Европа
Берлин за намалување на структурни фондови за земјите кои се против бегалските квоти
Германскиот министер за внатрешни работи Томас де Мезиер во вторникот по неуспешната средба за распределба на бегалците и мигрантите по земјите членки на Европската унија, ја спомена можноста членките кои одбиваат да ги прифатат задолжителните квоти бегалци, да добијат помалку пари од структурните фондови на Унија.
„Мораме да зборуваме за начините на притисокот“, изјави за германската јавна телевизија ZDF, министерот за внатрешни работи Томас де Мезиер.
Земјите кои одбиваат распределба во согласност со квотите „често се земји коишто примаат многу европските структурни фондови“, додаде Мезиер, и изрази жалење поради „изостанокот на солидарност“.
„Сметаме дека е праведно …. да примаат и помалку финансиски средства од Европа“, рече Мезиер додавајќи дека го одобрува сличниот предлог што го изнесе претседателот на Европската комисија, Жан-Клод Јункер.
Во понеделникот навечер министрите за внатрешни работи на 28-те земји членки на ЕУ на итниот и вонреден состанок во Брисел, не успеаја да се договорат за задолжителните квоти за распределба на вкупно 120.000 бегалци. Против квотите беа земјите од Вишеградската група, Словачка, Чешка, Полска и Унгарија, како и Романија, Латвија и Велика Британија.
По средбата беше објавено дека постои начелна согласност за распределбата на 120.000 мигранти, како и дека за спроведувањето на таа согласност ќе се разговара на состанокот за министрите за внатрешни работи на 8-ми октомври во Луксембург.
Министрите, пак, претходно во понеделникот на истиот состанок во Брисел одлучија да се распределат 40.000 бегалци.
Станува збор за привремен вонреден механизам со кој треба да им се помогне на Грција и на Италија, земјите во коишто прво влегуваат бегалците од северна Африка, од Блискиот исток и од Азија на територијата на Европската унија. Одлуката се однесува на лицата коишто според меѓународното право имаат право на заштита и кои пристигнале или ќе пристигнат на територијата на ЕУ во периодот од 15-ти август 2015 до 16-ти септември 2017 година./крај/мф/сн
Извор: AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.