Македонија
Случај „Актор“: Две од фирмите подизведувачи на автопатот Демир Капија-Смоквица биле основани кога почнала изградбата
Moлк од фирмите подизведувачи што вчера специјалното јавно обвинителство ги осомничи за перење пари за изградбата на автопатската делница Демир Капија-Смоквица. „Макфакс“ од фирмата „Глобал констракшн компани“ ДООЕЛ од Скопје побара одговори на прашањата дали направиле интерна ревизија и дали утврдиле финансиски неправилности при спорната градба на автопатот. Наместо одговор, добивме повратен имејл со линк до порталот „Репбулика“, каде што е објавен напис дека според Европската канцеларија против измами – ОЛАФ, нема незаконски активности во изградбата на автопатот.
Почетокот на градежните активности беше на 8 септември 2012 година кога беше поставен камен-темелникот, во присуство на тогашниот премиер Никола Груевски и вицепремиерот Зоран Ставрески. Фирмата „Глобал констракшн компани“ ДООЕЛ, која е една од фирмите подизведувачи, според увидот што „Макфакс“ го направи во Централниот регистар, е основана на 23 декември 2012 година или неполни три месеца по почнувањето на активностите за изградба на автопатот. Сопственик на фирмата е Гркот Христос Ангеликас со адреса во Атина. Управител на фирмата е исто така Грк, Михаил Зикос, од Атина. Втората фирма подизведувач, што СЈО ја сомничи за перење пари, „Топометрија“ ДООЕЛ од Скопје, е регистрирана со адреса на улица Христо Смирненски. Основана е на 5 декември 2012 година со основачки влог од 5.000 евра. Сопственик и управител на фирмата е Гркот Георгиос Папастамос од Атина. Тој досега не одоговори на пораката што му испрати „Макфакс“.
Според СЈО, во периодот од 2012 до 2016 година со повеќе дејства, со искористување ист траен однос, непосредно по добивањето на тендерот и започнувањето со градежните активности во Македонија, што ги презема „Актор АДТ подружница Скопје“, формирана од осомниченото правно лице „Актор СА“, Република Грција, со намера да ја скрие целокупната добивка на осомниченото правно лице, која има третман на принос од казниво дело бидејќи паричните средства потекнуваат од незаконито добиениот тендер со кривично дело злоупотреба на службената положба и овластувањето, шестоосомничениот како одговорно лице на подружницата формирал група што се занимава со перење пари и пуштање во промет пари што се прибавени со казниво дело.
Шестоосомничениот како управител на подружницата на „Актор АДТ“ – Скопје договорил трајна деловна соработка во вид на договор за вршење подизведувачки работи со другите осомничени одговорни лица како преставници на осомничените правни лица „Глобал констракшн компани“, „Топометрија“ ДООЕЛ Скопје и „Инвикта Боро“ ДООЕЛ Скопје, со единствена цел пренос на парични средства од „Актор АДТ подружница Скопје“ кон правните лица „Глобал констракшн“ ДООЕЛ Скопје, „Топометрија“ ДООЕЛ Скопје и „Инвикта Боро“ ДООЕЛ Скопје. Во повеќе наврати биле исплатени износи од сметките на „Актор АДТ подружница Скопје“ кон сметките на правните лица „Глобал констракшн компани“, „Топометрија“ и „Инвикта“ во вкупен износ од 31.856.811 евра.
СДСМ во 2014 година објави дека преку филијалата на Стопанска банка АД Скопје во Неготино се одвивала исплатата на милионски суми во кеш на стотина грчки државјани, во случајот „Актор“. Ова во 2014 година го објави на прес-конференција тогашниот портпарол Петре Шилегов. „Доаѓаат со автобус во банката во Неготино, ги подигаат парите во евра, ги предваат во просториите на банката на едно лице и заминуваат со автобус за Грција“, рече тогаш Шилегов.
