Европа
Франција нема намера да ѝ достави оружје на Украина
Франција засега нема намера да ѝ достави на Украина смртоносно оружје, изјави во средата францускиот министер за одбрана Жан-Ив Ледриан.
„Мислиме дека треба да пронајдеме политички излез од кризата. Ставот на Русија е неприфатлив, тоа решително го тврдиме и ги продолжуваме санкциите во таа насока. Истовремено со сите средства треба да се избегне продолжување на судирот кој се влошува“, изјави Ледиран на прес-конференцијата одржана во Париз заедно со канадскиот колега Ронб Николсон, пренесува AFP.
Оваа изјава стигна во моментот кога во Европа трае расправата за целисходноста за испорака на смртоносно оружје на Киев, по најавите на САД дека ја разгледуваат можноста за доставување вакво оружје, за украинската армија за справување со рускојазичните бунтовници.
Германската канцеларка Ангела Меркел изјави во вторникот дека нејзината влада нема да ја вооружува Украина за борба против рускојазичните бунтовници, и дека предност им дава на дипломатското решение со закани за построги економски санкции доколку се влоши ситуацијата.
Во понеделникот, шефот на германската дипломатија Франк-Валтер Штајнмаер изрази уверување дека доколку се случи американска испорака на оружје за украинската војска ќе се зголеми бројот на жртвите. „Нема воено решение за конфликтот, тоа им го предочувам, меѓу другите, и на американските пријатели кои го разгледуваат снабдувањето со оружје. Доколку тоа се оствари ќе има многу повеќе загинати. Решавањето на судирот во Украина мора да се бара преку преговори. Сегашните политички решенија да заживеат на преговарачката маса, а никогаш преку нишан“, изјави Штајнамер.
По разгорувањето на судирите на рускојазичниот исток на Украина при што украинската армија загуби неколку позиции, а се зголеми и бројот на цивилните жртви, Вашингтон преку повеќе извори најави оти размислува на Украина да ѝ испорача смртоносно оружје. Законот кој го донесе Конгресот на САД едногласно кон средината на декември одобрува нови санкции против Русија и испорака на смртоносно оружје за Украина. Испораката на такво оружје од САД во Украина беше можна веднаш, но е во надлежноста на американскиот претседател кој засега се противи и одобри само помош во радари, возила, опрема за деминирање, ноќни визири, панцирни елеци и противминофрлачки радари./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Уапсени две млади момчиња: планирале напад со нож на верници во синагога во Германија
Германските власти денеска соопштија дека уапсиле двајца мажи осомничени дека планирале напад со нож врз верници во синагога во Хајделберг, на југозападот на земјата.
Осомничените, на возраст од 24 и 18 години, беа приведени за време на одделни полициски операции во покраината Баден-Виртемберг на почетокот на овој месец, соопштија државните обвинители и полицијата, пренесе АП.
Тие разговарале за убиство на еден или повеќе верници во напад на синагогата, по што ќе следуваше нивна „маченичка смрт“, а сакаа полицијата да ги убие, се вели во заедничкото соопштение на германските власти.
Осомничените се соочуваат со обвиненија за заговор за убиство.
Полицијата го открила заговорот со претрес на домот на повозрасниот осомничен на 3 мај.
При претресот, полицаецот пукал и ранил еден од осомничените откако се фатил за нож.
Доказите запленети за време на претресот вклучуваат размена на онлајн пораки меѓу двајцата осомничени во април, во кои тие разговарале за можен напад на синагогата, соопштија властите.
На 18 мај полицијата го приведе помладиот осомничен и изврши претрес во неговиот стан.
Двајцата осомничени се германски државјани, а 18-годишникот има и турско државјанство, соопштија властите.
Нивните имиња не се објавени.
Германските лидери предупредија на ризиците од напади врз Евреите и го осудија порастот на антисемитизмот по избувнувањето на војната меѓу Израел и Хамас.
Европа
Филипинка се породила на крузер и го сокрила бебето: тоа починало
Истражен судија во Гросето, Италија го отфрли обвинението за убиство против Чан Џенсел Пиа Салахид, 28-годишна Филипинка која се породила на бродот за крстарење „Сребрен шепот“ на 17 мај, а потоа беше уапсена за смртта на детето.
Истражниот судија го потврдил приведувањето, а младата жена останала во затвор, но под обвинение за напуштање дете кое починало. Нејзините двајца колеги, кои ја делеле кабината со неа и кои исто така биле уапсени поради смртта на бебето, биле ослободени.
Тие и помогнале да се породи и биле соучесници во прикривањето.
Како што пишува „Rai News“, по добивањето на резултатите од обдукцијата, судот ги отфрли обвиненијата за убиство. Засега не се знае за што точно ќе биде обвинета жената освен за напуштање на детето.
А, таа цело време пред истражителите, според италијанските медиуми, тврдела дека не сакала да го убие својот син, кого го нарекла Тејлор.
Само се плашела дека ќе остане без работа, па го сокрила. Секогаш кога можела, доаѓала да го дои, според исказите. Бебето го оставала во плакарот со подотворена врата за никој да не го види или слушне неговиот плач.
Европа
Состојбата на Фицо е стабилна, забележително е благо подобрување, велат од болницата
Состојбата на словачкиот премиер Роберт Фицо по минатонеделниот атентат е стабилна со благо подобрување, соопштија денеска од болницата каде што е сместен Фицо.
„Состојбата на премиерот е стабилна со благо подобрување. Веруваме дека напредокот ќе продолжи“, соопшти болницата на платформата Х (Твитер), пренесе Ројтерс.
Фицо минатата среда беше застрелан од 71-годишниот писател Јурај Цинтула, кој веднаш беше приведен од полицијата.
Словачкиот премиер во тешка состојба беше пренесен во болницата каде му беше извршена операција.
Словачкиот суд во саботата одлучи Цинтула да биде задржан во притвор, а тој се соочува со казна од 25 години до доживотен затвор.