Регион
Авганистанските бегалци се префрлуваат во Атина
Грчката полиција започнала во вторникот утрото да ги префрла со автобуси во Атина стотината авганистански мигранти, блокирани на грчко-македонската граница откако Македонија одби да ги пропушти на својата територија поради тоа што неколку стотици се веќе заглавени во прифатниот центар на Табановце на северната граница, откако Србија не им дозволува влез на своја територија за да продолжат натаму кон северна Европа.
Најмалку седум автобуси тргнале кон Атина со многубројни авганистански семејства кои би требало привремено да бидат сместени во прифатницентри близу грчката престолнина, рекле грчки полициски извори за AFP на грчката страна од заедничката граница со Македонија.
Околу 600 Авганистанци протестираа во понеделникот на железничката пруга во близина на граничниот премин Идомени барајќи „отворање на границите“ и осудувајќи ја одлуката на Македонија да не ги пропушти. Тројца од нив успеаја да ја пробија полициската барикада и да ја прескокнат граничната преграда пред да бидат фатени на маедонската страна.
Вкупно 4.000 имигранти се наоѓаа во вторникот претпладнето на грчко-македонската страна, меѓу кои има и многу Сиријци и Ирачани на кои им е дозволено преминувањето на границата, но тоа се одвива постепено.
До минатата седмица мигрантите од Авганистан, покрај оние од Сирија и од Ирак, беа пропуштани низ јужните земји од ткн балканска рута, бидејќи се сметаат како бегалци од зони на воени конфликти, додека другите беа враќани како економски имигранти. Засега не е јасно кога повторно авганистанските бегалци ќе може без проблеми да продолжат со патувањата низ Македонија и Србија./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Кси слета во Србија: Претседателот на Кина пречекан од Вучиќ и државниот врв
Заедно со претседателот на Србија Александар Вучиќ и првата дама, кинескиот претседател Кси Џинпинг беше пречекан на црвениот тепих од српската делегација составена од премиерот Милош Вучевиќ, претседателката на Собранието Ана Брнабиќ, министерот за надворешни работи Марко Ѓуриќ, српската амбасадорка во Кина Маја Стефановиќ и кинескиот амбасадор во Белград Ли Минг со сопругата.
Свечениот пречек на кинеската делегација која брои 400 лица е закажан за в среда пред палатата „Србија“.
Домаќин на претседателот Кси Џинпинг ќе биде српскиот претседател Александар Вучиќ, а двајцата лидери ќе разговараат за широк спектар на теми – од политички, економски и технолошки до соработка во областа на културата.
За време на дводневната посета на Кси Џинпинг на Србија, планирано е да се потпишат над 30 договори.
Беше организиран и свечен ручек на кој кинескиот претседател ќе има можност да дегустира српски јадења и вина, а ќе има и музичка програма на српски и кинески јазик, која ќе заврши со песната „Ова е Србија“.
Поради доаѓањето на кинескиот претседател преземени се големи безбедносни мерки, па неговата делегација ќе ја обезбедуваат 3.400 полицајци.
Регион
Руски хакери ги нападнаа веб-страниците на косовските институции
Руски хакери ги нападнаа веб-страниците на косовските институции, изјави министерот за одбрана Ејуп Македончи.
„Група руски хакери извршија сајбер-напад на Косово како одмазда за мојата изјава за поддршка на Украина“, изјави Македончи.
Во текстот на руските хакери се споменува говорот на тој косовски министер кој, според нив, рекол дека „Косово е подготвено да и понуди воена помош на Украина“.
„Косово е подготвено да ги здружи колективните напори за поддршка на одбраната на Украина. Треба повеќе да размислат за ова“ – напишаа хакерите на руски, спомнувајќи го министерот Македончи.
Министерката за надворешни работи и дијаспора Доника Гервала објави дека „Русија врши хибриден напад на Косово“.
Гервала на мрежата „Х“ изјави дека „рускиот хибриден напад на Косово“ доаѓа по најавата за поддршка на Косово за Украина со воена опрема.
Регион
Александар Вулин: Пријателството меѓу Србија и Кина е челик затоа што го ковавме во оган
Вицепремиерот на Србија, Александар Вулин, на промоцијата на културната размена меѓу Кина и Србија на тема „Што ги делат планините и реките, пријателството обединува“, изјави дека пријателството меѓу двете земји е челик бидејќи е ковано во оган и дека Србија и Кина се разделени за многу работи, но најважното ги обединува, а тоа е одлуката на две држави да бидат слободни.
„Пријателството на нашите лидери, претседателот Вучиќ и претседателот Си Џинпинг, не обврзува да сториме сè, исто како нив, за нашите народи да бидат поблиски отколку што нè прави блиски географијата или историјата. Србите и Кинезите ги дели сè, ние сме различни во сè, но нас нè обединува она најважното – нашата одлука да бидеме слободни, нашата посветеност на најважната карактеристика на народите и луѓето – слободата“, рече Вулин на настан организиран од China Media Group.