Европа
Јункер: Голема грешка на Обама е да ја нарече Русија „регионалана сила“

Американскиот претседател во заминување Барак Обама направи голема грешка нарекувајќи ја Русија „регионална сила“, изјави во интервју, претседателот на Европската комисија Жан-Клод Јункер. Тој смета дека Европа, треба да ја третира Русија како „еден голем ентитет и горда нација“ и има многу да учат за тоа.
„ЕУ зафаќа 5,5 милиони квадратни километри, Русија 17,5 милиони. Русија мора да се третира како еден голем субјект, како горд народ“, изјавил за Еуроњус (Euronews), претседателот на Европската комисија.
Тој призна дека ЕУ е „многу неука за Русија“ во овој момент, и дека „ние имаме многу да учиме“.
Јункер, кој е на чело на Европската комисија во изминатите две години, го критикуваше американскиот претседател Барак Обама, кој во 2014 година ја нарече Русија “регионална сила која се заканува на некои од нејзините непосредни соседи, не поради сила туку од слабост “.
Тој истакна дека ЕУ не зависи од надворешната политика на САД. Вашингтон „може да прави што сака да се направи и Европејците ќе имаат свои интереси во рамките на нивната свера на управувањето”, изјави тој, осврнувајќи се на сегашната состојба на билатерален дијалог Брисел – Москва.
На тема санкции, Јункер истакна дека нема аргумент за укинување на санкциите, но при тоа додаде дека тој сепак би сакал ЕУ да се помири со Москва, „имајќи на ум дека без Русија, не постои безбедносна архитектура во Европа.“ /крај/мф/вс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Двајца млади луѓе со босанско потекло меѓу убиените во пукањето во училиштето во Грац

Најмалку 10 лица беа убиени, а 12 се ранети во утринското пукање во средното училиште во Грац, Австрија, од кои седум се во критична состојба.
Меѓу загинатите има двајца млади луѓе по потекло од Босна и Херцеговина – 17-годишна ученичка со иницијали К.Ј. и девојка по име Х.А., која починала од повредите. Како што неофицијално објави „Кликс“, лекарите се борат за животот на уште едно лице по потекло од Босна и Херцеговина.
Иако Амбасадата на БиХ во Австрија во моментов нема официјални или неофицијални информации за убиени државјани на БиХ, потврдено е дека станува збор за лица кои се по потекло од БиХ, но не и државјани на таа земја.
Информациите за идентитетот на жртвите ги потврдил за „Кликс“ имамот во Грац, Сабахудин Хасиќ.
Нападот го извршил 21-годишен поранешен ученик кој, според австриските медиуми, влегол во училиштето вооружен со пиштол и пушка. Тој испукал десетици куршуми пред да изврши самоубиство во тоалетот на училиштето, каде што го пронашле полицајци кои ја евакуирале зградата.
Пукањето ја шокираше австриската јавност, а истрагата за мотивите за нападот сè уште е во тек.
Европа
Австриски министер: Напаѓачот е поранешен ученик кој никогаш не завршил училиште

Австрискиот министер за внатрешни работи Герхард Карнер зборуваше на прес-конференција за масакрот во училиштето во Грац.
„Точно во 10 часот наутро, од училиштето беше упатен повик до полицијата. Се слушаа истрели и вресоци“, рече тој. Тој истакна дека полицијата пристигнала на местото на настанот во рок од неколку минути. Потоа пристигнале членовите на елитната единица Кобра.
„Брзата помош пристигнала неколку минути потоа“, истакна Карнер. Тој потврди дека напаѓачот убил вкупно девет лица, шест од женски и три од машки пол. Нагласи дека напаѓачот е мртов. Изјави дека станува збор за поранешен ученик кој не завршил училиште.
„Сè друго е сè уште шпекулација. Тој беше поранешен ученик, но не завршил училиште“, рече тој.
Шефот на полицијата на Штаерска, каде што се случил нападот, откри некои детали за осомничениот. Тој рече дека имал 21 година и живеел во Грац. Полицијата верува дека се самоубил во тоалетот.
„Повеќе од 300 полицајци излегоа на местото на настанот по пукањето и обезбедија евакуација на училиштето“, рече тој.
Тој, исто така, ги замоли сведоците да не споделуваат слики или видеа на социјалните мрежи. Тој нагласи дека полицијата создала платформа преку која може да се споделуваат информации.
Европа
Русија призна дека нејзиниот „мировен меморандум“ е ултиматум што Киев нема да го прифати, вели Зеленски

