Европа
Стотици бегалци тргнаа пеш од Будимпешта за Виена
Неколку стотици беглаци, главно од Блискиот исток, кои претходно не можеа да отпатуваа од унгарската престолнина Будимпешта за Виена поради запирањето на возовите за Западна Европа, одат пешки по автопатот кон австриската престолнина, известуваат во саботата утрото агенциите.
Колоната бегалци се протега по автопатот од Будимпешта. Во моментов првата група е стигната во висина на градот Татабања, околу 50 километри западно од унгарскиот главен град. Растојанието од 242 километри од Будимпешта до Виена, според самите бегалци, имаат намера да го минат за пет дена. Повеќето од луѓето со себе носат торби со облека, вреќи за спиење и ќебиња. Минатата ноќ тие ја минаа на отворено на двете страни од автопатот, и покрај повремениот дожд.
„Регистриравме околу 4 илјади бегалци, но не мислам дека тоа е крајната бројка. Таа може двојно да се зголеми, ако не и повеќе“, вели за Reuters Хелмут Марбан, претставника на полицијата од покраината Бургенланд. Австриските власти организираа специјални композиции кои бегалците ќе ги префрлувааат до Виена.
Бегалците се движат по самиот автопат и зафаќаат една лента од магистралата, поради што се создава километарска колона од возила. Сепак, возачите не се нервозни и агресивни, некои од нив им подаваат вода и некои продукти, па дури и пари на бегалците, забележува репортерот на агенцијата РИА.
Унгарската полиција не го попречува движењето на колоната, но се обидува колку толку да ја држи ситуацијата под контрола, по должината на патот колоната ја следат полициски возила.
Покрај тоа, унгарските власти организирале и автобуски превоз за бегалците, со кои тие можат да се префрлат до привремениот прифатен камп во градот Бичке, или до австриската граница. Многумина се качуваат во овие автобуси. Според локалните медиуми, до унгарско-австриската граница на овој начин веќе пристигнале околу две илјади бегалци.
Сепак, некои претпочитаат да одат самостојно. „Немаме доверба во властите и полицијата. Или нé оставаат во Унгарија, или нé враќаат во Србија. А нашата цел е да заминеме во Германија или Холандија, каде добро се однесуваат кон бегалците, каде што ги сместуваат во нормални станови а не во шатори…“, вели еден од бегалците.
Во меѓувреме, околу три илјади бегалци остануваат во близина на железничката станица Келети во центарот на Будимпешта. Од дождот се кријат под покривите на паркингот и под подвозниците пред станицата.
„Очекуваме да се подобри времето за да тргнеме кон Виена“, појаснил 30-годишен Сириец кој до Будимпешта пристигнал со сопругата и две мали дечиња./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.