Европа
Челниците на Донецк и Луганск го потпишаа договорот на ’четворката’ – договор
Челниците на одметнатите источни украински региони и самопрогласени ткн. „народни републики“ Донецк и Луганск, Александр Захарченко односно Игор Плотницки, сепак, го потпишаа договорот кој претходно во Минск го постигнаа челниците на Украина, Русија, Франција и Германија за надминување на кризата и запирање на крвопролевањата во Украина.
Челниците на одметнатите источни украински региони и самопрогласени ткн. „народни републики“ Донецк и Луганск, Александр Захарченко односно Игор Плотницки, сепак, го потпишаа договорот кој претходно во Минск го постигнаа челниците на Украина, Русија, Франција и Германија за надминување на кризата и запирање на крвопролевањата во Украина.
Претходно агенциите пренесоа дека двајцата челници на рускојазичните бунтовници на состанокот на Контактната група, кој се одржуваше паралелно во белоруската престолнина со средбата на четворицата челници, одбиле да го потпишат договорот постигнат по 16-часовните преговори. Кусо подоцна германската канцеларка Ангела Меркел за новинарите изјави дека челниците на одметнатите „републики“ во Донбас, Александр Захарченко и Игор Плотницки, сепак, под влијание на рускиот претседател Владимир Путин го потпишале договорот со кој се предвидува во прв ред безусловен прекин на огнот кој ќе стапи на сила на полноќ на 15-ти февруари.
Притоа, Захарченко од своја страна истакна дека точките од договорот бараат дополнително појаснување, пренесува агенцијата ТАСС.
„За сите точки (од договорот) потребни се дополнителни усогласувања, притоа, доколку има нови нарушувања на нив, нема да има никакви нови средби и меморандуми“, порача Захарченко.
Притоа истакна дека „благодарение на гаранциите на претседателот на Русија, канцеларката на Германија и на претседателот на Франција, денеска го потпишавме договорот, којшто, како што ние се надеваме, ќе стави крај на непријателството и ќе дозволи Донецката народна република и Луганската народна република ќе започнат мирна изградба за доброто на нашиот народ“.
„Со овој чекор, ние ќе помогнеме да се промени и самата Украина“, смета шефот на самопрогласената република.
Текстот на заедничкиот документ беше донесен по 16-часовните преговори во Палатата на независноста во Минск, меѓу претседателите на Украина, Русија и Франција, односно Петро Порошенко, Владимир Путин и Франсоа Оланд, и германската канцеларка Ангела Меркел, кој прво челниците на проруските бунтовници одбија да го потпишат.
Паралелно со преговорите на четворката се водеа и преговорите на Контактната група, во која од украинска страна учествуваа специјалниот претставник за хуманитарни прашања, челникот на граѓанската организација Украински избор, Виктор Медведчук и поранешниот украински претседател Леонид Кучма. Побунетиот рускојазичен украински југоисток го претставува челниците на самопрогласените Народни републики во Донецк и во Луганск, етничкиот Украинец, Александар Захарченко и Игор Плотницки. На преговорите учествува и специјалниот претставник на ОБСЕ, Хајди Таљивиани, и рускиот амбасадор во Киев, Михаил Зурабов, кои беа посредници во преговорите.
Текстот на договорот од Минск:
1. Итен и сеопфатен прекин на огнот во одделни области на Донецкиот и Луганскиот регион на Украина и негово строго спроведување со почеток од 00 часот и 00 минути (по киевско време) на 15-ти февруари 2015 година.
2. Повлекување на целото тешко вооружување од двете страни на еднакво растојание со цел да се создаде безбедносна зона најмалку од 50 километри во широчина од најмалку 50 километри едни од други за артилериските системи со калибар до 100 мм и повеќе, демилитаризирана зона со широчина од 70 км за повеќецевни ракетни системи и со широчина од 140 км за повеќецевните ракетни систем од типот „Торнадо-С“, „Ураган“, „Смерч“ и тактичките ракетни системи „Точка“ („Точка У“): – за украинските војски од фактичката од сегашната линија на раздвојувањето; – за вооружените формации на одделните области од Донецкиот и Луганскиот регион на Украина од линијата на раздвојување заклучно согласно со меморандумот од Минск од 19-ти септември 2014 година.Повлекување на повеќецевното тешко вооружување треба да започне не подоцна од вториот ден по прекинот на огнот и да заврши во рок од 14 дена.
Во овој процес ќе содејствува ОБСЕ со поддршка на Тристраната Контактна група.
3. За да се обезбеди ефикасно следење и проверка на прекинот на огнот и повлекувањето на тешкото вооружување од страна на ОБСЕ од првиот ден на повлекувањето, ќе се применуваат сите неопходни технички средства, вклучително сателити, беспилотни летала, радарски системи итн.
