Европа
Столтенберг ја повика Русија да не ги поддржува бунтовниците во Украина
Генералниот секретар на НАТО, Јенс Столтенберг, ја повика во средата од германската престолнина Берлин Русија да „престане да ги поддржува“ рускојазичните бунтовници во југоисточна Украина, а на Германија ѝ порача да го зголеми издвојувањето за одбраната со појаснување дека оваа земја во споменатиот сегмент мора да покаже лидерство, имајќи ја предвид нејзината силна економија и влијанието во надворешните односи.
„Ја повикуваме Русија да го почитува договорот од Минск, да го употреби сето свое влијание врз сепаратистите за да почнат да го почитуваат примирјето, и да престане да ги поддржува“, изјави на прес-конференцијата во Берлин генералниот секретар на НАТО, Јенс Столтенберг.
Иако се очекуваше дека Столтенберг, кој има добри приватни односи со рускиот претседател Владимир Путин, ќе придонесе за намалување на тензиите меѓу Брисел и Москва кои се на најниското ниво од завршувањето на Студената војна, руската страна му забележува дека ја продолжува политиката на својот претходник Андерс Фог Расмусен. Русија одлучно ги отфрла обвинувањата од Западот дека со техника и војници ги поддржува проруските бунтовници од роскофониот југоисток на Украина кои не ги признаваат прозападните власти во Киев, и бара докази за таквите тврдења. Покрај тоа, Москва истакнува дека не е страна во украинскиот конфликт за кој вели дека е внатрешен.
„НАТО не бара судир со Русија. Тежнее кон поконструктивен однос во кој со Русија ќе се успее да се оствари подобра соработка. Но за да можеме тоа да го оствариме и Русија мора да го посакува истото“, порача Столтенберг по разговорот со својата домаќинка, германската канцеларка Ангела Меркел,
„Германија е клучната земја во Европа, Германија има најсилна економија во Европа и е пример за многу во Европа“, потсети генералниот секретар на Алијансата, додавајќи дека „од германските челници се очекува и да го зголемат издвојувањето за одбраната, бидејќи во тоа е потребно да се инвестира за да бидеме во состојба да ги заштитиме своите сојузници и да ја одржиме безбедноста и стабилноста во Европа“.
На самитот одржан на почетокот од септември во Велс, челниците на НАТО повикаа да се започне реализацијата на една од целите на Алијансата, а тоа е во следните десет години за одбраната да се издвојуваат два отсто од бруто домашниот производ (БДП-то) на земјите членки./крај/мф/сн
Извор: Reuters
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Во Киев се урива споменик кој ја слави блискоста меѓу Русија и Украина
Властите на Киев во вторникот почнаа да го отстрануваат споменикот од советската ера што ја означува врската меѓу Русија и Украина, повеќе од две години откако Москва започна инвазија врз Украина.
Неколку дена ќе бидат потребни за целосно уривање на споменикот од црвен гранит, кој се состои од дваесетина поединечни елементи, соопшти градската управа.
Тоа е всушност група статуи кои прикажуваат украински Козаци кои го опкружуваат лидерот Богдан Хмелницки и московскиот амбасадор.
Статуите ќе бидат префрлени во воздухопловниот музеј.
Споменикот е изграден во 1982 година за да го одбележи „обединувањето на украинскиот народ со братскиот руски народ“ во 1654 година, кога Хмелницки склучил сојуз со рускиот император во борбата против полско-литванскиот сојуз.
Советските историски книги го романтизираа како почеток на нераскинливо пријателство меѓу Украина и Русија.
Европа
Белоруските спортисти одат на Олимписките игри, Лукашенко: Победете ги противниците
Белорускиот претседател Александар Лукашенко денеска им порача на белоруските спортисти кои учествуваат на Олимписките игри во Париз под неутрален статус „да ги победат своите противници“.
„Ако сте избрале и одите таму под неутрален статус, истепајте ги, покажете им дека сте вистински Белоруси“, рече Лукашенко во соопштението за печатот на претседателството.
За време на посетата на регионот Могилев во Белорусија, жителите го прашале Александар Лукашенко што мисли за ова учество под неутрален статус, се вели во извештајот објавен на веб-страницата на белоруското претседателство.
„Спортистот треба да избере. Доколку одлучи да учествува на Олимписките игри, ќе биде уште пожесток. Затоа што разбирате дека состојбата на умот и гневот не се од мала важност во спортот“, реагира Лукашенко. „Вие сте Белорусија и кога ќе излезете како победници, тоа е добар начин политички да ги удрите во лице“.
Лукашенко, кој е на власт од 1994 година, ги искорени сите форми на опозиција во неговата земја, потиснувајќи мирно масовно движење во 2020 година. Тој е навикнат и на широки изјави и испади, како на пример кога парадираше со калашников во раката пред демонстрантите кои се противат на неговото владеење, нарекувајќи ги „стаорци“. Во февруари 2022 година, тој ја отвори Белорусија за руската армија за да може да ја нападне Украина од север.
Белорусија беше исклучена како земја од Игрите поради нејзината поддршка за руската инвазија на Украина, а нејзините спортисти се натпреваруваат под неутрален статус, без химна, знаме или национални обележја.
Европа
(Видео) Полицијата го бркаше убиецот со меч низ Лондон, објавена е снимка
Би-би-си објави снимка на која се гледа лондонската полиција која го брка напаѓачот со нож, кој денеска уби 13-годишно момче и повреди неколку други.
На снимката се слушаат полицајците како им викаат на граѓаните: „Заклучете ги вратите“.
Полицијата смета дека не се работи за терористички напад.
Полицајците уапсија маж вооружен со меч по извештаите за сериозен инцидент со прободување во североисточен Лондон.
Со електрошокер бил совладан 36-годишниот маж кој мавтал со меч.
„Со голема тага можам да потврдам дека 13-годишното момче кое беше избодено, почина во болница набргу откако му биле нанесени убодите“, изјави началникот на лондонската полиција Стјуарт Бел.
Уште две лица и двајца полицајци се во болница поради убодни рани и се надвор од животна опасност.
„Не мислиме дека постои закана за пошироката заедница, полицијата не бара други осомничени и се чини дека овој инцидент не е поврзан со тероризам“, рече Бел.