Европската унија во петокот ги продолжи за уште една година економските санкции за полуостровот Крим и градот Севастопол, а истовремено рускиот претседател Владимир Путин повија на подобрување на односите меѓу Унијата и Русија.

Санкциите за Крим и Севастопол и за тамошни политичари, беа воведени од Европската унија во прв ред под притисокот од САД, откако овој црноморски полуостров со мнозинско руско и русофоно население кое по превратот во Киев кога на власт дојдоа прозападните сили, на референдум си ја поврати автономијата укината во 1990-те со осамостојувањето на Украина од поранешниот Советски сојуз и се присоедини на Руската Федерација. Киев, САД и ЕУ тоа го сметаат за руска анексија на украинска територија.

Односите меѓу Брисел и Москва се на голем испит по избувнувањето на украинската криза и меѓусебните обвинувања за тоа кој ја предизвикал и е вмешан. Европската унија се подготвува да ги продолжи и економските санкции директно против Русија, поради нејзината наводна улога во конфликтот во источна Украина, но нејзините челници признаваат дека има земји кои се противат на тоа. Особено оние коишто трпат финансиски загуби поради руските против мерки со ембаргото за увоз на прехранбени и земјоделски производи од западните земји.

Санкциите кои се продолжени во петокот се географски ограничени на Крим и Севастопол, и забрануваат увоз во Европската унија на производи и сировини од овој регион. Санкциите вклучуваат и забрана за извоз на европски продукти и технологии. На европските туристички агенции, исто така, им е забрането таму да работата, што значи дека европските туристички бродови на Крим можат да пристанат само во случај на опасност, а европските граѓани и компании таму не смеат ниту да вложуваат, ниту да купуваат недвижнини, пренесува агенцијата DPA.

Кусо откако беше објавено продолжувањето на санкциите, рускиот претседател Владимир Путин во петокот повика на обновување на односите меѓу Руската Федерација и Европската унија и истакна дека ЕУ на таму е клучниот трговски партнер за Русија. Како што изјави рускиот челник на Меѓународниот економски форум во Санкт Петербург, Русија е подготвена да се најде со ЕУ „на половина пат“, пренесува агенцијата ТАСС.

Путин предложи почеток на преговорите со ЕУ за техника соработка, како прв чекор кон обновувањето на односите. Оцени дека неодамнешните состаноци со претставниците на германските и француските деловни кругови покажале дека европските деловни челници се подготвени на соработка со Русија и сакаат да соработуваат.

„Мораме да ја повратиме довербата во руско-европските односи и да го обновиме нивото на интеракција“, порача Путин потсетувајќи дека Русија не била иницијаторот на наглото прекинување на односите со ЕУ.

„Не сме злопамтила и подготвени сме да се најдеме со нашите европски партнери на половина пат, но тоа секако не може да биде еднонасочен процес“, додаде рускиот челник.

Воопшто западните медиуми оценуваат дека и покрај напнатоста околу Украина, постојат знаци за затоплување на односите меѓи Брисел и Москва, посочувајќи на присуството на форумот во Санкт Петербург на претседателот на Европската комисија, Жан-Клод Јункер./крај/мф/сн

Извор: Макфакс