4. Од првиот дена на повлекувањето ќе започне дијалогот за модалитетите за спроведување локални избори во согласност со украинското законодавство во и Законот на Украина „За привремениот режим на локалната самоуправа во одделни области на Донецкиот и Луганскиот регион“, како и за идното функционирање на овие региони врз основа на посочениот закон.Веднаш, не подоцна од 30 дена, од денот на потпишување на овој документ, да се усвои резолуција во Врховната Рада на Украина со посочените територии, на коишто е воспоставен посебен режим во согласност со Уставот на Украина „ За привремениот режим на локалната самоуправа во одделни области на Донецкиот и Луганскиот регион“ врз основа на основната линија востановена со Минскиот меморандум од 19-ти септември 2014 година.
5. Осигурување помилување и амнестија преку донесување закон за забрана на прогон и казнување лица во врска со настаните што се случиле во одделните области на Донецкиот и Луганскиот регион.
6. Осигурување ослободување на размена на сите заложници и незаконски притворените лица врз основа на принципот „сите за сите“. Тој процес мора да заврши најдоцна до петтиот ден по повлекувањето.
7. Осигурување безбеден пристап, испорака, складирање и дистрибуција на хуманитарна помош за оние кои имаат потреба од неа врз основа на меѓународниот механизам.
8. Одредување на модалитетите за целосно обновување на социо-економските односи, вклучително и социјалните исплати, трансфери, како што се пензиите и други давачки (приходи и доходи, навремена исплата на сите комунални сметки, обновување на оданочувањето во рамките на правната сфера на Украина);
За таа цел Украина ќе ја обнови контролата на сегментот на својот банкарски систем во регионите зафатени од конфликтот, и, веројатно, ќе биде создаден меѓународен механизам за олеснување на таквите трансфери.
9. Враќање на целосна контрола над државната граница на Украина од страна на владата на Украина во сите зони од конфликтот, кои треба да започна од првиот ден по одржувањето на локалните избори и да заврши по сеопфатното политичко регулирање (локални избори во одделни области на Донецкиот и Луганскиот регион врз основа на Законот на Украина и уставната реформа) кон крајот на 2015 година во услови на исполнување на точката 11 од консултациите и договорот со со претставниците на претставниците одделни области на Донецкиот и Луганскиот регион во рамките на Тристраната Контактна круга;
10. Повлекување на сите странски вооружени формации, воена опрема, како и наемници од територијата на Украина под надзор на ОБСЕ. Разоружување на сите илегални групи.
11. Спроведување на уставните реформи во Украина со стапување на сила до крајот на 2015 година на новиот устав, наменет како клучен елемент на децентрализација (земајќи ги предвид особеностите на одделните области од Донецкиот и Лугански регион), како и усвојување на постојано законодавство за специјалниот статус на одделните области на Донецкиот и Луганскиот регион, во согласност со мерките утврдени во забелешката 1, до крајот на 2015 година.
12. Врз основа на Законот на Украина „За привремен режим на локалната самоуправа во одделните области на Донецкиот и Луганскиот регион“ прашањата коишто се однесуваат на локалните избори, ќе бидат разгледувани и договарани со претставниците на одделните области на Донецкиот и Луганскиот регион во рамките на Тристраната Контактна група. Изборите ќе бидат спроведени во согласност со релевантните стандарди на ОБСЕ со мониторинг на ОБСЕ/ОДИХР.
13. Интензивирање на активностите на Тричлената Контактна група, вклучително и преку формирање работни групи за спроведување на соодветните аспекти од договорот од Минск. Тие ќе го одразуваат составот на Тристраната Контактна група.
Забелешка:
Ваквите мерки се во согласност со Законот „За специјален статус на локалната самоуправа во одделни области од Донецкиот и Луганскиот регион“ го вклучуваат следното:
Ослободување од казнивост, истражување и дискриминација на лицата поврзан со настаните кои се случија во одделните области од Донецкиот и Луганскиот регион;
Право на јазично самоопределување;
Учество на органите на локалната самоуправа во назначувањето на челниците на органите на обвинителството и судовите во одделните области на Донецкиот и Луганскиот регион;
Можност за централните органи на извршната влада да заклучуваат со соодветните органи на локалната самоуправа договори за економски, социјален и културен развој на одделните области на Донецкиот и Луганскиот регион.
Државата ќе дава поддршка за социјално-економскиот развој на одделните области од Донецкиот и Луганскиот регион;
Соработка од страна на централните органи на власта во прекуграничната соработка во одделните области на Донецкиот и Луганскиот регион:
Создавање единици на народна милиција според решението на локалните совети со цел да се одржи јавниот ред во одделните области на Донецкиот и Луганскиот регион и
Овластувањата на пратениците од локалните совети и службени лица, избрани на предвремени избори, назначени од страна на Врховната Рада на Украина со тој закон, не можат да бидат предвремено прекинати./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Пристигна првата реакција на Русија на планот за победа на Зеленски
Русија го отфрли планот за победа на украинскиот претседател Володимир Зеленски и рече дека планот нема никаква врска со потрагата по дипломатско или политичко решение за ставање крај на војната и го опиша како себичен гамбит на Зеленски.
