колега Тунтев, откажете од се од патните трошоци од 105 илјади денари и јас ќе се откажам од дебата“, рече Милошоски.
Собранискиот спикер, пред да даде пауза, образложи дека Деловникот не ги спречува пратениците да бараат автентично толкување на одреден член од законот. Додаде дека тој ќе ја продолжи седницата во согласност со своите деловнички надлежности.
„Јас се однесувам во согласност со моите надлежности. Во контекст на свикување седница одлучува претседателот. И во согласност со тоа што ми го наложува законот, свикав седница. Немам дилема за моите надлежности, а ако сметате дека е прекршен некој закон, побарајте толкување“, рече Џафери.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.