Народното движење за Македонија (НДМ), на чело со претседателот Јанко Бачев, во понеделник поднесоа тужба за поништување на седум кандидатски листи и поништување на изборните резултати од овие листи.

„Овие листи се незаконски од најмалку четири причини: Прво, во една листа сите кандидати се машки лица иако според Изборниот законик најмалку 40 осто од кандидатите мора да му припаѓаат на помалку застапениот пол, односно, кандидати жени. Второ, во две листи на една партија на секои три места нема кандидат-жена иако според Изборниот законик на секои три места најмалку едно место му припаѓа на помалку застапениот пол, односно женско лице“, рече Бачев.

Третата причина е дека со одлука на ДИК со која се потврдуваат листите кај една коалиција како подносители се утврдени две партии и две здруженија, иако според Изборниот законик подносители на листи се регистрирани политички партии или група избирачи, што значи дека законот не дозволува подносител да биде здружение на граѓани.

А како четврта причина Бачев наведува дека сите листи на партиите ДУИ, ДПА, Беса и Алијанса за Албанците се поднесени само на албански јазик, иако според Изборниот законик, подносителите на листите во изборните единици во кои најмалку 20 отсто од граѓаните зборуваат службен јазик различен од македонскиот, поднесувањето на листите може да се врши и на друг јазик и овој услов е законски само во Изборната единица број 6, меѓутоа, овие партии листите ги поднеле на албански јазик и во изборните единици 1,2,3, 4 и 5 каде нема најмалку 20 отсто население кое зборува јазик различен од македонскиот.

Тој се надева дека судечкиот судија кај кој ќе падне предметот ќе покаже храброст и знаење и ќе одлучи според логиката на правото./крај/мф/бб