Руските преговарачи директно ѝ кажаа на украинската делегација дека нивниот таканаречен „меморандум за мир“ е всушност ултиматум што Киев не може да го прифати, изјави украинскиот претседател Володимир Зеленски во интервју за унгарскиот медиум „Валаш онлајн“, објавено денес, пренесе „Киев Индепендент“.
„Тие ѝ кажаа на нашата делегација дека знаат дека тоа е ултиматум“
„Тие дури ѝ кажаа на нашата делегација: знаеме дека нашиот меморандум е ултиматум и дека нема да го прифатите“, рече Зеленски. „Значи, прашањето не е квалитетот на истанбулскиот формат, туку што да се прави со руските лаги“, додаде тој.
Зеленски верува дека главната цел на Москва е да ја поткопа западната поддршка за Украина и во исто време да ги одолговлекува преговорите, а воедно да продолжи со воената агресија.
Неговите изјави доаѓаат по втората рунда директни разговори во Истанбул на 2 јуни, каде што Кремљ ѝ предаде на украинската страна документ со наведени услови за прекин на огнот.
„Јас ги водам преговорите за територии, а истото важи и за Путин“
Според Зеленски, украинската делегација имала мандат да преговара исклучиво за хуманитарни прашања – како што се прекин на огнот, размена на затвореници и враќање на деца земени од Русија – но не и за украинскиот суверенитет или територијален интегритет.
„Ова е прашање на нашиот устав. Јас преговарам за територии – а истото важи и за Путин, кој ги окупираше. Нема да го дискутирам мојот став за ова со никого друг“, рече Зеленски.
Според „Киев Индепендент“, рускиот документ бара Украина да ја признае руската анексија на Крим и регионите Херсон, Донецк, Запорожје и Луганск – иако ниту еден од нив не е целосно под руска контрола.
Зеленски го повтори условот за разговори за територијата
Кремљ, исто така, бара целосно повлекување на украинските воени сили од регионите, но Зеленски повторно отфрла какво било предавање на окупираните територии.
„Повеќе пати рековме дека ако добиеме соодветни безбедносни гаранции што би го спречиле Путин да ја продолжи војната, ќе имаме време да одлучиме за територијалните прашања. Дипломатски, а не со сила“, рече Зеленски.
Други руски барања вклучуваат Украина да прогласи неутралност, да ја суспендира странската воена помош, да го признае рускиот јазик како службен јазик, да им даде амнестија на проруските соработници и да го забрани присуството на странски трупи, што е спротивно на предлозите на Европската Унија за меѓународни мировни сили.
Контрапонудата на Украина во Истанбул вклучуваше размена на сите затвореници, враќање на украинските деца земени од Русија, ослободување на сите цивили во заробеништво и право на Украина да го продолжи својот пат кон членство во ЕУ и НАТО.
Договорени се само хуманитарни чекори
Киев, исто така, предложи користење на замрзнатите руски средства за реконструкција на земјата и рече дека е подготвен да разгледа делумно укинување на санкциите доколку се постигне прекин на огнот.
Иако не е постигнат прекин на огнот или политичко поместување, страните се согласија за неколку важни хуманитарни чекори, вклучително и размена на воени заробеници и тела на загинати војници, според „Киев Индепендент“.
Додека Украина и САД продолжуваат да се залагаат за прекин на огнот без предуслови, Русија инсистира на максималистички барања и ги отфрла сите такви предлози.
Претседателот на САД, Доналд Трамп, наводно изразил незадоволство од тврдоглавоста и растечката агресија на Русија, но сè уште не вовел нови санкции врз Русија.