Домашен
Победата против Монпелје е императив за ракометарите на Вардар
Ракометарите на Вардар против француски Монпелје, во сабота, ќе го одиграат натпреварот од претпоследното коло во Ц групата во Лигата на шампиони. Вардар пред одигрувањето на последните две кола се наоѓа на втората позиција во групата, додека францускиот тим е четвртопласиран и за очекување е тука да ја заврши оваа фаза во шампионската лига.
Победа или освоен бод за Вардар ќе значи дека за втората позиција во групата ќе решава во последното коло кога ќе му гостува на Рајн Некар Ловен, кој во ова коло гостува кај Чеховски Медведи и за очекување е да победи кај најслабиот тим во групата.
„Натпреварот има исклучително значаен за нас, со бод или два сигурно ќе бидеме трети, па со Рајн Некар следната недела ќе се бориме за второто место. Монпелје е квалитетна екипа во моментов прва во француското првенство. Играат незгоден ракомет поради тоа што многу често ги менуваат одбраните, играат 3-2-1, 6-0 и 5-1, што е многу тешко за адаптација“, рече на прес-конференцијата во пресрет на натпреварот вардаровиот тренер Раул Гонзалес.
Шпанскиот стратег изрази задоволство што екипата по светското првенство и мечевите кои ги играше во СЕХА лигата, конечно доби една цела недела за тренинг. Според него, од ден на ден работите одат според посакуваниот план и се надева дека екипата ќе се претстави во вистинска светлина против Монпелје.
Атмосферата на тренинзите помалку ја нарушуваат полесните повреди на Прибак, Марковиќ, Тоскиќ и Душебаев, но Шпанецот смета дека има доволно време до натпреварот со францускиот тим тие да бидат максимално подготвени.
Првиот натпревар меѓу овие два тима кој се одигра на 19-ти октомври минатата година во Монпелје заврши без победник 34:34. За разлика од тој меч, кај Монпелје го нема репрезентативецот на Франција, Матје Гребиј, кој тогаш постигна 11 голови.
„Тоа што тој нема да игра е добро за нас, бидејќи тој е многу добра играч кој подеднакво добро игра и во одбрана и во напад. Сепак, Монпелје има уште неколку добри ракометари, а тоа што нема да игра Гребиј е проблем за нив“, рече Гонзалес.
Натпреварот меѓу Вардар и Монпелје ќе се одигра во СЦ „Јане Сандански“, в сабота со почеток во 19 часот./крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.