Тој го објави списокот на имиња со трансакциски сметки на грчките државјни што ги подигале парите. За нецела година во земјата со оваа цел влегле 96 лица, граѓани на Р. Грција. Деветмина од нив се со исто презиме, но со различно име. Некои се појавиле по два, три или четири пати во РМ. На овие лица преку банката кешот им се исплаќа по основа на договор за дело од грчката фирма „Актор“, која е изведувач на автопатот. При секоја исплата, како што објави тогаш Шилегов, е присутна Атина Зога, сметководителка на „Актор“, на која ѝ била давана готовината. Сумите биле од 20.000 до 90 илјади евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Николоски: На 8 мај потребна е масовна референдумска излезност за влада на ВМРО-ДПМНЕ која нема да е уценувана од никого, за СДСМ и ДУИ во опозиција
„Во првиот круг му поставував прашања на Пендаровски, не одговори на ниедно. Наместо да одговара прашања, плаќаше ботови по социјални мрежи лично да ме навредуваат мене и моето семејство, народот му кажа што мисли за тоа. Но, морам да го прашам уште нешто затоа што се работи за злоупотреба на државни пари“, истакна носителот на ВМРО-ДПМНЕ во ИЕ 4 Александар Николоски на денешниот митинг на ВМРО-ДПМНЕ во Општина Кавадарци.
Тој продолжи и додаде: „Пендаровски до денес не одговори дали ќе ги користи или нема да ги користи привилегиите кои ги следуваат поранешните претседатели, еднаш невешто одговори дека за тоа ќе се изјаснел во 2029 година, ама очигледно ќе треба да се изјасни на 12 мај затоа што тогаш и официјално му завршува мандатот, тоа е четири дена после изборите и мислам дека е чесно и кога ќе дојде тука во Кавадарци да каже дали ќе е пензионер со најголема пензија во Македонија и поранешен претседател кој најдолго ќе ги користи народните пари. А во меѓувреме е фер да каже уште вечерва ако може дали е вистина или не од пусти мерак за претседателствувања ама и за користење на привилегии дека побарал да му се отвори вилата во Охрид и ќе седел следни пет дена таму да искористи уште некој ден покрај охридското езеро, дали е вистина ова Стево Пендаровски и дали е вистина дека со цело друштво одиш таму да поседите уште некој ден на државен трошок, одговори пред граѓаните“, истакна Николоски.
Рече дека на 8 мај треба уште помасовно да се излезе, во уште поголем број и разликата во Кавадарци да е уште поголема и додаде дека е потребна масовна референдумска излезност на 8 мај за влада која нема да е уценувана од никого, за СДСМ во опозиција, за ДУИ во опозиција.
„Ве повикувам да ја прочитате нашата програма Платформа 1198, тие не размислуваа на проекти и не реализираа проекти, затоа ние ќе реализираме. Ќе реализираме и експресен пат од Кавадарци до Неготино и спојување на Кавадарци со автопатот. Ќе реализираме и отворање на граничен премин со Грција како би станало многу блиску да се патува помеѓу Кавадарци и Воден и да се спојат овие два дела на географска Македонија. Ќе ги помагаме земјоделците, за лозарите достоинствени цени за виното и рестартирање на Повардарие како би се срушил монополот во откупот на грозје и производството на вино подостоинствен живот за сите, повеќе субвенции и повеќе ред за сите. Затоа на 8 мај масовно да излезете“, дециден е Николоски.
Македонија
Мицкоски од Кавадарци: Мобилизација и масовна излезност, колку повеќе гласаат, толку поголема ќе биде силата за промени
Во првиот круг издвојувавме огромна победа, која покажа дека народот е свесен за тоа што се случува во нашата татковина. Ова е револуција на народот, пред се затоа што преовладува чувството дека во сопствената земја народот стана кираџија. И тоа токму поради дуото СДСМ-ДУИ, рече Христијан Мицкоски, претседател на ВМРО-ДПМНЕ на вечерашниот митинг во Кавадарци.
Мицкоски посочи како ништо не функционира и како институциите не се во корист на граѓаните.
„Институциите повеќе не служат на народот. Се чека за пасоши, лични карти, за документи кои му следуваат на народот. Овој проблем го препуштија да го решава ВМРО-ДПМНЕ и Панче Тошковски, додека во секоја друга сфера има подеднакво назадување. Во здравството докторите и медицинскиот персонал протестираат. Доколку сакате било која здравствена услуга или ќе мора да платите или да побарате врски. Ако не е така ќе мора да чекате по ходници, ќе ве маткаат со процедури, додека не се откажете. Животниот стандард е под секое ниво. Корупција насекаде, правда никаде“, кажа Мицкоски.
