Европа
Студената војна конечно заврши во Швајцарија
Блоковската Студена војна конечно е завршена во Швајцарија, тивко кон крајот на 2014 година, кога биле отстранети последните количества експлозив поставени по Втората светска војна од мостови, во тунели, покрај сообраќајници, штитејќи ја оваа богата алпска земја од можна странска инвазија.
Меѓу последните објекти кои биле исчистени од експлозив бил мостот во Бад Саекинген, на северот, кој Швајцарија ја поврзува со Германија. Мостот изграден во XIV век е впишан како историски споменик во туристичките водичи, коишто меѓутоа не споменуваат дека се’ до октомври 2014 година во неговите темели лежеле стотици килограми експлозив ТНТ. Локалното население нешто и знаело за тие мини, но сепак во доменот на шпекулациите и воопшто немало информации со каква закана со децении живеело.
На почетокот од Втората светска војна, и тогаш и сега неутралната Швајцарија започнала со експлозиви да ги штити објектите од цивилната инфраструктура за да се заштити во случај на инвазија до странство со уништување на комуникациите. Од почетокот на 1940 година постоел концепт според кој во случај на напад војската би се повлекла во планините и би ги активирала поставените експлозиви.
Меѓутоа, по 1945 година експлозивот не бил отстранет, туку напротив засилен, особено во периодот на Студената војна кога тогашна западна Европа како дел од НАТО влезе во конфликт на работ од нова светска војна со Варшавскиот пакт предводен од тогашната велесила Советскиот сојуз. Од неколку стотици објекти кои биле заштитувани со мини од крајот на војната, бројот на таквите објекти се зголемил на две до три илјади во текот на 1980-те години во времето кога советските нуклеарни ракети од типот „СС-20“ беа кошмарот на западноевропските земји.
Советскиот сојуз, меѓутоа, се распадна во 1991 година, а Швајцарија не се откажувала од својата одбранбена доктрина и продолжила во неа да вложува милиони франци. Доктрината позната како „Швајцарско сирење“ се состоела во тоа секоја планина да се издупчи за во неа да се сокријат бункери и писти за одбрана од напад, вели за AFP Жулиен Гран, генерален секретар на Швајцарското здружение за воена историја.
Швајцарската армија дури неодамна призна дека таа стратегија е „застарена“, а на прашањето зошто толку долго се чекало, одбраната одговара дека немала доволен број стручни лица за таа работа да ја извршат во строгите безбедносни услови.
Аналитичарите, пак, сметаат дека тоа е делумно и одраз на швајцарската политика и системот на референдум кој не ги фаворизира брзите промени. Покрај тоа, Швајцарија храбро ја објавила својата долг чувана тајна, а „ниедна земја не ги објавува сите свои воени тајни, но знаеме ли воопшто дали сите други земји ги уништиле своите експлозиви“, прашува историчарот Петер Хуг./крај/мф/сн
Извор: AFP
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
16-годишно момче избодено во училиште во Германија
16-годишно момче е тешко повредено кога утрово околу 8 часот било избодено од тинејџер (17) во училиште во Нојкирхен-Влуин.
На нападот наводно му претходела вербална расправија.
Постариот ученик наеднаш извадил нож и го ранил 16-годишникот во горниот дел од телото.
Момчето итно било пренесено во болница, а лекарите велат дека неговата состојба е стабилна.
По прободувањето напаѓачот побегнал од училиштето, но полицијата брзо го лоцирала и го уапсила.
Според инспекторот, немало опасност по безбедноста на другите деца во училиштето.
Европа
Во Англија извикал „Алах Акбар“ и убил случаен минувач: „Го направив тоа за луѓето од Газа“
45-годишниот Ахмед Алид вчера беше прогласен за виновен за убиство и обид за убиство. На 15 октомври минатата година, барател на азил од Мароко со нож го уби 70-годишниот Теренс Карни во центарот на англискиот град Хартлпул. Тој претходно го избодел со нож својот заспан цимер Џавед Нури додека викал „Алах Акбар“.
Алид и рекол на полицијата дека сето тоа го направил „за луѓето од Газа“. Само осум дена пред да убие случаен минувач и да го рани својот цимер, милитантите на Хамас го нападнаа Израел. Алид се заколнал дека ќе убиел повеќе луѓе доколку имал митралез и друго оружје, изјави обвинителот Џонатан Сендифорд во Судот во Тесајд.
Алид делел куќа со други баратели на азил во североисточна Англија. Тој бил вознемирен што Нури го прифатил христијанството. Цимерите рекле дека Алид почнал да носи нож откако на телевизија видел прилог за настаните во Газа.
Европа
Крим главна цел: Пентагон откри за што Украина ќе ги користи моќните ракети АТАКМС
Министерството за одбрана на САД ја појасни целта за испорака на ракети со долг дострел во Украина, кои неодамна беа испорачани во тајност. Како што објави „Њујорк тајмс“, целта на испораката на американските ракети АТАКМС е да се зголеми притисокот врз Крим, кој беше анектиран од Русија по референдумот во 2014 година.
Крим го претставува центарот во кој се лоцирани голем број руски воздушни и копнени сили и кој досега, како што пишува американскиот дневен весник, „за нив бил релативно безбедно засолниште“. Ова го тврди анонимен американски функционер. Сепак, Пентагон одби да каже колку точно од овие проектили со дострел од 300 километри се испорачани на украинската страна.
Советникот за национална безбедност на Белата куќа, Џејк Саливан, претходно ја потврди испораката на овие ракети без да прецизира дали тие се модифицирани и имаат зголемен дострел.
Украинските сили веќе употребија АТАКМС, што претседателот Володимир Зеленски го потврди на 17 април, објавувајќи дека бил извршен напад врз воздухопловната база Џанкој, која се наоѓа на 165 километри од линијата на фронтот. Министерството за одбрана на Руската Федерација не ги коментираше овие наводи.
Pentagon reveals Ukraine’s targets for ATACMS missiles – NYT — (the usual baffling lack of retaliation threats from #Putin– instead just the usual bleating that ‘it’s impossible to justify’..Bring Stalin back to life please, Russia) https://t.co/8pi0Lx8tbt #CapeTown #SouthAfrica pic.twitter.com/ZtI5cG3r2m
— Peter Mayson (@theforeverman) April 26, 2024
Американскиот дневен весник потсетува дека Украина првпат добила ракети АТАКМС во септември минатата година, но дека станува збор за верзија со половина дострел. Се шпекулираше дека Украина можеби користела американски ракети за да го урне кримскиот мост, што на почетокот на месецов го потврди и самиот претседател Зеленски, велејќи дека неговата влада „навистина сака да го уништи мостот на Крим“.
Тој е симбол на руската окупација и преку овој мост Русија испорачува воена опрема и ги снабдува војниците во Украина. Во неколку наврати досега мостот беше цел на украински напади.
– Мислам дека е вистинското време, а шефот (Бајден) донесе одлука дека е вистинско време да и го обезбеди на Украина оружјето неопходно за тековната борба. Тоа е добро осмислена и многу конструктивна одлука – изјави адмирал Кристофер Грејди, заменик командант на Здружениот генералштаб на американската армија.
Руската страна го осуди потегот на САД, а рускиот амбасадор во Вашингтон Анатолиј Антонов рече дека тоа „ја зголемува заканата за безбедноста на Крим, вклучително и Севастопол и другите руски градови“.