Регион
Вучиќ: Ако Хрватска се откаже од вооружувањето, ќе се откаже и Србија
Српскиот премиер Александар Вучиќ ја повика во вторникот Хрватска да се откаже од вооружувањето и порача дека тоа исто ќе го стори и Србија истиот момент кога Хрватска ќе потврди дека нема да се вооружува.
„Истата секунда кога ќе кажат дека тоа нема да го прават, ние нема да купуваме ништо. Нема да купуваме ракети со иста моќност или подеднакво скапи, туку сакаме одбранбени системи. Тоа е едноставно, но ајде нема ниту заштитни, но немојте ниту вие да земате офанзивно оружја“, изјави српскиот премиер Александар Вучиќ во вторникот промовирајќи го скапиот проект „Белград на вода“.
Одговарајќи на прашањето зошто Србија најавува набавка на руски противвоздушен ракетен систем С-300, наместо да вложи во економијата, Вучиќ истакна дека Србија вложува во стопанството, а во оружје нема да вложува доколку и Хрватска одлучи да не се вооружува со ракети. Порача и дека Србија ќе води таква политика додека тој е премиер.
Вучиќ, исто така, нагласи дека Србија не купувала оружје, туку тоа го прави Хрватска, споменувајќи ги панцер хаубиците и лиценците за борбени возила, како и набавката на лансирни рампи за балистички ракети со дострел до 350 километри, практично до централна Србија.
Српскиот премиер не одговори прецизно колку би ја чинело неговата земја набавувањето на ракетниот систем С-300, велејќи дека Србија поволно може да ги реши „своите проблеми“, но дека целта на неговата влада е грижа за ситуацијата во регионот. „Целта на Србија е да се грижи за регионот и мирот во регионот, и со Хрватите и со другите. Кажете дека нема да купувате офанзивно, а ние нема ниту дефанзивно оружје“, порача Вучиќ.
Рускиот вицепремиер Дмитриј Рогозин изјави во понеделникот во текот на неговата посета на Белград, дека Русија ќе го разгледа повикот од Србија за испораки на вооружување на системот за противвоздушна одбрана С-300 и ќе настојува да ја поддржува Србија. „Ќе сториме сé за да осигуриме поддршка за нашиот сојузник на Балканот“, изјави Рогозин на заедничката прес-конференција по разговорите со српскиот премиер Вучиќ./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Tлото на Балканот се тресе: По Хрватска, земјотреси и во Албанија и Грција
Два земјотреси, во растојание од една минута – во 19.19 и 19.20 часот – вечерва се регистрирани на територијата на Албанија.
Земјотресите се со интензитет од 2,1 степен според Рихеровата скала.
Епицентарот на првиот земјотрес бил на седум километри од Елбасан, додека вториот на 62 километри од Тирана.
Според информациите на ЕМСЦ, неколку минути претходно, земјотрес од 2,5 степени имало и во јужниот дел од Грција, а уште два од 2 и 2,3 степени се регистрирани предмалку на Крит.
Претходно денес, Хрватска ја погоди силен земјотрес од 4,7 степени, а беше почувствуван и во Босна и Херцеговина. По овој потрес, следеа неколку помали.
Регион
Не ги навредив Бугарите, туку ја критикував нашата влада, објасни хрватскиот претседател по изјавата на која реагираше Софија
Хрватскиот претседател Зоран Милановиќ изјави дека со изјавата дека Хрватска е „на дното на ЕУ по повлекувањето на европските пари, а само Бугарија е полоша“, не ги навредил Бугарите, туку ја исмејува хрватската влада која прави „будали и социјални случаи“ од нејзините граѓани.
Милановиќ претходно рече дека „Хрватска е дното на Европската унија и дека само Бугарија е полоша“, па секој ден се молат на Бога, Бугарија да остане последна и ништо да не и се случи, бидејќи во спротивно би била Хрватска“. По изјавата, според хрватските медиуми, Бугарите ја повикале хрватската амбасадорка во Софија, Јасна Огњеновац и изразиле незадоволство, пренесува порталот „Индекс“.
Бугарското Министерство за надворешни работи на хрватскиот амбасадор му пренело „длабоко разочарување од изјавата на претседателот Милановиќ“, каде што истакнале „дека изјавата е неприфатлива за Бугарија и не е во согласност со одличните билатерални односи меѓу Хрватска и Бугарија“.
Тие истакнаа и дека се надеваат дека „хрватската влада ќе се огради од таа изјава“.
„Не ги навредив Бугарите, туку исмевав некои елементи на хрватската влада кои не’ прават будали и социјален случај“, рече шефот на хрватската држава и додаде дека претходно ја критикувал земјата на тема повлекување европски пари.
„Дали можеме да кажеме дека Хрватска се моли Сингапур последен да подигне пари? Дали тоа звучи подобро? Но, Сингапур не е европска земја. Значи некој мора да биде последен. Тоа е Бугарија, а Хрватска е претпоследна“, рече Милановиќ и потсети дека тоа се статистички податоци и дека тоа досега го кажал десет пати.
„Тоа е потсмев, за жал, на сметка на некои во Хрватска кои не прават социјален случај, кои не можат да земат доволно европски средства, па затоа сме претпоследни. Нормално, гледаш кој е последен. Бугарија е последна, секогаш е последна (…) Хрватска е претпоследна“, рече Милановиќ.
„И тоа е факт за кој зборував десет пати. Алелуја (…) Тоа се факти за кои мора да се разговара во политиката бидејќи се многу релевантни податоци. Зошто Хрватска е претпоследна? Зошто не е петата одоздола, или петта одозгора. Зошто не е? Веројатно некој е одговорен за тоа“, додаде тој.
На крајот, како што додаде, никој не се моли Бугарија да пропадне, туку дека неговата изјава е верзија на американската шега за сојузната држава Арканзас, која „се моли на Бога Мисисипи, кој е најсиромашниот, да биде здрав и добро“, бидејќи во спротивно тоа би бил Арканзас.
„За да го знаете тоа, треба да прочитате нешто во животот, а не да се занимавате со селски скандали“, рече Милановиќ.
Регион
Земјотрес со јачина од 4,7 степени во Хрватска, почувствуван и во БиХ
Земјотрес со јачина од 4,7 степени според Рихтеровата скала утрово во 05:38 часот е регистриран во Хрватска, објави Европскиот медитерански сеизмолошки центар (ЕМСЦ).
Според информациите од Европскиот медитерански сеизмолошки центар, земјотресот бил на 92 километри јужно од главниот град Загреб и на 14 километри од границата со Босна и Херцеговина, кај Тржачка Раштела.
Земјотресот бил на длабочина од 10 километри.
Земјотресот најмногу бил почувствуван во централна Хрватска и во дел од Босна и Херцеговина со интензитет од V-VI степени според Европската макросеизмичка скала.
Засега нема извештаи за повредени лица или за предизвикана материјална штета.