Мицкоски укажа дека проблемот е што ДУИ е газдата во државата.
„Нашите, вашите судбини зависат од стотина души на ДУИ кои контролираат се. Артан Груби и компанијата се господари на Македонија, но и одговорни за колективниот грабеж. Велат дека ДУИ никогаш немал подобар партнер за власт како СДС. Што и да им побарале, не добивале сто проценти, туку дупло двеста. И затоа е и сега нервозата во ДУИ, зошто знаат по овие избори ниту ќе имаат власт, ниту пак ќе имаат измеќари како СДС“, изјави Мицкоски.
Мицкоски рече дека овие денови силно се ангажирани на две сценарија кои во суштина се завера против Македонија.
„Првото е сценарио на бојкот. Второто сценарио е пазарџиска делба со ДУИ на ресори и министерства, при што Ковачевски оставил на Ахмети сам да одреди колку министерства ќе му остави на СДСМ. И двете сценарија се губитнички за Македонија и удираат по нејзините основи“, кажа Мицкоски.
Мицкоски заклучи дека решението за сето ова е масовна излезност.
„Мобилизација и масовна излезност. Решението и за бојкотот и за пазарџиската поделба на ресори е само едно масовно гласање на избори. Колку повеќе гласаат, толку поголема ќе биде силата за промени“, рече Мицкоски.
Македонија
Битиќи: На 8-ми мај да се спротивставиме на политиките на поделби, за сплотена и силна Македонија
„Грешките во владеењето можеме да ги поправиме, но поделбите во општеството нема да ги залечиме доколку на 8-ми мај не се спротивставиме на политиките на раздорот, на национализмот, на сеењето страв. Социјалдемократскиот сојуз е единстваната обединувачка политичка партија за силна и сплотена Македонија – земја и европски дом во кој ќе има место за секого, независно од неговата етничка, религиозна, културна, политичка или социјална припадност“, порача на денешните средби со жителите на Топаана и Шуто Оризари, Фатмир Битиќи, потпретседател на СДСМ и ко-носител на листата на кандидати за пратеници на Коалицијата за европска иднина во Изборна единица 2.
Тој кажа дека резултатите од првиот круг на претседателските избори не треба да се прифатат со малодушност ниту пак да се обесхрабрувачки, туку треба да се перцепираат како предизвик кој во себе носи можност за сплотување на сите прогресивни сили во државата за двојните избори на 8-ми мај.
„Со нашата предизборна програма нудиме повеќе од економски раст и развој, повеќе од повисоки плати и пензии, многу повеќе од европски животен стандард, ние нудиме иднина во која секој граѓанин ќе биде прифатен, почитуван, градиме земја во која ќе владее дијалогот, меѓусебното разбирање, а не раздорот. Затоа на 8-ми мај, победата на СДСМ и коалицијата ќе значи пораз на стравот од различностите, на поделбите. Ќе зачекориме кон заедничка и споделена европска иднина“, порача Битиќи.
Зборувајќи за концептот на едно општество за сите, како суштинска политичка вредност на СДСМ, тој ја нагласи потребата граѓаните да го отфрлат национализмот како свој политички избор, затоа што тој е наметнат избор.
„Ве повикувам заеднички да го отфрлиме национализмот кој е надвиснат над Македонија, да кажеме НЕ на ксенофобијата, да се ослободиме од стравовите и да го прифатиме единството, единството во различностите бидејќи таму лежи нашата сила. Верувам во вас, во граѓаните, верувам дека тоа ќе го препознаете, дека ќе ги отфрлите политиките кои ви се наметнуваат од елити кои немаат што да ви понудат освен да ве туркаат кон минатото и поделбите“, рече Битиќи и додаде дека Македонија не е само ВМРО-ДПМНЕ, Македонија е многу повеќе, таа е на сите, на Македонци, Албанци, Срби, Турци, Роми, Бошњаци, Власи.
„Нашата сакана земја е на сите нас кои се бориме за европска држава, а кои сме повеќе, многу повеќе од тие што се прикажуваат како победници во првиот круг на претседателските избори. Затоа нема откажување, заеднички, едни покрај други, рамо до рамо, сите различни, продолжуваме и победуваме на 8-ми мај“, порача Битиќи.