Daily news
Тарчуловски бара од судијката Димишкова да присуствува на обраќањето на Столтенберг
Пратеникот од редовите на ВМРО-ДПМНЕ, Јохан Тарчуловски, упати барање до судијката Весна Димишкова, која му одреди куќен притвор, да присуствува на собраниската седница в четврток кога генералниот секретар на НАТО ќе се обрати пред пратениците.
Според дописот, Тарчуловски наведува дека неговото присуство на седницата е во насока на неговите заложби и ветувања пред граѓаните за целосна интеграција на Македонија во евро-атлантските структури. „Почитувана судија Димишкова, преку медиумите беше објавено, а воедно и најавено преку веб-страницата на Собранието, дека на 18 јануари во 12 часот во парламентот ќе се обрати генералниот секретар на НАТО, Јенс Столтенберг. Имајќи го предвид ова, како и фактот дека со решение на Основниот суд Скопје 1, одделение за организиран криминал и корупција, определена ми е мерка куќен притвор, Ве молам во периодот од 11 до 15 часот да ми биде дозволено од страна на судот да присуствувам на обраќањето на Столтенберг. Ќе ми биде особена чест и задоволство да го слушам неговото обраќање во Собранието бидејќи сум голем поддржувач на нашата интеграција во НАТО и ЕУ“, се вели во барањето.
Тарчуловски додава дека е свесен за фактот оти во согласност со уставните и законските надлежности му е одземен пратеничкиот имунитет од страна на Собранието, односно одобрено е барањето на судот за определување на мерката куќен притвор.
„Но, треба да се има предвид дека во согласност со Уставот и Деловникот на Собранието, во оваа фаза од постапката сè уште ја извршувам функцијата пратеник во Собранието. Во таа смисла сметам дека моето присуство на седницата, на која ќе се обрати Столтенберг, е во насока на реафирмација на моите заложби и ветувања што ги дадов пред граѓаните и пред моите гласачи за целосна и безусловна интеграција на земјата во евро-атлантските структури. Од оваа моја заложба не отстапувам и понатаму, независно од сите политички и општествени случувања во државата и независно од судската постапка што се води против мене, па оттука сметам дека за судот нема да претставува пречка одобрувањето на ова барање како мое уставно и демократско право во согласност со функцијата што сè уште формално-правно ја извршувам. Верувам дека судот ќе ги цени овие мои заложби, а особено ќе го цени моето целосно почитување на определената мерка куќен притвор, односно фактот дека од кога таа е определена, го немам напуштено мојот дом, каде што оваа мерка се спроведува. Во таа смисла не постои никаква опасност да ја прекршам судската забрана за напуштање на мојот дом, освен во оваа исклучителна околност на неколку часа, се разбира, со одобрение на судот. Дополнителна гаранција за ова се целосниот кредибилитет и довербата што ја уживам кај граѓаните, но и фактот што сум избран претставник на сите граѓани во Собранието, функција на која сум обврзан да ја вршам со целосно почитување на Уставот и законите“, се наведува во барањето на Тарчуловски до судот.
В. Ј.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.