Зеленски рече дека неговиот план, чии детали допрва треба да се откриваат, е финализиран по долги консултации. Тој треба да му го претстави на американскиот претседател Џо Бајден и да се обрати на состанокот на Советот за безбедност на Обединетите нации во вторник. Зеленски рече дека неговата иницијатива е дизајнирана да создаде прифатливи услови за Украина, која е во конфликт со Русија повеќе од две и пол години.
Портпаролката на руското Министерство за надворешни работи, Марија Захарова, им изјави на новинарите дека планот изгледа како себичен гамбит на украинскиот лидер кого Москва го обвинува дека се обидува да го вовлече Западот во вистинска војна против Русија.
„Единствената цел е да се спречи распадот на антируската коалиција и тоа, се разбира, нема никаква врска со задачата да се најде политичко и дипломатско решение за ситуацијата во врска со Украина“, рече Захарова.
Таа го повтори ставот на Москва дека Западот треба да престане да го финансира и снабдува Киев со оружје и рече дека секоја иницијатива со наводна цел да се постигне мирно решение е бесмислена ако не ја вклучува Русија. Истовремено, таа рече дека Москва е загрижена за, како што наведува, зголемените провокативни активности на НАТО на границата со Белорусија и додаде дека не исклучува обиди за ескалација на конфликтот во регионот.
Москва, исто така, во петокот го повика Западот за притисок врз Кина поради Тајван, велејќи дека неговите „провокативни“ активности ја поткопуваат регионалната стабилност и меѓународната безбедност. Захарова истакна дека Русија ги поддржува потезите на Кина насочени кон одбрана на нејзиниот суверенитет.
Кинеското Министерство за одбрана во петокот соопшти дека продажбата на американско оружје на Тајван сериозно го прекршува принципот една Кина и одредбите од заедничката официјална комуникација меѓу Кина и САД. Кина во средата објави дека ќе преземе мерки против девет компании поврзани со американската војска за продажба на американско оружје на Тајван.
Европа
Жената што го пријави Французинот во полиција по што се откри грозоморното малтретирање на неговата сопруга: Се однесуваше бедно
Жената по име Наталија е заслужна што Доминик Пелико, кој ја дрогирал сопругата и довел непознати мажи да ја силуваат додека тој снимал сè, се наоѓа пред суд.
Пелико беше уапсен во септември 2020 година во супермаркет во Карпентрас кога снимал жени под нивните здолништа. Пелико тогаш снимал и под здолништето на Наталија.
Во сведочењето за БФМТВ, Наталија рече дека е среќа што го пријавиле.
Наталија сега се присети на 12 септември 2020 година, кога сè се промени во нејзиниот живот, но и во животот на Жизел Пелико, сопругата на Доминик, која со децении трпела малтретирање, без воопшто да биде свесна за тоа.
Тој ден Доминик снимил три жени, а кога ја свртел камерата кон Наталија, пришол чувар и ѝ кажал што видел: „Тој снимаше под вашиот фустан, сакате да го пријавите?“ Тогаш Доминик Пелико беше приведен, му беше одземена компјутерската опрема и потоа беше откриен случајот со грозоморното малтретирање на неговата сопруга Жизел, кое го шокира светот.
„Го фрлив фустанот што го носев тој ден“, изјави Наталија.
Таа се присети на сите детали од тој ден во супермаркетот.
„Се однесуваше како мал бедник, како да сакаше да каже ‘ама ништо не направив’. Мислам дека сè уште имаше став на жртва“, рече Наталија.
Кога подоцна дознала за степенот на аферата, била шокирана.
„Барем две години, ако не и повеќе, не одев на шопинг во фустан. А фустанот што го носев тој ден го фрлив“, изјави Наталија.
Делумно благодарение на жалбата на Наталија, која отиде во полициска станица, Доминик завршил на суд поради злоупотреба на неговата сопруга Жизел. Наталија, барем до сега, никогаш не ја запознала Жизел Пелико. Сепак, таа навестува дека можеби ќе оди на сослушувањето за да ја поддржи.
Европа
(Видео) Кадиров објави снимка: „Испраќам два вооружени сајбер-камиона во војна во Украина“
Чеченскиот лидер Рамзан Кадиров објави ново видео на социјалните мрежи за кое тврди дека прикажува два сајбер-камиона „тесла“ за кои вели дека ги испратил во зоната на специјалната воена операција. Официјален Кремљ така ја нарекува војната во Украина, што ја почна рускиот претседател Владимир Путин пред две и пол години.
Претходно, на социјалните мрежи се пожали дека Илон Маск од далечина оневозможил едно од неговите возила. Кадиров рече дека далечинското исклучување не влијаело на другите два камиона и дека тие работат нормално.
Kadyrov said he had sent “two more” Cybertruck “to the special military operation zone.” Earlier, he complained that Elon Musk had “remotely disabled one vehicle.”
Kadyrov said that the “remote shutdown did not affect” the other two pickup trucks and that they were “operating… https://t.co/g1eUciaEqA pic.twitter.com/85SizuUxwH
— Anton Gerashchenko (@Gerashchenko_en) September 20, 2024
Двата сајбер-камиона прикажани на видеото се опремени со митралези, како и возилото што Кадиров го покажа во август.