Свет
Јужен Судан ги избрка норвешките хуманитарци од земјата

Јужен Судан нареди двајца високи претставници на Советот за бегалци на Норвешка да ја напуштат земјата, без објаснување, соопшти оваа организација.
Наредбата доаѓа по депортацијата на американски новинар од земјата зафатена со граѓанска војна и претставува аларм за зголемено насилство, а експерти за човекови права од Обединетите нации предупредуваат за етничко чистење во Јужен Судан.
Директорот на Советот за бегалци на Норвешка, кој еден ден беше во притвор о од силите на безбедност, како и менаџерот на северната држава Варап, треба да ја напуштат земјата.
„Советот за бегалци на Норвешка не доби формално објаснување кои се обвинувањата за овие две личности“, велат од организацијата во изјавата. „Наредбата вториот највисок по функција човек во организацијата да го напушти Јужен Судан е неприфатлива“, вели Јан Егеланд, генерален секретар на Советот. „Без уверување од властите дека ќе можеме да продолжиме со нашата хуманитарна работа без попречување, Советот ќе ја преиспита состојбата и ќе оцени дали може да пружи помош во Јужен Судан“, додава Егеланд.
Организацијата е присутна во Јужен Судан од 2004 година, а во првите осум месеци од оваа година пружиле помош на повеќе од 658.000 луѓе во земјата.
Јужен Судан во четврток прави три години од почетокот на граѓанската војна, која почна две години по прогласувањето независност од Судан, што ги прави најмлада нација на светот.
Претседателот Салва Кир го обвини неговиот поранешен заменик Риек Мачар за обид за државен удар, што доведе до војна во која десетици илјади загинаа, а 2,5 милиони луѓе се раселени.
Обединетите нации пред две недели предупредија дека во земјата се спроведува етничко чистење, а дека во многу области се случува сексуално насилство врз цивилното население.
Според Советот за бегалци на Норвешка на повеќе од шест милиони, што е повеќе од половина население, им треба хуманитарна помош./крај/тл/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Израелскиот министер за одбрана: Ова е клучен момент во историјата на Израел

Израелскиот министер за одбрана Израел Кац изјави непосредно пред почетокот на нападот врз Иран дека ова е „клучен момент во историјата на Државата Израел и во историјата на еврејскиот народ“.
„По преземањето на функцијата, спречувањето на нуклеарната програма на Иран го направив апсолутен приоритет“, рече Кац, додавајќи дека „Иран е порешителен од кога било да ја реализира својата визија за уништување на Израел“.
Тој додаде дека Израел е во „критична точка“ и предупреди: „Ако ја пропуштиме, повеќе нема да имаме начин да го спречиме Иран да добие нуклеарно оружје што би го загрозило нашето постоење“.
Тој заклучи дека Израел дејствувал против сојузниците на Иран во регионот во изминатите година и пол, но дека сега „се справува со главата на змијата“.
Свет
Трамп: Знаевме однапред за израелскиот напад, но не учествувавме

Претседателот на САД, Доналд Трамп, изјави за „Фокс њуз“ дека однапред знаел за израелските планови за напад врз Иран, но нагласи дека американската војска не била вклучена во операцијата.
Трамп рече дека САД сè уште сакаат да се вратат на преговарачката маса со Иран за да ја ограничат неговата нуклеарна програма.
„Иран не може да има нуклеарна бомба и се надеваме дека ќе се вратиме на преговорите. Ќе видиме“, рече Трамп.
Тој додаде дека неколку ирански лидери биле убиени во нападот и коментираше дека „некои од раководството никогаш повеќе нема да ги видиме“.
Трамп исто така рече дека неговата администрација контактирала со клучен сојузник на Блискиот Исток кратко пред нападот, но не откри за која земја станува збор.
Свет
Убиен е висок ирански воен функционер

Иранската државна телевизија IRINN објави дека генералот Мохамед Багери, началник на Генералштабот на иранските вооружени сили и највисок воен офицер во земјата, е убиен во израелски напад.
Багери е втората висока воена личност за која се знае дека е убиена во невидените израелски напади врз Иран преку ноќ.
Претходно, иранските државни медиуми објавија дека е убиен и генералот Хосеин Салами, командант на Иранската револуционерна гарда (IRGC).