Како што беше најавено претходно во петокот, новоизбраниот американски претседател Доналд Трамп го соопшти својот избор на сенаторот Џеф Сешнс за нов главен државен обвинител, пратеникот Мајк Помпео за нов директор на директор на Централната разузнавачка агенција (CIA), додека пензионираниот генерал Мајкл Флин го именуваше за советник за национална безбедност.

Џеф Сешнс, Мајк Помпео, кој инаку жесток противник на нуклеарниот договор со Иран, како и Мајкл Флин, кој го советуваше Доналд Трамп за воените прашања во текот на кампањата, ги прифатија своите именувања, соопшти транзицискиот тим на новиот американски претседател.

„Со ентузијазам ја прифаќам визијата на новоизбраниот претседател Трамп за ‘една Америка’, како и неговата доследност на еднаквата правда пред законот. Се радувам на своите обврски со цврста приврзаност кон чесноста и непристрасноста“, изјави 69-годишниот Сешнс, ветеран на американскиот Конгрес, кој ќе го води министерството за правосудство, а беше еден од најпрвите поддржувачи на Трамп.

Трамп, пак, Сешнс во соопштението го нарече „правен ум од светска класа“ кого „извонредно го почитуваат вистинските експерти и речиси секој што го познава“.

Овие именувања преставуваат први чекори на новоизбраниот претседател во формирањето на својот кабинет што, според американските медиуми, е одбележано со заткулисни борби и промени пред инаугурацијата којашто ќе се одржи на 20-ти јануари следната година.

За директор на CIA, Трамп го именуваше Мајк Помпео, конгресмен чиешто име стана попознато во јавноста во 2012 година по контроверзниот смртоносен напад на исламистите од таа есен врз американскиот конзулат во северниот либиски град Бенгази. Помпео беше коавтор на извештајот кој ја обвини тогашната државна секретарка Хилари Клинтон, подоцна демократски противкандидат за претседател на Трамп, за лошо управување со кризата и занемарување на предупредувањата за можен напад во кој беше убиен американски амбасадор и уште тројца американски државјани.

„Тој ќе биде брилијантен и непопустлив челник на нашата разузнавачка заедница кој ќе ја осигури безбедноста на Американците и на нашите сојузници“, изјави Трамп за 52-годишнито Помпео.

Советник за национална безбедност станува 57-годишниот Флин кому му е одредена клучната улога во оформувањето на политиката на новиот претседател кој нема искуство по прашањата од внатрешната и надворешната политика.

„Среќен сум што генерал-полковникот Мајкл Флин ќе биде крај мене додека работиме на совладувањето на радикалниот исламски тероризам, управуваме со геополитичките предизвици и ја чуваме безбедноста на Американците, како дома така и во странство“, вели Трамп во писмената изјава.

Иако регистриран како демократ, Флин во кампањата на републиканецот 00Трамп беше ангажиран како советник за националната безбедност, притоа покажувајќи го својот цврст став кон исламскиот екстремизам кој во еден разговор за весникот The New York Times го опиша како егзистенцијална закана од светски димензии.

Флин во американската и странската јавност е извонредно ценет како воено-разузнавачки експерт кој помагал во борбата против бунтовничките мрежи во Авганистан и во Ирак. Армијата ја напушти откако сегашниот демократски претседател Барак Обама во 2014 година му даде отказ од функцијата директор на воената Одбранбена разузнавачка агенција (DIA) по поплаките околу неговиот начин на раководење.

Во четвртокот вечерта беше објавено дека Доналд Трамп во недела ќе се сретне со Мит Ромни, кој важи за умерен политичар кој силно го критикуваше и се противеше на изборот на Трамп, а е неуспешен претседателски кандидат на републиканците на минатите избори во 2012 година. Оваа средба се поврзува со можното именување на Ромни за државен секретар, позиција за којашто се споменува и поранешниот градоначалник на Њујорк, Рудолф Џулијани.

Коментаторите сметаат дека доколку виде именуван на позицијата шеф на американската дипломатија, Мит Ромни ќе го донесе со себе класичниот републикански пристап на надворешната политика. Во прв ред посочуваат на тоа дека Ромни во 2012 година Русија ја опишуваше како најголема геополитичка закана, додека Трамп во кампањата се залагаше за поблизок дијалог со Москва.

Претходно дел од американската јавност негодуваше на изборот на Трамп за свој главен советник на Стивен Бенон, борец против естаблишментот и извршен претседател на конзервативниот американски медиуми Breitbart./крај/мф/сн