Свет
Четворица штитеници мртви за две недели
Полицијата била повикана да поведе истрага за смртта на една 30-годишна жена оти постоеле сомневања за причините од што починала
ВО СПЕЦИЈАЛНИОТ ЗАВОД ВО ДЕМИР КАПИЈА
Полицијата била повикана да поведе истрага за смртта на една 30-годишна жена оти постоеле сомневања за причините од што починала
Смртта на четворица штитеници во рок од 15 дена ги вознемири вработените во Специјалниот завод во Демир Капија, единствена институција во државата што згрижува најтешко ретардирани лица. За една од настраданите штитенички била поведена и истрага, бидејќи постоеле сомневања во причината за смртта. Вработени обвинуваат дека во тешки услови, кога во установата владее грип, директорот и единствениот лекар во заводот биле на седумдневен семинар во Србија.
Нашите извори, кои сакаат да останат анонимни, велат дека квалитетот на исхраната што ја добивале 330 тешко и најтешко ментално ретардирани лица е лош, нема доволно чаршафи, а поради недостиг од памперс-пелени на неподвижните им биле ставани стари и искинати крпи. Некои од децата немале чорапи, а боси не можеле да одат на вежби. Нашите извори тврдат дека смртноста во заводот споредено со истиот период во претходните години била зголемена.
Лекарот Јордан Нечев потврдува дека за смртта на една 30-годишна штитеничка побарале полициска истрага оти постоеле сомневања од што настапила смртта.
– Истрагата треба да потврди дали се работи за автоагресија, напад од друг штитеник или напад од друго лице во заводот – вели Нечев.
Тој негира дека меѓу згрижените има зголемена смртност. Според него, дали има или нема зголемување на смртните случаи, може да се каже кога ќе се споредат бројките од цела календарска година.
– Дури и ако има зголемена смртност, тоа не е поради негрижа, туку поради стареење на штитениците, нивната истоштеност и неможноста сами да се хранат. А установата нема доволно вработени за да ги храни со лажичка – вели Нечев.
Некои од штитениците, кои се неподвижни, како што вели тој, сонце не виделе со години. Нечев ги повикува надлежните да го решат проблемот со некои од болниците што одбивале да ги примат нивните штитеници како пациенти заради староста или менталната ретардираност. Тој потврдува дека има грип, но дека не е од епидемиолошки размери, иако издале наредба за забрана на посети кај штитениците. Лекарот признава дека во заводот нема доволно ќебиња, но вели дека има памперс.
Директорот Петре Николов, кој со Нечев вчера се врати од Дефектолошките денови во Србија, соопшти дека со функцијата во октомври лани наследил и долгови од околу 17 милиони денари. Наишол на празна каса бидејќи биле потрошени сите пари за јавни набавки. Благодарение, вели, на надлежното министерство, со ребалансот на буџетот биле покриени долговите. Новото раководство се трудело да ги исправи 11-те аномалии во јавните набавки што биле утврдени со ревизијата на работењето на установата во 2005 година. Министерството за труд и социјала ја прифатило новата систематизација, која предвидува 189 работници во институцијата, наспроти сегашните 124.
– Има поединци на кои не им одговара доброто работење во заводот, па сега прават проблеми – смета Николов.
Тој негира дека исхраната била лоша и дека невработено лице располага со хуманитарната помош, како што тврдат луѓе што сакаа да останат анонимни.
Светлана Дарудова
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Шефот на НАТО: Кина сака добри односи со Западот и и помага на Русија, не може да ги има и двете
Кина мора да престане да ја поддржува руската војна во Украина ако сака да ужива во добри односи со Западот, изјави денеска генералниот секретар на НАТО Јенс Столтенберг, предупредувајќи го Пекинг со невообичаено остри зборови дека не може да ги има и двете. За време на посетата на Берлин, шефот на западната воена алијанса рече дека помошта на Пекинг е од витално значење за воените напори на Москва бидејќи ја зајакнува воената економија на Русија со споделување на врвна технологија, како што се полупроводниците.
„Минатата година Русија увезе 90 отсто од својата микроелектроника од Кина, која се користи за производство на проектили, тенкови и авиони. Кина исто така работи на Русија да и обезбеди подобрени сателитски способности“, рече Столтенберг. „Кина вели дека сака добри односи со Западот. Во исто време, Пекинг продолжува да го поттикнува најголемиот вооружен конфликт во Европа од Втората светска војна. Не може да ги има и двете“, предупреди тој.
Столтенберг ги предупреди западните сојузници да не станат зависни од Кина како што беа од Русија. „Во минатото направивме грешка што станавме зависни од руската нафта и гас. Не смееме да ја повториме таа грешка со Кина и да зависиме од нејзините пари, суровини и технологии. Зависноста не прави ранливи“, додаде тој.
Кина ги зајакна трговските и воените врски со Русија во последниве години, бидејќи САД и нивните сојузници воведоа санкции и на двете, но особено на Москва, поради нејзината инвазија на Украина. Рускиот претседател Владимир Путин изјави во четвртокот дека планира да отпатува за Кина во мај, но не прецизираше точно кога.
Свет
САД градат привремено пристаниште во близина на Газа за испраќање хуманитарна помош
Соединетите Држави почнаа да градат пристаниште во Газа, соопшти денеска Пентагон, проект кој треба да ја олесни испораката на хуманитарна помош на палестинската територија. Пристаништето треба да профункционира на почетокот на мај.
Во март, претседателот Џо Бајден објави дека американската војска ќе изгради привремено пристаниште на медитеранскиот брег на Газа за да добива хуманитарна помош по море.
Изградбата е дел од напорите да се спречи гладувањето во палестинската енклава, која веќе пет месеци се наоѓа во средината на израелската воена кампања против Хамас, која го опустоши Појас Газа и ги потопи нејзините 2,3 милиони луѓе во хуманитарна катастрофа.
„Можам да потврдам дека американските воени бродови, вклучително и УСНС Бенавидез, почнаа да градат привремено пристаниште…“ изјави за новинарите портпаролот на Пентагон, Патрик Рајдер.
ОН предупредија дека Газа е во опасност од глад и се пожалија на „огромни пречки“ при добивањето помош и нејзино дистрибуирање низ енклавата.
Агенциите за помош и администрацијата на Бајден го молеа Израел да ја олесни испораката на помош во Газа и да им дозволи на нивните конвои безбедно поминување на територијата.
Рајдер рече дека Пентагон следи некој вид минофрлачки напад во Газа што предизвика минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.
Свет
(Видео) Големи поплави во Танзанија, загинаа 155 луѓе
Во поплавите во Танзанија загинаа 155 луѓе, а најмалку 236 се повредени, изјави денеска премиерот Касим Мајалива. Во поплавите оштетени се повеќе од 10.000 куќи.
Премиерот додаде дека обилните дождови предизвикани од Ел Нино и придружени со силен ветер доведоа до поплави и лизгање на земјиштето во различни делови на земјата.
„Многу луѓе загинаа. Имаше штета на посевите, куќите, инфраструктурата како патишта, мостови и железници“, рече Мајалива.
Поплави ја погодија и Кенија, која се граничи со Танзанија на истокот на Африка, при што загинаа повеќе од 30 луѓе, пишува Си-ен-ен.
Во Кенија врне силен дожд од средината на март, а врнежите се интензивираа минатата недела. Кенискиот Црвен крст изврши повеќе од 188 спасувачки операции од март. Властите вчера затворија некои патишта во главниот град на Кенија, а неколку населби беа поплавени.